martes, 24 de julio de 2007

24-07-2007 Sufreral de Boxu

BENDON-IS-SUFREIRA DE BOXU-BEVERASU-BRAÑA DE IS-BENDON

Güey vamos pal occidente, paramos a desayunar na Allandesa, sita na Pola d'Allande, ye temprano, visitamos el texu de Santa Coloma, y de seguío sin apenes posanos del coche, tamos en Bendón, onde fina la carretera y por ende la civilización.
Nun quea otra que aparcar el coche, nun hay más asfaltu, vamos caleyando hasta Is, onde solo viven dos paisanos, colos que falamos un buen ratu, seguimos la caleya hasta la sufreira, fai calor, el clima ye más propiu del mediterrán, d'hay la vexetación típica.





Xusto enantes de Boxu, encontríamonos cuna capiella, que bona sombra da, aprovechamosla, la sombra, pa descansar y char un tragu.
Baxamos ente artos a Boxu, aldea abandona nel medio'l sufreral.


De vuelta na pista, ancha y con buen firme, seguimos camín hasta llegar a Beverasu, onde vive un paisanu ya vieyu, y unos cuantos perros, un dellos tien los dientes bien afilaos... pa acabar colos tópicos "lladrá y muerde" el muy, nunca mexor dicho fiyu de perra.
Damos la vuelta hasta una finca grande y pindía, que atravesamos. Hasta agora el día transcurría placenteru, yera to cuesta pa baxo.


Ya empíeza unu a sudar, el calor y la cuesta faenlo posible, subimos a la sombra dun rebollal hasta llegar a lo cimero la sierra de Muriellos, desdi onde agüeyamos les xerres del Puertu'l Palu, el altu la Marta y el paixaxe protexíu de la Sierra de Carondio, colos picos Violla,Vigueira y Carondio en filera al otru llau'l barrancu.
Seguimos el pasu por una pista ancha ente praos perbien trancaos, hasta alleganos a la Braña d'Is, onde xintamos y tentamos la bota vino, sentaos conla espalda apoya na muria.

Agora ye baxar ente gorbizos hasta encontriar la pista que nos dexe'n Bendón, onde llegamos sudorosos nun día veraniegu que pasamos caleyando por estes tierres de la sierra de Muriellos, 14 km y 600 m. de desnivel.
Tras refrescanos na fonte'l pueblu y cambianos de ropa, ya en coche facemos una paradina pa facer una semeya a la pergüapa Braña Campel. Y finar la xornada nun bar cualquiera tomando una cerveza fría tras un día cálidu.
Por cierto, los expedicionarios de güey fuerón: Riestra, Bernardo, Juan Carlos, Ana, Alberto y Cundi.