viernes, 9 de octubre de 2009

09-10-2009 La Fitona

RUAYER-CARBAYALIN-FITONA-LLASTRES-BRAÑA FOZ-RUAYER
Nel tren lleguen Josito y Riestra, n'Uvieu xúntasenos Juan Carlos, ya tamos tos. Tiramos carretera alantre hasta qu'el golor del cafe detiennos en Morea.
Ya bien reconfortaos llegamos a Ruayer (800), comencipíen les dificultaes, tan asfaltando les caleyes y hay que tornar marcha atras fasta'l comienzu del pueblu.
Son casi les 10, el dia atristáyau, cola borrina enganchá nes cumes. Vamos pola pista'l Puertu Vegará, soplando y resopliando a ver si espantamos a les puñeteres nubes.
Mayéu como dicen pela zona, el meyor y el más guapu del mundu, el Mayéu Carbayalin (1253) torcemos a la drecha camudando la afayaiza pista pol tortuosu camín qu'enseguía pasa a senderu pa darréu finar perdiu ente los matorrales.
Non pasa ná, güei ye perfacil, de frente p'arriba esquivando no posible les árgomes y los precipicios.
Frente a nos apaeznos el prestosu Mayeu'l Pozu (1580) con bona fonte y tres cabanines bien conservaes.
Siguimos pola drecha, primero por un buen senderu y después monte traviés algamamos la Llomba'l Boleru (1899), ya güeyamos l'oxetivu del día y les tierres de Lleón, col valle de Cansecu en primer terminu.
Lo que fasta agora yera un clima cuasi tropical, goterones abondo pol calor y la humedá, faise desapacible pol condenau aire fríu que sopla de Castiella.
Vamos crestiando, aguantando'l tipu ensin poner la chaqueta averamonos a la cume de la Fitona (2041).
El malditu aire gano a les mavavielloses vistes, parámonos lo suficiente pa decidir seguir p'alantre, siempre p'alantre...
Empicotámonos nel cumal 2017 (Llastres) inexistente nome na cartografía que manexamos e ilexible nome nel buzón alli plantáu.
Son les 2, bona hora pa ponese a xintar, facemoslo ensin ningún complexu, colos pies colgando sobre'l Puertu Vegará, alcordandonos de los picos pisaos que vemos... Osu,Nogales, Xexe, Cabritera, Cuchu...
Y alcordando pisar otros...Faro, Güevu, Peña Reonda, Retriñon y tantos y tantos y munchos más...
Baxamos buscando los rayos de sol, a la solombra ta fresco, crucíamos la fastera ente güelles de llobos, en direición a la Collá Maera (1784) echando-y les últimes güeyaes al valle de Cansecu.
Voltiamos p'Asturies oyendo y viendo remexones por tolos llaos.
Pasamos pola Fuente la Espalmaoria (1673) güei non fizo falta rellenar les cantimplores.
Baxamos de frente sortiando les cotoyes, esta tocome a mi, esta tamién, a esta toquela yo... maldita suerte.
Tamos nel mayéu Arrañaeru (1560) onde llega un buen camín ¡que coxemos!
Pasamos por sitios con nomes tan sonoros como Texupenexu (1420) un texu crez nuna piedra, La Pozona (1280), Espines de Can (1220) tamos pol Valle L'Orria, llegamos a Posaeru (1030) nes puertes de Ruayer.
Na fonte llavamonos, un poco nosotros y un muncho les botes, baxamos hasta'l coche pa camudanos de ropa y discurrir onde tomar una cerveza.
Tras 6 hores y media y 17 km. y un desnivel aproximáu de 1500 m, el aparatu dixo basta, 2041 de la Fitona menos 8oo de Robayer más el coeficiente redutor, salen 1500 m.
Bien merecía teníemos la cerveza que trasegamos en Casomera.

No hay comentarios: