sábado, 5 de septiembre de 2009

05-09-2009 Valdomingueru

JITU ESCARANDI-CASETON D'ANDARA-RASA DEL INAGOTABLE-GRAJAL D'ABAXO-GRAJAL D'ARRIBA-JIERRU-VALDOMINGUERU-JITU ESCARANDI
Nuevos tiempos, tiempos modernos, covocatoria urxente por sms, tomennos por un grupu d'aición rápida, eso paez anque a dalgún se-i peguen les sabanes, un puquiñin solo.
A les 7.40 salimos de Xixón, güei somos Jorge, Victor, Josito y Cundi los que nos presentamos en Arenes de Cabrales a desayunar.
Tras el café, el pinchu y después hasta'l Jitu Escarandi (1300) frontera con Cantabria, la carretera... hay pistes mexores, el aparcamientu llenu, enllenu d'ingleses tapecios pola borrina.
Enseguía dexamos atrás el so inintelixible llenguaxe, después dimos cola explicación de tanta priesa, Josito llevaba un llibru de 50 o 55 rutes dela zona y paecía querer faceles toes, no lu dexamos, solo ficimos 5, col llibru non acabo pero casi acaba con nosotros.
Como diba diciendo salimos apriesa del aparcamientu, facía frío, 5º anque esa sensación duro poco, dibemos subiendo pola pista dexando xente atrás, los goterones de sudor comencipíaben a escurrise pola frente abaxo.
La borrina diba esnidiandose, dexando ver un impresionante mar de nubes por dietrás y un acongoxante mar de picos por dielantre.
Darréu llegamos al Casetón d'Andara, antigüu barracón deles miles de mines del llugar, agora fai de refuxiu de montaña. Nun pue considerase paradina el tiempu que tuvimos nel Casetón y p'arriba, entovía no lo habíemos mencionao pero yerá to cuesta riba.
Ya chamos les manes a les piedres y non ye ninguna zuna sexual, más bien sindrome de supervivencia.
Atayamos a un grupín que diba a la Rasa del Inagotable (2201) paecíonos bona idea asina que p'alla nos empobínamos, un ratín sentaos, unes semeyes, dalgo de xintar y de beber, bones vistes, xente en toles picorotes.
Josito col dichosu llibru nes manes, si hubiesemos sabio les consecuencies...
Empobínamonos pol colláu del Mojón (2204) pal Grajal d'Abaxo (2248). baxamos por unos vericuetos y vuelven les cuestes p'arriba p'algamar el Grajal d'Arriba (2348)
Paezme que ni paramos, seguimos pal Jierru (2425) aquina si que tuvimos un buen ratu, digo lo de siempre, nun soy de munches ocurrencies, les mavavielloses vistes, la placidez del llugar, la compañía... ¡y una mierda, el non saber por onde baxar! ... y el intentar que Josito non arrancará la fueya dela Morra de Lechugales. Dexamosla pa otru día, a ver si entama a ñevar y nun poemos volver hasta'l próximu branu.
Llamadina a casa, na ya tamos baxando, ta chupao, enseguía llegamos.
Si o; primero baxar por esi pedregal ensin char a roar paez imposible, conseguimoslo pero dimos cuna paré, agora toca esguilar, guardamos los palos, necesitamos les dos manes p'agarrase a les piedres como si fuera lo último que fueramos a tocar, esguilar y non mirar p'abaxo.
Recuperaos del esfuerzu, el corazón entovía non atopa'l so sitiu, sentaos nos Campos de Valdomingueru (2144) ponemonos a xintar, selemente, visión en cinemascope, los güeyos recorren la enorme pantalla duna esquina a otra del Macizu Central, los mios fixense un poco más na canal de Fresnedal, mirala y sudar bien a ser lo mesmo.
Cuesta trabayu llevantase, esto pasa siempre, baxamos al colláu Valdomingueru y... miéu, pánicu, terror, van coles mochiles nuna mano y el málditu llibru na otra, yo solo atisbo a ver una paré mas llisa que les cases de Gaudi.
Somos pocos y naide se quier quear atrás, solo facía falta que lo propusiera unu pero na, a esguilar.
Va viendose mexor el camín de subir, esto si que ye una metíafora, y peor la manera de baxar, esto anque paezca una mamoná nun ye metíafora ninguna.
Nun momentín acabarosennos les piedres y arrancamos-i la fueya del Valdomingueru (2266) al llibru de marres.
Colamos pol pedregal deles Travieses del Grajal sin llevantar la tiesta, non vaya apitecer empicotase notru cumal. Paramos nel Refuxiu, tomamos unes llates de refrescu, tila nun teníen.
Taba baxando la borrina, la temperatura diba siendo más que fresca, baxamos adelantando turistes que taben embelesaos sacando semeyes a les vaques.
Camudamonos y ensin parar hasta Xixón, nun fueran a sacar el llibru dela mochila.
Asina fuerón 8 hores pol macizu Oriental, 17,5 km. 1371 m. de desnivel y 2425 m. de cota máxima, en tierres de Cantabria.