domingo, 31 de enero de 2010

31-01-2010 Foces de Ruayer

CASOMERA-RUAYER-MAYEU FONFRIA-RUAYER-CASOMERA
Güei teníemos previsto facer una ruta pergüapa y perfácil, entamando nes Foces del Pino pa finar nes Foces de Ruayer, cola remota posibilidá d'acabar xintando nalgún bar, había que facer un grupín guapu. Pero siempre apaez daquién con ganes de xingalo too, esta vegada foi l'home del tiempu dandolo de malu pa peor.
N'esti pais tamos avezaos a nun facer munchu casu a estos mindunguis, asina qu'a les 9 Josito, Gelu, Ana P, Toño, Ana B, Juan, Carlos, Mª Luz, Emilio, María, Eduardo, Marta, Mª Paz y Cundi taben coyendo fuercíes nuna churrería de Morea, fora llovía a calderaos.
Un poco d'agua nun diba chanos p'atrás, un nimíu cambiu de planes y colamos pa Casomera (640),el día fríu y gris, había dexao de llover... ñevaba bonamente.
Pertrechaos coles botes, polaines, guantes, gorru, paragües... baxo les güeyaes d'asombru, una manera suave d'expresalo, de los llugareños comencipíamos a caleyar carretera alantre.
Nestes llatitudes l'asfaltu ca vez ta más blancu. Na Paraya (700) colen de frente pela carretera, dexando'l barru nel camín que va pela otra oriella del ríu.
Peles Foces pasamos col paragües nuna mano y la cámara retratiar na otra.
A la entrá de Ruayer (820) axuntámonos toos, ya vamos pensando nes culaes que nos esperen al baxar per esta pindia carretera que ta faciendonos entrar en calor.
Finase l'asfaltu y comencipía la pista, de ñevar nun para, nel Areneru (1000) un touterrén tiense que parar, nosotros a pesar de los recuestos ca vez mas guapos y el caminar más afanosu seguimos p'alantré, bueno dalgunos dan la vuelta buscando'l calor del chigre y el xelu del vermut.
10 minutinos hasta la cabana, otros 10 que resulten 20 hasta'l Mayéu Talabarda (1250) que malapenes se ve tapáu pola ñeve. Venga va, otros 1o minutinos, hasta'l Mayéu Carbayalín, media hora dempués cola ñeve pembaxo hasta les rodíes, penriba hasta los costazos abellugamonos nel Mayéu Fonfría (1300).
Paraos y reponiendo les fuerces damonos cuenta del fríu que fai.
La nula visibilidá nun aconseyaba otra cosa que tornar pol mesmu sitiu, a la insinuación de siguir otro poco fuerón contundentes; fuxén como centelles, saquenme 200 m. de ventaya camín del chigre.
Al llegar al formigón tiense ya más cuidáu, l'asfaltu entovía ponlo peor, paecía una pista patinaxe.
A les 15.40 tabemos entrando en Casomera, anque Gelu subía escontra nos, debíen ser les ganes de xintar.
Baxabamos seliquinamente na idega que teníemos reservada mesa nalgún afayaizu llugar, al calor de la chimenea ensin cobertura, tubo que llegar nuesa secretaria pa escurrir qu'inda queden telefonos d'esos qu'estan conectaos col cable a la paré, asina algamamos un alcuerdu cola Casona de Nembra.
Camudaos, secos y con fame, muncha fame sentamonos na mesa, yeren poco menos de les cinco cuando entamarón a salir peroles con sopa mariscu y pote, pa seguir coles bandexes de xabali, nun pudimos con too, pero hubo sitiu pa llambionaes varies, cafes y llicores.
Ya de nueche cerrá, salimos del llocal, un final de los que creen afición, anque enantes haya que char 5 hores caleyando 16,3 km y subir 600 m pente la ñeve blanco y relluciente, pisandolo casi enantes de que pose nel suelu.

sábado, 23 de enero de 2010

23-01-2010 Cuyargayos

COBALLES-COLLAU TRAPA-CUYARGAYOS-TERRALINA-CAMPA ESTAQUES
Quedo con Victor y Josito na Pola Llaviana, tras dexar la confitería a mediu vaciar colamos a facer la ruta, na oriella'l Pantanu de Tanes en Campa Estaques dexamos un coche, nel otru subimos a Coballes (560).
Son les 10:20 cuando entamamos a caleyar pel condenau pueblu ensin fin, llegamos a lo cimero ya cansaos y sudando y eso que fai frío y el sol nun asoma per nengún rincón.
Una paradina pa secar el sudor de la frente y facer dalguna semeya, una vez recobráu'l resuellu vamos dexando atrás La Teyera, El Cabañón, La Pandiella (860) col pueblu de Buspriz xusto debaxo.
Dalgún bromista, supongo que'l ayuntamientu, punxo bancos por tol camín, d'esos qu'hay pelos parques, nun nos vaga da-yos usú, igual ponen un colexu elletoral per estes altures, de xuru que ganen... unes osties.
Algamamos el Colláu La Trapa (1006) coronáu cola afayaiza área recreativa, les vistes maravielloses, col aire que corre el que paren les mosques na tortiella veolo díficil.
L'envís del día vese bien llueñe...asina que metémonos na biesca, nun viendolú igual nun pensamos lo muncho que nos queá entovía. Nun ye d'ayuda el que temos perdiendo altura.
Chapotiando ente'l barru llegamos a Fresneu (935), el que trazó esti camín daprendio bien eso de "la llínea reuta ye'l camín más curtíu" ¡la madre que lu pario!
Na Cuesta de les Gavilanceres escapásenos Josito, nun hay fuercíes ni pa insultalu, y nun poemos sentanos qu'el suelu tá cubiertu de ñeve.
Llegaos al Mayáu Gallera (1100) vamos a pola imprescindible ración d'argomes, esta vegada bien camuflaes ente la ñeve, pero rasquen igual.
Abresennos los horizontes a les tierres de Sobrescobiu y a un mundu de cumales con el Retriñon en primer terminu, y los pantanos de Tanes y Rusecu que dende equí poemos llenalos a escupitaxos.
Dende'l Colláu Mezquita (1288) solo nos quea alcontriar la manera de ponenos na pica, un primer vistazu pela drecha y colamos pala manzorga, ta resbalioso asina que chando les manes a tolos sitios posibles vamos esguilando hasta lo cimero del Cuyargayos (1393).
Ye la una y media y la borrina paez querer danos un abrazu, tiramonos escontra d'ella.
Seliquinamente, nun resbaliando más que lo imprescindible y enterrandose na nieve más de lo necesario llegamos a la Collá Bimblenes (1200), frente a nos paez que ta diciendonos algo el picu Terralina (1302).
Taba pidíendonos pan, sentámonos a xintar, la chaqueta perriba los hombros y tras da-y la vuelta a la mochila el pan que nun apaecía, un primer intentu de llamar al 112, alcordíeme a tiempu, igual dicen que ye una imprudencia y quieren cobrame.
Baxamos casi en llínea reuta, pa finar xirando a la drecha buscando el camín, vistu el trabayu que nos costó meyor hubierámos seguio cola llínea reuta, como fixo Josito.
Ya tamos nel camín, enseguía se camuda en bona pista entovía n'obres, algamamos Valderosa (685) y pol duru asfaltu ya sube el golor de la cerveza.
Llegamos a la Campa Estaques (493) col pueblu de Tañes na oriella d'enfrente.
Agora m'alcuerdo del pan, descansando nel asientu delanteru, que comodón... polo menos no coló pal chigre.
Camudámonos, nun taba'l día pa dase un bañu, subimos a Coballes a pol otru coche y de vuelta paramos en Rusecu a refrescar les idees... y el gargüelu.
Y pa casa a estudiar la ruta del domingu venideru.
Asina como en broma ficimos 15,5 km. y 1060 m. de desnivel en 6 hores.

miércoles, 20 de enero de 2010

20-01-2010 Curul.lu

YANOS DE SOMERON-VEGECHINA-CURUL.LU-ERIES-CAMPOMANES
En Mieres xuntámonos Eduardo, Emilio, Alberto, Riestra, Bernado, Juan Carlos y el qu'esto discurre...
Dempués de mercar el pan colamos pa Yanos de Somerón (856) 1º escasu marca'l termómetru, anque paez que quier salir lorenzu.
Nun vimos ningún arbeyu.
Vamos camín alantre, entrugamos-y a una paisana, va tar mal esi camín pa tornar responde, igual no tornamos... per esi sitiu.
Nes Cheres de Vil.lar decidimos visitar Santa Marina (750), soleyandose alcontríamos a los tres habitantes del llugar, tras una bona parolada colamos pel mismu camín que nos traxó.
Cuesta riba entama a cayer el sudor. Seguimos el camín sin dexar de güeyar la carretera y la vía del tren camín al Puertu Payares.
Pasamos per Buzán (1050) y algamamos Vegechina, agora tira l'aire fríu, queamos conxelaos, como les vies de comunicación d'esti pais, tamos güeyando l'autopista del Güerna y les obres del ave, que como nun eche a correr... tamién vemos coses menos estresantes, más interesantes como Les Ubiñes y L'Aramu.
Xiramos a la drecha, ensin dexar de pisar el gasoductu Lleón-Xixón, como presta, nun vamos dexar de pisalu nun buen ratu.
Vamos algamando cumales casi ensin querer, crestíando de cumal en cumal pasamos per L.landelagachina (1360) Busquemaos (1334), Estaques (1330), L'Altu del Carril (1344), Les Falles (1333), el Puertu del Troncu (1214).
Agora bien un bon repechu, pa llegar resoplíando al Picu Curul.lu (1317), son les 14:30, unos momentinos de reposu, el cielu ta poniendose murniu.
Baxamos del picu buscando un sitiu afayaizu pa ponese a xintar, facemoslo nel Monte Bermexu (1158).
Ya camudamos el plan, alcordíamonos del matinal conseyu de la paisana en Yanos, seguimos darréu fasta Campomanes, ya veremos la manera de volver a polos coches.
Nel pueblu de Eries (550) damos cuna bona fonte pa refrescar el gargüelu y dar la llingua colos paisanos del llugar.
Agora seguimos un de los tantos caminos que van pa Santiago, llegamos a Campomanes (370) son les 16:45, atopamos más polvo y barro que nel restu de la xornada, nun se puen facer tantes obres duna vegada.
Llavamonos bonamente na fonte'l pueblu.
Llamamos un taxi, tenemos qu'esperar que fine de dexar a los escolines en casa, aprovechamos la espera pa metenos nun chigre.
Una bona cazaora disfrazada de taxista desplumonos 19 euros por apenes 10 km.
Caleyando fuerón 18 km. en 6,45 hores y un desnivel de 946 m.

lunes, 4 de enero de 2010

cundisemeyes.blogspot.com

cola llabor fecha, puestu al día esti blogue, dicir a la llegión de seguiores que tengo, los tres o cuatro, que voy intentar poner al día esti otru blogue coles escursiones atrasaes.
y contesta-y a dalgún anonimu, non, yo nun tuve na torre santa...entovía.
bueno pues ya sabeis onde aburrivos otro poco.

04-01-2010 Munegru

PUENTE PORNACEU-BUSTARIEGA-MUNEGRU-NENA-PRUNACEU-PUENTE PORNACEU
Güei colamos pa tierres belmontines, vamos dir en busca duna paisana que vive sola, en metá la biesca.
El puntu d'encuentru colos de Xixón ye'l casinu de Cornellana, vamos xuganos los cafés...
Tras mercar el pan colamos carretera de Somiedu, en pasando Agüera dexamos los coches a la vera de lo que resultó ser el Mataderu Comarcal.
El termómetru marca 2º, son les 1o:00 cuando pol Puente Pornaceu (344) crucíamos el Ríu Pigüeña, enseguía llegamos a unes mines abandonaes (560), pasando enantes pela Cotariecha y el Couz del Piqueru (400).
La pista fina bruscamente na Zorera (660), tres cases, una panera y cuatro praos casi engullios pela biesca ye onde vive esta paisanina.
Güei nun tá, anque la casa notase que ta habitada y nun ye pola antena parabólica que-y puso el Sr. Alcalde, a ver si güeyando la vida de los famosos alloria y fina baxando a la civilización.
Seguimos darréu col nuesu vagar, crucíamos un ríu que baxa con muncha fuercía y seguimos pente la biesca apartando los artos del camín.
Llegamos a La Bustariega (1000) güapu, soleyeru y afayaizu pueblu somedanu, chamos un buen ratu retratiando'l llugar... y picando algo a la solombra nel adriu de la ilesia de Sta. Barbara.
Seguimos pela pista p'arriba hasta fartanos, camudamosla pel terrén rozáu pala antenona que corona l'envís del día. Algamamos el picu Munegru (1483) hay qu'abrigase, les vistes anque nun sean del too nidies compensen l'esfuerzu.
Pel mismu sitiu baxamos, poco enantes de llegar a La Bustariega tiramos a la drecha, en direición al Colláu Piniellu (1190) pa finar nel Picu La Nena (1247).
Nel Colláu Cuerragu (1204) sentamonos a xintar, casi quedamos como estatues de xelu, y no pol fríu de la botella de champán, que se combatio col turrón y el café y el té qu'amburaben.
Chamos a andar tapaos hasta les oreyes, el terrén resbaliosu y la borrina que trataba d'atayanos fizonos entrar en calor.
Nel Colláu Prunaceu (994), saltamos la sebe, a dures penes caltiense en pie, y práu embaxo con procuru de nun echar a rodar llegamos a la portiella, entovía con fuercíes pa saltala.
Más a gates que de pie, vamos pelo qu'en otru tiempu fue bon camín, agora nel suelu hay barro y piedres y a l'altura de los güevos lleguen les rames de los árboles.
Llegamos a Prunaceu (640), una casa que-y sobra el casi pa tar en ruines fizonos de museu etnográficu, la cama a mediu facer, la cocina con tolos cachivaches, un molin... La casa, el llugar... meyor nun pensar como se vivía aquí nun fai tantu tiempu.
Seguimos pel camín apartando les rames, meyor dicir los árboles, cola cabeza, a l'altura del Couz del Piqueru algamamos la pista desta mañana.
Llavamos les botes nel riachuelu y seguimos pela pista hasta cruciar el Ríu Pigüeña y dar de bruces col coche...
Apenes son les 17.30, en 7 hores dionos tiempu a subir 1324 m. y recorrer 14 km.