miércoles, 23 de septiembre de 2009

23-09-2009 Gamoniteiru

LLAMO-MINES RIOSECU-XISTRAS-GAMONITEIRU-XISTRAS
Llegamos Bernardo y Yo a Riosa onde tan Emilio y Riestra, tras del cafetín de rigor colamos d'excursión en busca'l pan. Estes selmanes toi yo de tesoreru mentanto Juan Carlos anda caleyando pol Perú.
Xuntos nel coche de Emilio seguimos la costume, ni rara, ni fea, ni mala, ni bona, solo costume de llegar en coche hasta onde fina'l asfaltu, nesta ocasión Llamo.
Dexamos el coche a la entra'l pueblu, xunto al llavaderu, el cielu azul, la temperatura agradable, entamamos la marcha, tamos a 500 m. sobre el nivel del mar, son les 9.50... esto paez del serviciu telegráficu.
Caleyamos ente la biesca recoxendo y rucando ablanes, yo prefiero les mores, darréu llegamos a les mines de Riosecu (600) 120000 euros reza el cartel que gasto dalguna administración solo nos terrens pa facer otru museu, más lo que gasten nel teleféricu, autopista o lo que diantre faigan p'averar los turistes hasta esti llugar.
Un poco más arriba les bocamines de Texeu (800) cobre que dicen, ya explotaben los romanos.
Tan pesllaes con vagonetes atravesaes, pero lo que rialmente no nos dexa entrar ye'l entierrase hasta les rodielles nel barrizal.
Seguimos monte arriba, otres poques de bocamines (900) y metemonos na biesca (950) hasta que la biesca y la razón diz basta, ni los xabalis furen por estos matorrales, asina que media vuelta y a buscar otra manera d'algamar el nuesu oxetivu, que por otru lláu nun ta muy definiu.
Seguimos darréu p'arriba casi en llínea reuta, hasta que la mesma montaña nos echa pala drecha, caleyamos bordiando la biesca por un senderu bien marcáu hasta dar vista a la zona de Quirós.
Tomamos asientu nun cumal (1632) ensin nome na mayoría los mapas, tamos encima del llagu y la vega Llazarandín, vemos el valle d'Ayer cerráu pol picu Torres, el de Turón pol picu Polio, Uvieu, Siero, Llangreo, Llanera...
Si dende media Asturies se güeya'l Gamoniteiru dende'l Gamoniteiru güeyase más de media Asturies... pero entovía tamos de camín.
Miramos la hora, el Gamoniteiru ta entovía lexos pero danos tiempu, Bernardo ya ta a mediu camín del Xistras asina que pal Xistras (1766) nos diriximos.
La última vegada que tuvimos nesti cumal chonos p'abaxo la ñeve que taba cayendo, güei tomamos la revancha, deleitamonos coles vistes un poco deterioraes pola calima.
Un últimu arreón hasta'l Gamoniteiru.
Bordíamos la valla ente escombros, fierros y otros desperdicios, vergoña d'alministración ¿nun ye esti un edificiu públicu? ¿nun debiera dar exemplu? onde andará'l Seprona.
Finamos baxo la cruz del Gamoniteiru (1791), mentres facemos unes semeyes llega un ganaderu, modernos tiempos, baxase del coche cola macarena sonando a to trapu y armáu d'antigüeyos vixila'l ganao.
Nos colamos a xintar, son casi les 4, baxamos ensin ascensor 230m. hasta'l Llagu la Cueva (1560) buscando la fuente, camudaronla de sitiu nun ye broma, sentaos na solombra damos bona cuenta deles viandes que portamos. Recibimos la visita dunes vaques, solo yos dimos pan, el xamón ni hablar, esperiencies anteriores dierón col mal conociu como deles vaques lloques, nun acetamos responsabilidad nenguna si surxen nuevos casos.
Col bandullu llenu entovía toca remontar hasta los picachos (1682) que rodíen el llagu Llazarandín.
Agora toca desandar lo ya caleyao, baxamos pol mismu camín (ficimoslu al subir) hasta dar colos güesos en Llamo, son les 19.25, los paisanos dannos palique mentanto nos camudamos faciendu un buen e intensivu usu del llavaderu del llugar.
Finamos esta xornada; 13,7 km. 1433 m. d'ascensión y 9 hores y media caleyando, nel mesmu llugar que la entamamos, ¡nel chigre! al lláu dela ilesia, pero nun discurrais que nun acertais ni fartos de... allí taba aparcáu'l mio coche, y esi fue'l motivu, na que ver cola cerveza fría que nos espurrio la chigrera.

domingo, 20 de septiembre de 2009

20-09-2009 Tresconceyos

PENDILLA D'ARBAS-COLLA PROPINDE-TRESCONCEYOS-PENDILLA D'ARBAS
¡Dixete un pinchu! ¡y esto que ye o! ¿un bocadillu? Cagunmimantu y estos son los otros tres, que burros son, media vaca en ca pinchu.
Asina comencipíamos esta aventura, bueno yo con dos cafetinos, delos de tola vida, tamañu estandar.
Escaecíaseme, tamos en Villamanín Jorge, Victor, Josito y Yo.
Tras del primer considerable esfuerzu, acabar col pinchu enantes que cayerá la nueche, tornamos a Tonin pa dexar un coche y colar a entamar la ruta en Pendilla d'Arbás (1340).
El día diba tornandose en película de mieu, el cielu del azul al gris oscuru, dos pelleyos dalgún bichu ensin entificar colgaos na oriella la carretera, una riestra mastines rodiando'l coche... ¿quien se baxa'l primeru?
El sol va alexandose, fai frío, paez que va llover... entamar la marcha y sacar los paragües ye lo mesmo. Tamos caleyando pola afama "Via Carisa" delos romanos, si esos que según el día, o non dexamos que pisarán esta tierra o ficierón con nos lo que yos dio la gana, paecío a lo que nos faen los políticos güei en día. La diferencia, pequena eso si, lo que facíen perdura polos sieglos delos sieglos.
Emulando a los romanos, hasta'l edificiu Vacas (1350) llegó un Clio, aquí ta, fechu'n montón de chatarra, el edificiu y la fuente desproporcionaos y tamíen esaxeraos, asina como'l puente de travieses que non ye necesariu emplegar.
Seguimos pola "Via" abriendo y cerrando los paragües, a dicir verdá solo yo fui'l pesimista que discurrio que podía llover.
Llegamos a la Col.la Propinde (1600) el día torcíu del to, ya non atisbamos na.
Por mor delos escayos y los panatalones curtíos vamos reblincando d'Asturies a Lleón y viceversa saltando les estaques que delimiten estos territorios.
Ya vamos bien moyaos, agradiecense los arándanos anque empapiceme con dalgún.
Película de terror, surxen voces ente la borrina, adelantamos a un bulliciosu grupu montañeros, nel cumal del Tresconceyos (2011) falamos placidamente con ellos, son de L.Laciana, llueve, tamos aterecios de frío, seguimos falando, marchen, seguimos dudíando, teníemos el plan d'algamar 8 dosmiles, tar moyaos, aterecios y non güeyar ni los pies...dexamos los 7 restantes pa otra vegada.
Baxamos volviendo la tiesta y reblincando de vez en cuando, na ni escampla, nin ye posible evitar tolos escayos.
Arrivamos a Pendilla, la xente y los mastines tan na cai, ni unos ni otros nos faen casu, ya dexo de llover anque apenes s'atisba na.
Vamos hasta Tonin en busca del otru coche por dos motivos principales; unu porque yera'l miu y otru porque teníemos la ropa pa camudanos nél.
Camudamos nos soportales dela ilesia, son les 14.30, caleyamos 11,4 km y un desnivel de 660 m. en 4 hores.
Anque güei non ficiera muncha falta paramos en Campomanes a refrescar el gargüelu.

domingo, 13 de septiembre de 2009

13-09-2009 Ruta Les Fuentes

MURIAS-MOREA D'AYER (Ruta deles Fuentes)
Quedo en Morea d'Ayer con Victor, Ana, Josito, Maite y los meniskinos Sergio, Alvaro y Cris, son les 10.30 y caleyamos baxo'l calor del sol en busca d'un buen café y unos bonos pinchos, conel bandullu llenu camudamos el plan, produzse un hechu qu'entrara nos llibros d'hestoria, tras llargos años de llucha vamos facer una ruta toa cuesta p'abaxo.
Volvíamos a lo fecho, tras dexar el coche lo más pegau posible al final previstu, colamos nos otros coches hasta Murias (600) metros d'altitud, dizlo el cartelu qu'el ayuntamientu puso en tolos sos pueblos, pero señores, el tamañu, el color, el diseñu... de xuru que ye facilmente meyoratible.
El sol aprieta, paez un día de branu, delos bonos, pensandolo meyor ye que tamos en branu.
Son les 12.00, aprovisionamonos bien d'agua y caleyamos hasta lo cimero'l pueblu, salimos pola manzorga, enantes parome a falar con mi tía.
Atopamos la segunda fuente, la primera fue dientro'l pueblu, echa agua abondo, esti añu naide pue quexase de sequía, hasta'l Uvieu subio de categoría.
Esta afayaiza ruta discurre por metá dela fastera, lo más del tiempu na solombra dela biesca ente ablanos, carrascos, robles y castañales ensin escaecenos delos prestosos artos, cuando salimos de la solombra el sol quier quemanos, arráncanos ensin esfuerzu goterones de sudor y alguna pallabrona.
Anque sea cuesta p'abaxo hay más dun repechu que los meniskinos aprovechen pa dexanos atrás.
Atrías vamos dexando caserios abandonaos, señal deque non fai munchos años, 30, 40 a lo más había xente (muncha) que subsistía como na edá media, ensin lletricida, ensin agua na casa, que fuera caliente..., ensin televisión... los probes son felices hasta que entamen a ver la tele... cualquier día pongome a filosofar.
Tamién encontríamos pueblos coles cases arreglaes.
Sentamonos a xintar unes caxigalines y a llubricar los gargüelos que güei tan trabayando a tope.
Seguimos ente carreres detrás y dielantre delos meniskinos, ya pasamos por Arnizo, L'omeal y Los Corros, nel Cabanón nuna bona solombra baxo una bona castañal sentamonos a xintar.
Seguimos caleyando, tanto subir y baxar fainos paecer gallegos, ya nun sabemos si vamos o venimos. Allegamonos al caseriu d'Eros, dudíamos en más duna ocasión na interpretación deles señales, tamos faciendo la ruta nel otru sentíu, non ye fácil ser gallegu.
Baxamos hasta Güertomuru por una empina rampa conel frenu de pie puestu, arrastrando los pies que hay que explicavoslo to.
Una paisana fala delo guapo dela zona, paez d'allí, asentimos pero dicimos-i que invite a los politicos a caleyar la ruta pa qu'aparten dalgún artu coles patuques.
Una llosa protexe del sol y del agua al que use el llavaderu, de xuru que Gabino anduvo por aquí y asina discurrio la llosona d'Uvieu.
Llegamos a San Miguel, a la vera'l ríu Nigru, pasamos pola Conforcada y tras xiringanos un poco nel puente colgante, pal disfrute delos rapacinos y el tembleque d'algun mayor finamos a les 16.45 en Morea ((300).
Mentanto les muyeres y los nenos tomen sitiu nuna terraza los paisanos ¿ye esto discriminación por razón de sexo? como siempre fue asina ya forma parte del drechu consuetudinariu. Dicía que tornamos a Murias en coche a polos coches.
Camudamonos y chamos unos tragos d'agua en Murias y... reunión urxente na terraza del chigre pa pone-i el puntu reondu al día viendo ganar al Sporting.
11 km. en 5 hores y un desnivel de 275 m. en ascensu.
¡Menos mal que yera p'abaxo!

viernes, 11 de septiembre de 2009

11-09-2009 Mancondiu

JITU ESCARANDI-CASETON D'ANDARA-SAMELAR-SAN CARLOS-MANCONDIU-JITU ESCARANDI
Güei pasa Bernardo a buscame, son les 7.20 cuando salimos direición Villaviciosa, Emilio y Riestra ya tan col segundu café, pasamos por Sotres alantre hasta'l Jitu Escarandi (1300) onde dexamos el coche.
El sábadu pasáu nun había sitiu nel aparcamientu, nun toi ni siquiera insinuando una ampliación, güei acompañanos un solitariu vehículu de parques nacionales.
Nun hay borrina, güeyamonos los pies, ta despexá y fresca la mañana, son les 10.00 cuando entamanos a caleyar pista p'arriba. Enseguía empieza a sobrar ropa, nel Casetón d'Andara (1700) entrugamos-i a, resulto ser extranxeru menua puntería, Smith, sobre la utilidá del enorme bote de conserves que pendía dela puerta, salvaxe reconversión, de bote de melocotones a recoxedor de colilles, curioso cuando menos.
Seguimos p'arriba, curioso y ¡raro! ¿p'arriba? curiosa sensación. Llegamos a un colláu a 1904 m. enfrente tenemos los oxetivos del día sino hay postrera sorpresa, hay que baxar un buen trechu pa finar subiendo'l doble ¿a naide se-i ocurrio facer un puente?
Baxamos hasta les Vegues d'Andara (1800), de camín topámonos cola fuente dela Escalera (2000), enllenamos les cantimplores y coxemos fuercíes pa alcanzar a los d'alantre que esperen nel Colláu San Carlos (2052).
Reunión téunica ente atronaores resoplios, el día fai que les vistes sean más maravielloses entovía.
Pa la manzorga, primero atalayamos el Picu Samelar (2229),engarríamonos cola brisa, aguantamos ensin poner la chaqueta, solo por cabezonería, facemos abondo semeyes, el Crimienda, Tresviso, Bejes, la Cerralosa, vamos torciendo'l pescuezu a la drecha par ver Potes, La Rasa, el Caballo Cimeru, el Jierru, si non moviste los pies y entovía non te desnucaste pues completar el xiru viendo a lo lexos ente otros el Cabezu Llerosos.
Baxamos del cumal dexando atrás la fría brisa, por dicilo con cariño, crucíamonos con dos montañeros, pasamos como fleches pol colláu San Carlos coxendo impulsu pa empicotanos nel picu San Carlos (2211) tamién nomáu Sagrado Corazón.
Tras les semeyes de costume, aquí el santu paecía protexenos dela brisa, baxamos hasta la Vega del Hoyo Oscuro (1900) ¿ya dixe que facía calor? y cerrar el circulu nes Vegues d'Andara.
Agora bien la sorpresa, to'l día güeyandolu, desde abaxo, por'riba, polos cuatro costaos, ye temprano -mentira- fai buen día -verdá- ¿Y si xintamos arriba? de xuru que ni les mosques nos estorben.
Mancondiu, ya vamos. Na collá Trasmancondiu (1850) frotamonos los güeyos, un perru que diba a hombros, coña cola vida de perros, a tomar pol culu'l tópicu.
Esto ya ye esguilar, pies y manes a plenu rendimientu, ensín descansu hasta la cume. Tamos nel Mancondiu (1999) nel buzón ta escrito "tas más cerca del cielu" to ye relativo, agora tamos más cerca del suelu que fai un puquitín.
Les vistes acongoxantes, vense tolos pasos que dimos güei... y los que entovía nos queen por dar.
Crestíamos hasta la otra picorota (1994) y sentamonos un poco más abaxo, al resguardu dela brisa, son les 16.00 bona hora pa xintar, facemoslo selemente gueyando les cumes d'alredor como si tuvieramos nel sofá viendo la televisión.
No más interesante corten palos anuncios, bien la borrina a sacanos dela quietu y la placidez, ta rodiandonos, asina que recoyemos y tiramos fastera abaxo.
Nun momentu, como si nos tirarán una sabanona encima, nun vemos na, crucíamos la pista (1650) y quitase como por arte de maxia la sabanona d'enriba.
Campu a traviés llegamos a la Canal dela Jazuca p'algamar la pista pol mayáu del mismu nome, crucíandonos colos montañeros dela mañana.
Llegamos al Jitu Escarandi a les 17.45, lo que fai un total de 7 hores y 45 minutos dando-i a los pies pa facer 15,2 km. y 1371 m. de desnivel.
En Sotres facemos una escala teúnica pa reponer llíquidos y falar colos omnipresentes montañeros, que resultarón ser vascos y que dexarón el Mancondiu pa mexor ocasión.