06-12-2009 Airua Naval

BERMIEGU-AIRUA NAVAL-TENE-LES AGÜERES

A les 9 y picu lleguen a Proaza Carlos, Mª Luz, Queco y Victor, entovía más tarde entren pela puerta Victor I, Montse, Ana P y Toño, ya fai tiempu que trasegué'l café.

Nes Agüeres dexo'l coche, vamos hasta Bermiegu (864), son les 10.35 cuando entamamos a caleyar atraviesando'l pueblu, cayen unes gotuques, la temperatura fresca y el día gris nun presagien na bono.

Tras una bona ración de semeyes ente otres coses al reboyu y al texu, monumentos naturales, llegamos a Llano, ya col paragües abiertu, la meyor solución pal agua, nel monte y na ciudad.

Seguimos darréu pela bona pista, tan bona que nos atalanta un coche, normalín de los d'andar per casa. Pese al tiempu, malu, y a la temperatura, fría, seguimos ganando altura, pasamos per Cuetu (895), La Llinariega (1076) y Bramonte (980).

Agora toca ponese a esguilar, de frente un murallón petreu y a la espalda otru entovía mayor, les estribaciones de la Sierra L'Aramu.
Algamamos La Xanzana (1187) y poco más arriba llegamos al Colláu Les Piedres (1347).

Tras una pausina comprobando que tabemos toos igual de moyaos seguimos esguilando, llegamos a la picota del Airúa Naval (1413), unes poques de semeyes, comprobar que la borrina taba bien asitiá y el paragües seguía abiertu, dalguna vegada del revés gracies al xuguetón aire, que pa más coxones tiraba bien fríu.

Entrevemos L'Aramu pela espalda y de frente apenes atisbamos la Sierra Caranga, ente un mar, meyor dicho un oceanu de ñubes nel que tenemos sumerxía la cabezona.

Colamos pa baxo de bona gana, van calentando les manes y dalguna culera s'atopa col barru. Pasamos pela Braña de Tene (1050) y ya pol empedráu camín con sumu cuidadín llegamos a Tene (640) son les 14:00.

Tene nun ye que sea Madrid pero perdimonos, podemos cha-y la culpa a la borrina, pero sería una inxusticia y no ta la xusticia como para...
Asina que seguía lloviendo, y Carlos y Yo dando vueltes pela carretera, na, ni rastru, tiramos carretera abaxo, ensin cobertura... nin llegal nin de telefónica.

N'Aciera (430) enterámonos, quedaronse rezando a San Lorenzu, nun yos fizo na de casu, pero pusieronse a xintar al abellugu'l templu. Nos atopamos un portalín más pequenu que'l de Belén, nun da ni pa güarecenos del too.

Allí nos topen xintando, moyáos como paxarines. Vamos pela carretera ensin mirar p'atrás, llueve con fuercía, muncha más de la necesaria, llegamos al coche, extratexicamente aparcáu a la vera la ilesia de Les Agüeres (360).

Camúdome y sécome, bueno fue al revés, y vamos a buscar los coches a Bermiegu, agora tocame a mi esperar mentanto se camuden los demás. Tiramos pa Proaza onde güei más que nunca apetez un cafetón bien caliente.13.5 km. y 800 m. desnivel p'arriba fue lo que ficimos en 6 hores.

04-12-2009 Penouta

BUAL-PICU COTO-PICU PENOUTA-PICU ALTU-PICU XUGOS-BUAL

Tras recorrer medio Asturies recoxendo xente, llego a Navia con Josito, Riestra y Paco; Bernardo y Juan Carlos ya tan acabando'l café. Colamos hasta Bual (450) onde nos posamos de los coches.

Tras mercar el pan entamamos a caleyar, son les 10.30 d'un día fríu y gris, los escasos 8º faen que'l sudor sea escasu que non nulu.
Llegamos a Pilella onde nos manden pa otru sitiu, nun dibemos mal pero coses de la vida, necesitabemos la referencia del cementeriu.

Seguimos p'arriba hasta algamar la carretera nel Altu de Penouta (790) colamos pala manzorga per deliantre l'area recreativa de Peña Queimada hasta coronar el picu del mismu nome, tamién conocíu como Picu Coto (926)

Ni parase, tira l'aire y fai un frío que pela, volvemos a L'Altu Penouta y enfilamos los molinos de vientu que hay camín del picu. Por cierto, vaya ruíu que meten, al impáutu visual hay que suma-y la contaminación acústica.

Llegamos al Picu Penouta (901), bon llugar pa da-y una bona güeyada a la costa astur-gallega, dende la Estaca de Bares hasta L.luarca o más...

Baxamos rodiando l'antenona de televisión, seguimos pola cumbrera, tras pasar pela Pena del Alba (823) facemos una bona ración de semeyes nel Picu Altu (834) tamién nomáu Picu Lebredo.

Dudíamos si dir, les hores van pasando, al Penedo Aballón, una piedra famosa porque se mueve, o baxar direutos hasta la ermita... decidío, primero uno dempués l'otro.

Baxamos campu travíes, la fastera ye un inmensu barrizal, sal agua de tolos llaos, colos pantalones puercos de barro hasta les rodielles llegamos a la piedra (800), el inxeniu de la ñatura ta esgonciau nel suelu.

Baxamos per una pista pel mediu'l pinar, damos de frente cola Ermita de San Isidru (700), son les 15.30, hora de xintar, l'aire fríu y cabrón de tol día nun respeta nin siquiera los llugares sagraos.

Va danos tiempu a to. Algamamos el siguiente oxetivu, la Pena Xugos (809) güeyaes al mar y a la montaña, son les 16.00 Bual vese muy lexos, ¿per onde baxamos agora?

Por no volver 100 m. p'atrás... pasamos por As Penas da Bobia y As Llamiceiras coxendo la ración, bona ración de cotoyes del día hasta algamar la carretera en Santaulaya (454) pasamos per A Cruz, nun sube-baxa finamos no fondero de Bual.

Toca atravesar el pueblu d'abaxo p'arriba, los últimos repechos son siempre los peores.
Llegamos a la vera los coches, son les 17.50, ta escureciendo... 7 hores y 20 minutos, 25,5 km. y 962 m. de desnivel a una velocida media de 3 km/hora.

El frío fai que nos camudemos con priesa, dir a mercar miel, tomar daqué nun chigre y regresar a casa, queén 150 km. en coche.

Y a polos callos, güei toca nueche gastronómica colos collacios en Noreña.

25-11-2009 Ablaniegu

RECHANOS-L'ABLANIEGU-LA CEBEDAL-YERBO-NAVELGAS

Vemonos en Cornellana, pa tomar el café y mercar el pan, de Xixón vienen Emilio y Riestra, pola capital xugamos Juan Carlos, Bernardo y Yo.
Llegamos a Rechanos (325) alloriaos de tantes curves, son apenes 100 km. pero tardamos guapamente dos hores.

Dexamos los coches a la vera la ilesia, recibennos con agua, no ye que nos bendigan, llevaben pregonandolo tola selmana los homes del tiempu.

Son les 10.20 cuando pertrechaos con chubasqueros y paragües entamamos a caleyar, vamos carretera p'arriba, l'agua caí ca vez con más fuercía, ya teníemos olvidá esa grata sensación de les oreyes y les manes entumecíes pol fríu.

Poco enantes (640) de llegar a Zreizal coxemos una pista a la manzorga, paramos na Chana d'Urdial (900), ente la borrina y la que ta cayendo apenes nos distinguimos.
Decidimos subir al picu y baxar pal chigre lo más rápidamente posible.

Algamamos el cumal de L'Ablaniegu (1075), tamos un buen ratu, xintamos dalguna llambioná y sacamos dalguna semeya baxo'l paragües, ya se echen de menos el gorru y los guantes.
Les vistes ablucantes, con dificultá güeyamonos los pies.

Baxamos del picu en direición a los Picaratinos, algo va mal, güeyamos el GPS y diznos que vamos mal... na seguimos, allá alantre torcemos y tiramos pa baxo pela fastera d'enfrente.

Llegamos a Urdial (560) y poco más abaxo ente tonelaes de plástico qu'hasta deben semblar, la caleya ye un auténticu basureru, tamos en La Cebedal (520).
Nun tendexón ponemonos a secar, aprobechamos pa xintar y tentar la bota vino.

En media hora tamos nel coche, entrugamos-y a un lugareñu pol meyor camín, la carretera contesta, tais a 30 km. meyor dais la vuelta pol monte.
Baxamos pa otru valle, maldita sea.
Los díes son curtíos y nel monte sigue la borrina, asina que resignación y asfaltu asgaya.

Nun dexa de llover, pasamos pela Faxera (647) la Rebuchosa (585) y llegamos a Calea d'Arriba (500) onde dexamos el asfaltu por un ratu y paez que dexa de llover.
Baxamos pol camín vieyu hasta Yerbo (300) y atayamos -dicennos- 8 km d'asfaltu.

Volvemos al queríu asfaltu p'algamar Santulaya de Miño y baxar a Navelgas (200) ya casi de nueche, son les 17.50.

El boticariu llamonos al taxista del pueblu, esperamos mentanto él se dedica a poner los ornamentos navideños.
El taxista llevanos hasta Rechanos, 8 km. que diben a facese muy llargos.

Camudamonos nos soportales de la ilesia, cola ayuda de los frontales y la priesa que mete la xelá que taba cayendo.
Ensin contar con esos 8 km. en coche caleyamos 28, un desnivel de 1070 m. y 7 hores y media con fríu bastante y agua abondo.

En Navelgas paramos, hoy camudamos la cerveza por un cafe calentín y colamos pa casina, entovía queen dos hores de coche.

17-11-2009 Foces del Esva

SAN PEDRO DE PAREDES-ADRAU-PICU ESPINA-ADRAU-FOCES DEL ESVA-BUSTIELLU-SAN PEDRO DE PAREDES

Bernardo y Juan Carlos pasen a buscame y colamos pa Xixón a recoxer al guía, ya con Riestra nel coche colamos pa L.luarca, n'Aviles la autopista ta cortá, la primera impresión... una barricada, pues no, resulto ser un accidente muy aparatosu, con coches ardiendo y to.

En Trevías tomamos un café, mercamos el pan y xintamos unos bollinos de chorizu.
Nun ampliu aparcamientu privau de San Pedro de Paredes (100) dexamos el vehículo.

Comencipíamos a caleyar a les 10.25, el día ta frescu y soleáu pese a toes les previsiones metereolóxiques que daben agua a retorcer. Baxamos hasta'l ríu Esva, crucíalu y entamar a ganar altura a costa duna bona sudá ye lo que paso.

Un paisanu entruganos pol nuestru rumbu, alviertenos de lo muncho y pindio que nos queá por recorrer.
Ni el paisanu nos fizó entrar en razón ni nosotros convencimos al perrín que se nos xuntó de que retornara'l pueblu.

Llegamos al Mayáu Adráu (580) en poco más duna hora. Crucíamos la carretera y empobinamonos pal Picu Espina (793) paramos a platicar un ratín con un pastor que baxaba a caballo, tamos rodíaos d'antenes qu'estudien el tarrén pa plantar xigantes en busca de quixotes.

Algamamos la cume, un casetón enorme y dos enormes toterrens dannos la bienvenía, tan reparando la señal de TV.
Enseguía nos dexen solos, disfrutamos de la ñatura y les bones vistes, nuna sola direición choca la vista cola economía sostenible... ya lo dicíen tip y coll fai años, la próxima selmana falaremos de los poderes.

Cola chaqueta puesta xintamos daqué de fruta y chamos un tragín d'agua, el cachorrín ya tien pinchos hasta nes oreyes nun atopa onde poner les pates.

Colamos pola crestería pasando polos cumales dela Pruida (747) y el Chagunalu (733), baxamos averaos a una muria lo más alexaos que poemos deles cotoyes.
El perrín diz basta, fartu de pinchase tirase nel suelu y niegase a seguir. Riestra da la vuelta a buscalu.

Col perru nuna mano y la mochila na otra lleguen a la zona llibre de cotoyes, tamos na Vachina (670), ye la hora de saltar muries, asina algamamos la carretera, reblincando polos praos volvemos a tar nel Mayáu Adráu.

Baxamos pol monte del Rellosu, poco más abaxo de la Güerta L'Ocho alcontríamos un afayaizu llugar pa sentase y ponese a xintar, son les 14.30 y tenemos debaxo'l Ríu Esva, el cachorrín tras del buen sustu que llevo tien apetitu; pan, chorizu, chocolate y col yogurt alloquez. Ya sabeis los que teneis perru, da-y yogurt líquidu... ya me contareis.

Tras recoxelo too seguimos camín, desviamonos hacía Calleras, tamos nes Foces del Esva, enllegando a la antigüa presa unes semeyes, un momentu pala contemplación y media vuelta.
La ruta ta perbien acondicioná, cuerdes clavaes na roca pa char mano,-dan más mieu que quiten- escaleres, barandilles...

De nuevu nel cruce de senderos, pasamos pol Cabanón, un buen llugar pa descansar y parase un ratu, ni paramos siquiera. Rapidamente perdemos altura metios na biesca ente ablanos, castaños, falles y dalgún coche fechu chatarra.

Vovemos a desvianos, esta vegada pa baxar hasta'l ríu y visitar la vieya Central Llétrica (100) auténticu museu arqueolóxicu-industrial casi al aire llibre, goliendo a humedá.

Poco más aliantre alcontríamonos nel pueblu de Bustiellu (140) afayaizu llugar que crucíamos pa salir pol paseu a la vera'l ríu y llegar al Sucu y a Llungrey (150) y salir a la carretera pa dar colos güesos en San Pedro xusto cuando les campanes tañen les 5.

Acicalamonos un poco na fonte'l pueblu y entregamos el cachorrín, enteru y duna pieza, refrescamos el gargüelu nel chigre falando col dueñu del local, del perru, del animal que fai que'l perru cole col primeru que pase, el güaje, nun sabe entretenese notra cosa namás que maltratando al probe animal.

Asina arrancamos pa casa, un pequeñu error del copilotu da con nosotros en Navia, na 10 o 12 km. de más.
En total caleyamos durante 6 hores y media pa facer un desnivel de 921 m. y 16,3 km.

Un día que los del Instituto Metereo-Iloxicu
daben agua abondo, solo la vimos corriendo pol ríu y polos caminos. Fizó sol y buena temperatura. Dexáronme en casa a les 19.15 ya de nueche cerrá.