27-10-2008 Peña Negra

RUTA FUENTE DE LAS OMAÑAS
MURIAS DE PAREDES-PEÑA NEGRA-PUERTU LA MADALENA-MURIAS DE PAREDES

Pasa Paco pol pueblín y vamos hasta la capital onde se xunten Juan Carlos y Bernardo, en Mieres desayunamos tranquilamente con Emilio, Riestra y Eduardo que vienen del pueblón.
Tiramos pol Güerna hasta la Madalena onde mercamos pan y vino.

En Murias de Paredes (1255) al lláu dela ilesia sobre una alfombra de fueyes decoloríes, que non seques dexamos los coches.
Posasé del coche y ponese a orbayar ye to lo mesmo.

Son les 10.15 cuando salimos carretera alantre sacando-y to'l xugu al chubasqueru y al paragües.

En Montrondo xusto onde tirarón la última palá d'alquitran falamos cunos paisanos, xusto onde comencipía a empinase'l camín.

El camín ye anchu y de buen pisu, sal agua por toles esquines, la ruta ta bien nomá, Ruta deles Fuentes, fuentes hailes por tolos llaos.

El coloríu dela biesca recompensa bonamente el esfuerzu, llegamos a un colláu ensin retornu, no ye la expresión correuta, pero tampoco me dedico a la lliteratura.

La borrina dexanos ver el más grande rebañu de burros -de cuatro pates- qu'enxamás güeye, tenesmolos al pie, tan educaos, estos polo menos no rebuznen. Tamos na Cabaña del Mular (1600).

Retrocedemos unos metros por mor dela borrina que no delos burrinos y seguimos notra direición, continuamos pola Ruta las Fuentes que pretendíemos dexar un ratiquín.

Algamamos la cume del Miro Cutichón (1874) y tamién la de Peña Negra (1889) pa volver al camín baxando pol mismu sitiu.Xintamos seliquinamente na zona de Llanu Oscuru, xunto al manantila de las Olleras (1600) al tiempu que-y damos a la bota vino.

Cola barriga llena vense les coses d'otra manera, eso y que ye cuesta baxo. Enseguía llegamos a la carretera, a la altura'l Puertu la Madalena (1433), la ermita topamosla en ruines.

La carretera tocamosla de refilón, enseguía coxemos una pista pola drecha pa algamar comodamente Murias de Paredes.

Finamos sobre les 16.45, remollandonos na fuente'l pueblu pa camudanos y ensin atopar ningún chigre abiertu tirar carretera p'alantre hasta topar con dalgún.

Ficimos unos 20 km en 6 hores y media y un desnivel acumulau de 845 m. de subía.
Climatoloxicamente fizó de casi tó, frío, agua, ni un trocin de cielu azul... y eso que tabemos en Castiella.

03-10-2008 Xistras

MANANTIAL DE CODE-LA MATONA-PICU SANTIAGO-XISTRAS-LA MATONA-MANANTIAL DE CODE

Pasen por esti pueblu Riestra y Paco, llevolos hasta L'Ara, atechaos nel chigre tomamos café con Bernardo y Juan Carlos, tras dudíalo muncho salimos al agua, mercamos pan y subimos nos coches hasta'l Manantial de Code (565).

Na más salir los repechos son de cuidáu, les indicaciones nun ye que sean males, ye que nun existen, dempués de subir un buen cachu damos la vuelta casi hasta'l mismu llugar de partida.

Ya vamos bien encaminaos, nun ye que enllane, paez más pindio entovía. La yerba alta y el barro faen que tengamos les pates bien puerques, vamos en camiseta y sudando, amás que'l paragües tan pronto ye necesariu como ye un estorbu tan faciendo una delicia de día.

En Cuetu Vidures (900) coxemos agua, queanos un mundu por subir, a lo lexos divisase'l Monte la Matona.

Atravíesamos La Matona y damos cuna portiella, paeznos la puerta'l paraisu, incluso hay algo cuesta baxo. Tamos a 1500 m. entovía queénnos unos cientos de metros por subir.

Pasamos pol Fondu la Vega, ta cubierta por una capina blanca, pasamos a la vera'l Llagu Llazarandín y seguimos darréu hasta'l cumal del Picu Santiago (1682), ponemos el gorru pa que les oreyes nun senos conxelen.

Crestíamos un ratu, empicotase nel Xistras (1765) y entamar a ñevar como si fuera la maldición del picu, dexar la tarxeta, mexor expresao, arroxala'l buzón.Ni semeyes ni na, la borrina vien escontra nos... na Vega Llazarandín atopamos una cabana onde refuxianos, ta enllena de mierda ¡guarra ye la xente!

Tan cayendo unos bonos trapos, aprovechamos pa xintar, hay que repartir con Paco, xura y perxura que lo escaecío en casa, agora se desplica lo lixeru que subía.

Ñeva con menos fuercía, ya hay una bona capina, baxamos pol mismu sitiu y nes mesmes condiciones metereolóxiques, tan pronto llueve como allumbra'l sol. Ya va sobrando la ropa d'abrigu.

Si el senderu taba embarráu a la mañana, nun acierto a explicavos como ta agora. Baxamos chapotiando con cuidau nun dase una bona culada ¿verdá Paco?

Camudase de ropa, secase y tomar un cafetín caliente rememorando les 7 hores de caminata pa facer 1452 m. de desnivel en 19,3 km, mentanto tramamos la siguiente aventura.

03-09-2008 Corona'l Castillu

CUEVES DEL AGUA-TRESMONTE-CORONA'L CASTILLU-LA UÑA

¡Güei dibemos pa Tielve!

Pasen a recoxeme Bernardo y Juan Carlos, na Villa, entovía no son les 8, ya tan Eduardo, Alberto, Paco y Riestra col café a mediu tomar. Viendo como ta'l día ye tontería facer kilometros a lo bobo asina que kilometros p'allantré hasta Llovio.

Dexamos el coche na misma nacional, km. 330 pa crucíar el Sella pol siempre prestosu puente colgante. Güei había más agua perriba que porbaxo del puente.

Tamos en Cueves del Agua (10), hechamos-i una güeya a la Cuevona, dientro non llovía y decidimos facer la Ruta delos Molinos, asina pues colamos camín arriba colos paragües bien abiertos.

Lo mexor delos molinos son los cartelos, los molinos tan fechos una pilfraya, esgonciaos y tapaos pola vexetación, un suxétase pol cartelu de "se vende" otru, viendo los anteriores pue dicise que ta bien. Ensín llegar al extremu de formigonar pistes y caminos, facer teleféricos y tren-trans y toes eses caxigalines que venden los chinos, enantes de publicitar les coses sería bono teneles feches.

Salimos a la carretera, entrugamos-i a un paisanu, resulta ser Don Boni, solo en períodu ellectoral nos diz, solo vive él y un irlandes que fala 6 idiomes pero ni pallabra de spanish y n'asturianu atina a dicir "yes", ¿chorizu? yes, ¿sidra? ooo yeees.... lo que trai muy mosqueáu a Boni.

Gracies a les indicaciones del socarrón Boni alcontríamos el camín, si pue nomase asina, algamamos la cume del picu Hombrón (401), ya tamos arriba'l to. Pa la drecha el Sella, vamos crestiando, malo de caleyar, piedres, yerbes y agua... la del cielu dionos una tregua.

Resulto ser tregüina, agora cai con fuercía, una mano pal paragües otra pa garrrase a les piedres, la cámara fotos na mochila, dicennos que no merez la pena... pero ya que tamos subimos al últimu picu Corona'l Castillu (544), les vistes maravielloses si la borrina no les impidiera.

Toca baxar, ente felechos que nos tapen enteros y gorbizos que nos rasquen los sobacos, faise pesao, ente resbalión y resbalión llegamos a la biesca d'ablanos, castañales y carrascos, más resbaliones hasta topar cola vía del tren.

Crucíamos les vies y el Sella pol puente la Uña, abaxo munchos remeros que diben más secos que nosotros. Queennos dos kilometros pola carretera. Camudamonos y xintamos nun cobertizu de piragües. Son les tres dela tarde.

Un paisanu quier chanos les culpes de tolos males, convencemoslu de que somos buenos, ya ensin ningún cargu de conciencia vamos a Villaviciosa a tomar el café, güei apetez más un café. Caleyamos 14 km, tardamos 5 hores y media y subimos 624 m.

30-07-2008 Maciedome

PENDONES-PANDEVILLA-COLLAU LLAGU-MACIEDOME-RECUENCU-PENDONES

A les 8.00 paso por Uvieu a recoxer a Juan Carlos, Manolo y Bernardo, paramos en Rosecu, tomamos un café mentanto lleguen Alberto y Riestra.
En Campu Casu mercamos el pan, ya en Pendones (760) dexamos los coches.

Cuando entamamos a caleyar son les 9.50, la temperatura ta propicia pa facer exerciciu. Baxamos hasta'l ríu y d'aquí p'alantre to cuesta riba.

Vamos metios na biesca, la humedá fai surxir los primeros goterones de sudor. Cuando los claros del monte lo permiten güeyamos el Tiatordos, paez que nos ta vixilando.

Enseguía llegamos a La Llongar (1100), seguimos darreu hasta'l colláu Pandevilla (1360) afayaizu llugar pa recobrar el resuellu sobre la tupía campera.

El sol calienta perbién, agradiezse el volver metese na solombra la biesca, seguimos camín del sol, llegamos al Colláu Llagu (1534), hay abondo cabanes esfarrapaes pola verde campera.

Tamos xusto debaxo'l picu, Juan Carlos y Bernardo tiren de frente, el restu la expedición garramos un senderu que sal pola drecha.

Tras pasar por un tunel d'escobes, polo menos daben solombra, toca subir por un pedreru, col calor asfixiante y chando agua por tolos poros, xiramos a la manzorga y comencipía a danos la brisina, tamos a un pasu del cumal.

Ya tamos na picorota del Maciedome (1908), Juan Carlos y Bernardo llegarón primero, de xuru que dalguna trampa ficierón.
Lo primero tirar les mochiles, como pesen les condenaes, sacar el agua, secar el sudor y... como se agradiez la brisa.

Les vistes son vistoses, joder cola redundancia, pa tolos puntos cardinales ¿son cuatro?, bueno digamos palos 360º.
Después dun buen montón de semeyes colamos por onde vinimos, el descensu faise llargu y pesau.

De nuevo nel Colláu Llagu, desta vegada tiramos pala drecha, damos cuna bona fonte, l'agua fresca ye de lo meyor cuando hay sede. Seguimos baxando pola pindía campera hasta'l Mayáu Recuencu (1340)

Pasamos a la vera dun horripilante refuxiu de cazaores, y xintamos al lláu d'otra bona fonte, a la solombra duna cabana, reconfortaos nel pensamientu que "nun quea na por subir".

Vamos nuevamente pola solombra la biesca, tamos pola zona conocía como La Cuchiella, pasamos por una portiella que da pasu a la Foz del Congostín, d'aquí salimos ya a un amplíu camín que nos dexa'n Pendones.

Enantes pasamos pelos Valliquinos, onde güeyamos a unos paisanos nel noble arte de recoxer la yerba.

Dexamos una poca d'agua na fonte del pueblu, no la escosamos nosotros.
Son les 17.00, en poco más de 7 hores caleyamos 16,2 km y un desnivel de 1128 m.

Paramos en Campu Casu a mercar suspiros, si, si, tamién a tomar una cerveza, nosotros nun dexamos al pueblu ensin cerveza, nun fuimos nosotros.
Son les 19.15 cuando dexo'l coche nel garaxe, una ducha y pa Xixón a dar de pasu una sidrería.