COUTU-BRAÑA MUMIAN-P.GUA-P.ALTU-BOBIA'L REBEZU-BRAÑA SOUSAS-COUTU
Viaxe bien llargu y cola carretera Somiedu n'obres, pese a to Eduardo, Riestra, Maite, Manolo, Bernardo, Juan Carlos y Yo llegamos a Coutu (850).
Dexamos los coches a la vera la carretera. Salimos polo cimero'l pueblu pindía pista p'arriba, cartelos por tolos llaos, prohibiu'l pasu, pasu prohibiu, sientese unu vixiláu, anque los satélites nun puean, eso imaxinamos, penetrar na espesura la biesca.
Asomamos l'oxetivu fotográficu por ente les rames de la biesca pa retratiar la fastera d'enfrente, el pueblu d'Urria y la carretera a Valle'l Llagu.
Llegamos a lo cimero de la pista, ante nuesos güeyos apaez la bien afama Braña de Mumian (1425), recorremosla d'arriba p'abaxo faciendo semeyes abondo.
Rompemos la tranquilidá, la nuesa tranquilidá como meyor sabemos, tirando polo más pindio qu'atopamos, vamos esguilando pola xélida fastera del picu Gua (1679), agora toca güeyar la zona del Puertu.
Baxamos dun picu, Gua, pa empicotanos notro, el Picu Altu (1849)Disponemonos a baxar, agora toca la ración de piornos, salimos triunfantes, lo más apriesa que poemos, con dalgún rasguñu... na que no cure col tiempu.
Llegamos a una amplia praera con dos teitos, reondos, y una fuente con abundante xelu, anque brille'l sol fai un frío de...
Entovía queen ganes d'algamar otra cume enantes de xintar, la que más a mano tenemos ye la Bobia'l Rebezu (1925), nella nos empicotamos güei.
Baxamos cola idea d'alcontrar un llugar afayaizu pa da-y al diente. Xintamos cola espalda apoyá na pared duna bona cabana y el sol templandonos la sesera.
Col bandullu enllenu cuesta trabayu ponese en pie, damos a un buen cortáu, damos la vuelta buscando un camín meyor. Atopámoslu a costa de subir una... a estes hores ya no hay pendientes pequenes, ni siquiera les cuestes abaxo. 
El senderu da vueltes y vueltes y más vueltes, llegamos al Altu'l Moñon (1698) y pol interminable pedreru llegamos a les puertes de la Braña de Sousas (1420).
Otru montón de semeyes, mentanto tomamos resuellu, el día ta faciendose llargu.
Atopamos a un paisanu que nos da unes breves indicaciones que nos ayuden a dar col camín, baxamos pol Monte la Enramada, ta marchando'l sol, en metá la biesca ya paez de nueche.
Vamos saltando sebes y crucíando'l ríu Sousas dun lláu pa otru, ta cayendo la xelá y entovía nun se quito la d'ayer, paez que ta nevao.
Finamos a la vera los coches, entovía ye de día, la carretera cortá a ratos llargos fainos subir al Puertu San Lorenzu pa baxar a tomar daqué caliente a Teverga. Y de Teverga a... casina.
