cundisemeyes

19-10-2010 Vega de Justillagar

2010-10-19T10:32:00.001+02:00

BUFERRERA-VEGARREONDA-COLLAU LA FRAGUA-JUSTILLAGAR-LLAGU ENOL

Buenes nueves metereolóxiques; magar desayunar y mercar el pan en Villaviciosa colamos palos Llagos, dexamos los coches nel aparcamientu de Buferrera (1027).

Son les 10 y 25, el día ta un poco fríu pero nun hai rastru de nenguna ñube, dalgún turista atereciu de frío y l'agua trasparente del llagu, hai que dir con tientu pela oriella con cuidau nun meter la pata nel agua.

Pela manzorga y pegaos a la montaña crucíamos perriba les piedres pa dar na Vega Enol, blanca de la rosá, enseguía vemos el fumo de les cabanes y los picos blancos pola capina ñeve.

Con ganes d'algamar Vega la Piedra pa entamar a quitar ropa y darreu siguir p'arriba, colos güeyos casi cerraos por mor del condenau sol que nos da de frente.Pasamos pela Ronciella y a la vera'l refuxuVegarreonda pa detenenos na fonte del vieyu abelugu (1515) a reponer fuerces.

P'arriba, siguimos p'arriba, ye lo de siempre, siempre p'arriba, algamamos Llampa Cimera (1814) vamos con tientu, tamos pisando la primera ñeve del añu y ta casi que xelá.

Llegamos al sombriu y fríu collau la Fragua (1913), son les 13:45 y güei ya subimos tolo que teníemos que subir.

Aldivinando'l camín baxamos hasta'l Mosquil (1740) y la Vega Bolu, piedres y más piedres nun paisaxe llunar, h.ous y llapiaces... Na H.orcadiella (1630) facemos un altu.

Casi les tres y el llugar afayaizu asina que vamos a da-y a la xintaera, perriba ta vixilante la Peña Santa d'Enol, perbaxo la maxestuosa vega de Justillagar.

Cuesta trabayu dexar esti llugar, magar del té y del turrón de chocolate cortesía de Juan Carlos, chamos a andar.

Baxamos a la vega Justillagar (1500) pasando enantes pel collau Afrontadorios, verde y grande, les agues desapaecen per debaxo la pena, unos caballos pónen-y el contraste a la verde vega.

Pela canal de la Mostaya, encaxonaos como'l ríu Redemuña aldivinamos el senderu hasta dar nos Güeyos de la Toya (1150) onde tornen a la lluz les clares agues.

Caleyamos a la vera'l ríu hasta dar nel camín de la mañana, tamos a l'altor del Pozu del Alemán, magar un montón de semeyes, el chapuzón dexámoslu pa meyor ocasión, siguimos camín.

Otra bona ración de semeyes na Vega de Enol, cola ermita y los picos de fondu, ya solo nos queá cruciar el Llagu y llegar al aparcamientu.

Ta poniendose ya fresco, remoyase un poco nel ríu y camudase de ropa enantes de refrescar el gargüelu nun chigre de Cuadonga.

Fuerón 20 km. y 1025 m. de desnivel lo producio nun xornada de 8 hores.

4-10-2010 Peña Llabres

2010-10-04T19:37:00.001+02:00

VIBAÑU-PEÑA LLABRES-CUETU TEXERA-CANTUVILLA-VIBAÑU

Como ye costume nun anuncien na bono los meterologos. Desta semos Bernardo, Juan Carlos, Riestra y Yo, en Posada de Llanes magar el café mercamos el pan y allegámonos a Vibañu, situ a 10 m. percima del mar d'Alicante.

Dexamos el coche bien averau a la ilesia, apenes son les 10:00 cuando entamamos la marcha coles paragües na man.

L'airada d'anueche dexó árboles fendios pela metá y nueces abondo pel suelu, los paisanos tan recoyéndoles, nosotros tamién apañamos dalguna.

Pel valle arriba algamamos les Conches (373), agora llueve perbien, tamos un buen ratu abelugaos a la vera una cabana.

A poco qu'escample ye bastante pa siguir separtando árgomes y tar empericotiaos na Peña Llabres (689) a la hora del anxelus.

Agora tenemos bona visibilidá, ya paro de llover, algún rayucu de sol quier acolumbrar, d'un llau'l Cantábricu del otru la sierra'l Cuera.

L'oxetivu del día yá esta cumplíu, nun creáis, nun ye ná bono, quea día enforma, de xuru qu'hai qu'improvisar.

Darreu siguimos empericotiándonos en tolos picachos qu'atopamos.
Danos por tiranos abaxo a la drecha xusto nel puntu que más teníen medrao les cotoyes.

Con esmeru en nun resbaliar, nun-yos paez na bien a estes cotoyes, llegamos al fondu del Valle de Llabrés (348).

Enseguía dexamos la recien topá senda de la Casa del Cura, xiramos a la manzorga y contra trás pa dir posando los pies en tolos cabezos qu'hai nos alredores.

Güeyamoss más cerca'l Cuera, tamos perriba'l Mazucu, güapu pueblu a vista de páxaru dende equi arribona.

Finamos xintando sofitaos nuna muria, fasta qu'el cielu entamó a char agua dando por rematada esta celestial placidez.

Toca siguir esguilando p'algamar el Cuetu Texera (649), son les 15:15 y ya calez con fuercía'l sol, nun tris tamos secos.

Baxamos pentu un rebañu d'oveyes, al mastín vemoslu a lo lexos, nun s'avera a nos, igual nos toma por cuatro oveyes más, meyor asina.

Baxamos a Cantuvilla (431), al llau de les antenas garramos la pista, enseguía tenemos que dexala, nun lleva'l mesmu camín que nos.

Tornamos a los orixenes, queremos reconcilianos coles siempre prestoses cotoyes, pero elles ponen poco de so parte.

Damos col senderu, adientrase na biesca pa dexanos na Vanoria (220), pelo que queá del camín carreteru arrivamos a Vibañu.

El regatu baxa la metá d'agua qu'esta mañana. Nes portalaes de la ilesia camudámonos a la solombra, la paisanina que pola mañana dixonos "igual llueve, seique faiga sol" entrugonos pola xornada y gayoliose col atolenar del so pronósticu, cuantayá más certeru que los profesionales de la tele.

Enantes de parar en Posada alcordíamonos de los fecho, 1142 metros d'ascensu, suponse que tamién los baxamos, 16 km. nunes 7 hores, con fríu y con calor, con agua y ensin ella.

30-09-2010 Ruta'l Cares

2010-09-30T19:16:00.000+02:00

PONCEBOS-CAIN-PONCEBOS

Xente nueva qu'hai qu'aficionar, quier desestrexase, quier chase al monte, hai qu'entamar sele, que meyor entamadera que l'archiconocía Ruta'l Cares.

Dexamos el coche nel aparcaderu de Poncebos (200), Lisardo, Manuel, Goyo y el qu'inventa estos cuentos.

El día bastante laicu, apenes baxar del coche y ya lleven dos carretes gastaos, caleyamos carretera arriba, falando y retratíandolo too, pasamonos de llargo.

Tornamos en busca de la baldosa d'entrá a la ruta y entamamos a resoplar, quién coño dixo qu'esto ye llano.

Fasta algamar los Collainos nun hai tregua, paramos nestes ruines y entovía...

Entovía nos queá un repechín, condergáu repechón, algamamos los Castillines, unes semeyes... unes cabres truñendose, guapa estampa, semeya va.

Son con diferencia los animales más civilizaos qu'atopamos güei, turistes insipidos dalgunos, babosos y maleducaos la mayoría.

Perdona-ynos por dexar que rasqueis la paré colos cuernos, si volvemos a crucíanos ya nos tiramos pel derribadoriu.

Agora toca baxar, presta más, crucíamos pa tierres lleoneses... anque la divisoria d'agues diga otra cosa.

Magar cruciar el ríu Cares pa un llau y pal otru, eso si dando-y buen usu a los puentes alli puestos, el afamáu puente Bolín y el no menos puente de los Rebezos, damos en Cain (450).

Nun se que hora ye, pero ¡ay! el ruidu que faen les tripes ye'l meyor reló... xintamos el menu del día nun de los milenta chigres, preciu non mui caru, la cantidá poca y el microondas a mediu gas, resumiendo; poco, caro y frío.

Col banduyu a mediu hinchar tornamos pela mesma senda, topandonos casi cola mesma xente, agora toca subir, dende esta fastera ye más tendio, más llevadero, menos mal que nun calez el sol.

Finamos visitando el puente la H.aya, metémonos debaxo, demasio mugor pa dormila aquina.

N'Arenes paramos a tomar un café, pa coyer meyor la carretera pa casina.

Ficimos 25 km. y subimos unos 560 m. de desnivel en aproximadamente 6 hores, anque el gps alloqueciera y marcara casi 40 km. reblincando no solo pel Cares, de xuru que tamién s'empericoto n'algún cumal, y eso que paeciome nun perdelu de vista en tola xornada.

26-09-2010 Torres

2010-09-26T15:11:00.000+02:00

SAN ISIDRO-VAL.LINES DEL TORRES-TORRES-COLLAU FUEYOS-MAYEU ACEBAL-CASTIEL.LU-PIORNOSA-NAVAL.LOZ-CUEVAS

Güei colamos pa tierres ayeranes, bueno de Lleón tamién, ...y tamién de Casu, vamos cola intención de empericotanos nun clásicu, el Picu Torres.

Quedo colos collacios en Morea, un café y a caleyar, enantes dexo'l coche en Cuevas, el restu subimos fasta la des-urbanización de San Isidro (1500) ya'n terren lleones.

El día tá murniu y fríu, los pocos y pequenos rellumos del sol nun presaxien na bono. Comencipíamos a caleyar, son les diez y media.

A la vera l'arroyu les Piedres vamos ganando altor, el fríu nun escaez y la borrina no alto paez tar esperando pa saludanos. Algamamos los Collaos de la Raya, un murallón calizu ta engarriandose cola borrina a ver quien nos fai tornar.

Arrepegamos per una canaluca y... al siguiente escalón, agora si que vamos a tientes, un poco d'intuición y un munchu de gps p'algamar la col.lá Valmartin (1785) a pesar del fríu tamos un ratu, cuando tamos toos decidimos dexar el Valmartin pa meyor ocasión...

Y siguir pela crestería de les Val.lines del Torres curiando nun despitase muncho. Ensin apenes güeyar ná arrivamos a la Ventanona (1913), apaecen los primeros rellumos de llorienzu, unes semeyes, poques, solo fasta fartase.

Abandonáu'l finxu del día, fantasmágoriques apaiciones ente la borrina faennos camudar d'idega. Entamamos a arrepegar, la borrina entama a rodíanos, d'esta manera apaecemos abrazaos al buzón, salimos toos na semeya, la plaquina reza, Picu Torres 2104 m.
Son les 14.00

¡Y agora por onde baxamos si nun nos vemos nin los pies!
Damos col senderu, pindiu y esnidiosu, nun va ser lo peor.
Xiramos a la drecha, les arandaneres si qu'esnidien, tardamos una eternidá n'algamar el col.lau Fueyos (1711).

Abrio'l día, selemente xintamos mentanto reflesionamos si siguimos, si tornamos, si colamos escontra la carretera... too ta lloñe y ná ye fácil.
Col bandullu enllenu y la testa vacía intentamos cumplir cola fueya ruta, fasta Brañagallina (1560) va bien la cosa pero alexámonos ca vez más de la maldita civilización.

Dexamos la riega de la Allegría a la drecha y baxamos fasta'l mayeu Acebal (1350), agora si que tamos lloñe de los coches, lo unico que s'oye, más entovía que los pensamientos, son les berries de los venaos que tan na dómina de celu.

Damos col senderu, paez el buenu, enllenu de barro, pindiu y llargu, muy llargu. Nel mayeu Castiel.lu (1295) axúntense toles vaques, tal paecía nun vieran visto enxamás bichos tan raros como nos.

Un descansín, un tentempie, darreu siguimos con cansín caleyar. La xente va coles fuerces, les fisiques les xustes, les mentales quearón escaecíes nel Torres.
Queco da por perdíes les sos vaques, son casi les 18:00 y tenía que tar en Xixón a les 19:00, paez ser que nun va llegar a tiempu.

Fa-yse de rogar el camín que baxa de la Roble... por fin algamamos el collau la Piornosa (1381) saltamos la portiella, tal paez que ganasemos les olimpíaes, ya tamos en tierres ayeranes.
Ensin pan y ensin sidra dannos una bona ración de cotoyes braves, Jordi nun yos fala con munchu cariñu, ye lo que tien metese en pantalones curtios.

Baxamos, ye munchu dicir, hai bonos repechos, pela afamá ruta de les Brañes Ayeranes. Ná collá Naval.loz (1083) intentamos apurar a la xente, va ratu, dende la xintadera, qu'intuyimos que va chasenos la nueche enriba.

Xusto enantes de metenos na biesca arrexuntámonos toos, dexo les llaves del coche pa que los conductores s'adelanten y suban al puertu a polos otros coches.

Despacín pente la biesca, la lluz ya escaez, algamamos la col.lá Cel.leros (999), ye nueche cerrá y nun hai lluna, ¿llunáticos quiciás?.
Col unicu frontal pa toos arreglamonos pa baxar pel empedráu camín ensin posar la culera, oyense menos rises... fasta güeyar les lluces de Cuevas.

Torna a eternizase'l pasu... y a oyese les rises, queremos atayar y eso a escures ye más díficil que con lluz, finamos na carretera a escasos 500 metros del mesón del sheriff.

Llegamos a la vez que los coches, son les 21:00, llevamos 10 hores y media, 20 km. 950 metros de desnivel p'arriba y 1700 p'abaxo.
Un día completu que cuando escaezca de sos memories igual tornen conmigo como guía.

24-09-2010 Collau Cabreros

2010-09-24T09:55:00.001+02:00

LA PESANCA-FOZ DE MUÑACOS-COLLAU CABREROS-LA PESANCA

Mentanto almorzamos en Villaviciosa, y ya decidíos a camudar de planes mercamos el pan y colamos pa Infiestu, el día de verdaderu iviernu aconseya dexar los Picos pa meyor ocasión.

Dexamos los coches ná área recreativa de la Pesanca (410), magar restolar na mochila, hasta'l paragües tenía mieu salir, bien garrau polos... pol mangu comencipíamos a caleyar, son les 10 de la murnia mañana.

A la vera'l ríu Infiernu l'afayaiza pista va ganando altor selemente, hai bones cabanes remozaes n'auténticos xalés con piscina y too.

Ensin dexar de portiar los paragües pasamos pela foz de Muñacos (950) apenes ye mediudía y ensín parar a pensalo siguimos pala manzorga.

El senderu agora ponse pindiu asgaya y barro hai pa fartar, echa una mano la borrina tapeciéndolo too.

Moyaos, embarraos y a tientes algamamos el colláu Cabreros (1458).

Tamos a la vera Peña Crespa, que apaecía y desapaecía por arte de barrabiellu, tardamos en pescanciar qu'el magu yera la borrina que ya taba faciendo pesá la chancia.

Acomodaos lo meyor posible pusimonos a xintar, hasta que torno a cayer agua, nun podía dexanos nin cincu minutos.

Recoyío too baxamos pel mesmu senderu pel que xubiéramos.

De nuevu na Pesanca quitamos el barro de les chiruques nes agues del mesmu infiernu, el ríu qu'asina se noma.

Camudaos y llímpios, ye un dicir, baxamos a Espinareu a tomar dalgo qu'amure... y pa casa.

Asina y too fuerón 6 hores pa caleyar 22 km. y 1100 m. de desnivel.

16-09-2010 Torre Llastries

2010-09-16T13:13:00.000+02:00

PUERTU PANDETRAVE-CANAL DE PEDAVEJO-COLLAU JERMOSU-TORRE LLASTRIES-VEGA LIORDES-PUERTU PANDETRAVE

Martes 15 dormitando nel sofá, una llamada y corriendo pal alimerka, magar mercar chocolate, quesu, chorizu... y que nun escaezca'l yogur llíquidu, facer la mochila.

Miércoles 16; na Corredoria a les 9 de la mañana, con Luis, Felix y Chus, vamos camín de Valdeón, en Santa Marina paramos, el chigre zarráu, siguimos hasta'l Puertu Pandetrave (1566).

En dexando'l coche y cargar con tolos trastos al llombu colamos pista p'arriba, el sol relluma poco y por fortuna tampoco calez, son les 12 y 2o.

Pasamos per Valcaváu (1789), siguimos hasta'l Caben Remoña, a la vera la fuente Pedavejo ponémonos a xintar baxo la solombra dunes piedrones.

Coles fuerces repuestes encaramos la canal de Pedavejo, pindía y condená canal, déxanos a 2030 metros percima la mar y unos cientos perbaxo les torres de Pedavejo y Salinas, ente cientos delles más.

Falamos cunos alemanes, entovía nun se a ciencia cierta en que llingua, diben más reventaos que nosotros, baxamos a la Vega Liordes (1868) y descansamos un ratiquín a la vera un casetón.

Tamos arrodiaos de picos y de robecos, magar despidinos de los alemanes, dibén pa Fuente De, siguimos darreu col nuesu finxu ente ceya y ceya.

Pel Sedu la Padierna alantre, ganando celeramente altor, perbaxo el Llagu Baxeru, lonxe la Torre Santa. Pasamos ya les Colladines, ya tenemos a güeyu que non a güevu, l'abelugu.
Inda tardamos una eternidá, hai que dir disparando milenta y picu semeyes pa cada banda.

Caleyamos entemecios colos robecos, casi que nos miren mal, a les 17:40 arrivamos al refuxu de Colláu Jermosu (2060), ta n'obres pero la cerveza tienenla bien fría, ah la civilización depáranos coses perbones...

Dannos hora pa la cena, les 20:30, colamos a güeyar la puesta de sol, nun quier asomar el muy... asina que coles ganes queámos.

Tornamos al abelugu ya cola mesa puesta, nosotros cuatro, otros tres montañeros, dos guardianes y dos obreros, en total 11 individuos pasamos la nueche equi arribona, los invitáos nuna h.aima xigante.

Dormimos a cachos, desta vegada nun ye culpa de los ronquíos, ye l'aire que sopla con ganes y l'agua que paez que va quedase secu el cielu.
Llevantámonos a les 7:15 p'almonzar darreu, el día gris y la ñube tapeciendolo too.

A les 8:00 casi a escures entamamos la marcha, tardamos poco en metenos na ñube y facer el primer conceyu, siguimos esguilando ensin saber ni per ni pa onde, nun tardamos en tornar en busca de les marques amarielles.

Empobinámonos nuevamente pa la cumbrera, empericotámonos nun farallón de la Torre les Llastries (2518), apenes son les 10, pala otra fastera aldivinase l'abismu, ye hora d'entrar en razón y tornar pa casa. L'orpín que nos rociaba danos agora con fuercia.

Tenemos que char un bocau, l'únicu sitiu a techu el refuxu, nel nos abelugamos, una cerveza, un trozu quesu picón... magar secanos un poco a desandar el camín d'ayeri.

Nun escaez el tiempu, abre un poco cuando algamamos la Vega de Liordes pero enseguía torna a zarrar, aventurámonos pela canal de Pedavejo, el intentu resulta da baldre asina que finamos nel mismu llau.

Ya nel Caben Remoña toca desandar la pista, que se fai interminable, va ratu que ta tronando, a les 17:00 llegamos al coche, ya camudaos cuanto más abaxo peor tiempu fai.
Paramos en Posada a tomar daqué y carretera... tornando la envernada.

El primer día caleyamos 12 km. nunes 5 hores, y el segundu vamos a poner 18 en 7 hores.
Asina transcurrierón estes dos xornaes nes que daben sol a rabiar... si pillamos al del tiempu llevennos presos.

11-9-2010 Peña Salón

2010-09-11T10:07:00.000+02:00

VENTA GÜERA-VIBULI-PASA'L TOYU-PEÑA SALON-CASIELLES-PUENTE GÜERA

Magar almorzar en Cangues d'Onis colamos pel escobiu de los Beyos alantre hasta dexar los coches na Venta Güera (333).

Chamos a andar pela carretera qu'atraviesa la foz de los Andamios, diseñá pa que se crucíen dos motos ensin sidecar, eso si, l'asfaltu tá a estrenar.

Son les 9 y un rebañu comeyerbes empezuñaos (cabres) dannos la bienvenía, la temperatura que nin pintá, fuera de la foz paez que relluma'l sol.

Damos cunos madrileños que nos retraten, ellos diben facer barranquismu, nosotros que por ciertu semos Ana B, Ana P, Josito, Pilar y Cundi siguimos carretera arriba agora pela foz del Cándanu y l'asfaltu ya vieyu.

Entramos en Vibuli (750), tras rellenar les cantimplores siguimos pel formigón hasta onde charón la postrera palá, el cementeriu. Comencipíamos a separtar felechos y árgomes y a dalguna ortiga que se pon melosa.

Vamos camín del collau Baxeñu (1034), Peña Salón de frente, y unes families de rumanos allí pertrechaos, glayando nun sabemos el qué.

Sentámonos un ratiquín na campera rucando ablanes al tiempu que güeyamos l'horizonte, el Tiatordos, el cordal del Zorru, Peña Ten, Viegu... el verde la biesca y el blancu la caliza.

Escontra toles previsiones colamos pala manzorga de la peña, llegaos al collau tirámonos p'abaxo, nun tien munchu sentiu y siguenme a regañadientes, separtando ortigues y felechos, pindio p'abaxo primero y p'arriba de siguío, damos nuna covacha ensin salida.

Esguilando apegaos a la paré damos con otra cueva, esta si que tien lluz al otru lláu, tamos na Pasá'l Toyu (1050) solo nos queá subir pela pindia fastera que nos dexa na cumbrera de Peña Salón (1245).

Volvemos a oyer los glayios de los rumanos agora unos cientos de metros debaxo de nos, tamos un ratín sentáos al sol, ye hora dir buscando un llugar afayaizu pa ponese a xintar.

Na Boya Campiella (1194) sentaos nunos postes de la lluz, mascamos seliquinamente, elles cara'l sol qu'hai qu'aprovechar cualesquier rayu.
Col banduyu satisfechu vamos reblincando pel camín del Llaciu.

Ye lo que tienen les cotoyes y el dir con pantalones curtíos, faennos coyer más velocidad, tan rabioses estes cotoyes a falta d'agua paez que quieren sangre.
Ente vuelta y revuelta del camín algamamos Casielles (820).

A dalguna pruyía-y entrar a rezar na capiya, en duldándolo un ratu y nun atopando al santu pa roga-y que fixera sumir les cotoyes, camudamos de plan y baxamos pol asfaltu.

Agora si que podemos contar toles curves dende lo cinmero'l pueblu.

Dalguna ataye pa recobrar el contautu coles queríes cotoyes. Llegaos al puente la Sota (450) una güeya pal cielu, ¡dios de onde baxamos! cruciar el puente y desandar un poco la carretera desta mañana.

Na Venta Güeria tomamos una cerveza que nos supo a gloria, fuerón más qu'el día tuvo calurosu o quicias l'esfuerzu de subir 900 m. en 6 hores y media p'andar 15 km.

07-09-2010 Picu Fuentes

2010-09-07T16:41:00.001+02:00

SANTIBANES DE MURIAS-RASON-MORTERAS-FUENTES-NAVADIEL.LU-SANTIBANES DE MURIAS

¡L'Home del tiempu!
L'home del tiempu fizonos empobinar p'Ayer, vamos dexar los Picos pa meyores previsiones.

Queamos en venos al golor de los churros, a Moreda vamos llegando Emilio, Riestra, Paco, Bernardo y un narrador, tras la merca del pan colamos valle del Ríu Nigru arriba.

En pasando Santibanes de Murias abandonamos los coches, tamos a 735 m. d'altor y son les 9.40, el sol ya aprieta, ta demasio blancu, mal presáxiu sigún los entendios.

Baxamos un ratiquín pela carretera, queda-y poco alquitrán, magar cruciar el puente Beyu (690) encabritase la pista, tal paez que vamos cayer p'atrás, les rampes si que son rampes.
Nes Porqueres (1138) paramos un ratiquín, secar el sudu y char un tragu d'agua.

Baxen unos paisanos col ganao, aprovechamos pa descansar un poco dando-y a la llingua, hai llobos dicen, ye una pena qu'eses besties se fartuquen con estos chuletones, tamién dicen que güei nun va ñevar, nesto casi s'enquivoquen.

Algamamos el Rasón (1255), como s'agradiez el llanu, anque sea falsu, l'airucu ca vez más fríu, en llegando a Balbona ya tan cayendo gotes. Aprovechamos la parada pa poner el chubasqueru y sacar el paragües que fai d'antena parabólica, de tornar l'agua nun quier saber ná.

Tamos na Col.la del Tunelón (1604), aparte de los picos de la Liebre, Peñamea y otros agora damos vistes a les Ubiñes y al Herrocarril de Payares.

Ya algamamos el cordal de Carroceu, entama l'aventura, tamos perriba una vieya mina, esta zona ta enllena de chamizos que xubilaben, non pre-xubilar eh, a los mineros con menos de 30 años, tales yeren les condiciones llaborales... siguinos cola nuesa aventura que ta más fresco l'aire.

Nin furando como xabaces llegamos a la crestería, arrenunciamos, tornamos en busca d'otru senderu.
Llegamos a la Col.la Fuentes (1620), cerrar los paragües anque siga lloviendo, y a güevu p'arriba.

Ya nun tá la brisa fría y cabrona, agora toca clavar bien los pies nel suelu y tamién el bastón pa nun baxar cucurrabaquiando.

Nun cumal ensin identificar chamos más de media hora abelugaos ente les escobes, viendo la borrina pasar endemoniá pel siguiente collau, casi aterecios tornamos cola certeza d'haber fracasao.
Cuando nun se puede nun se puede, anque joda un montón.

Baxamos crestíando, algamando un par de lomuques, cuando les cotoyes nos doblen en tamañu tornamos p'arriba hasta'l primer claru qu'atopamos, nun fai na de gracia, güei nun ye'l día, vamos de fracasu en fracasu.
Tiramonos a la Via Carisa, con esti vendaval nun pasa romanu ningún.

De nuevu nel Tunelón, son les 15.00, rápido como una centella una decisión; dir pal coche, el cartelu indica 9 km.

Enantes de llegar al Rasón paramos a xintar, nun nos dexa finar con too, ponse a llover cuna fuercía esaxerá.

Na vega Valende (890) mentanto desenredamos a un perru y chamos unos bonos tragos d'agua, pasa mio tía p'arriba a ver el ganao, tras la grata sorpresa siguimos col descensu, tan pronto llovía como dexaba de llover, hasta dalguna vegada chirriaba'l sol.

Dempués de caleyar 8 hores, 26 km. y 1600 m. p'arriba llegamos al coche. Paramos en Nembra, otra sorpresa, ¡nel chigre de Juanjo! un collacio de los d'enantes.

Mediu día cola mosca tras la oreya, llegar a casa y conectar el gps, el picu Fuentes (1709), tuvimos a 1948, algo ta mal, la mole que apaecía y s'esnidiaba ente la borrina el Tresconceyos (2014).

Tuvimos güarecios del aire nel picu Morteras (1948) o los Menuos o los Cerricos, cada mapa trai un nome, y el Picu Fuentes pisamoslu al baxar, la llomba del mediu, unos buzones anque fueran cruces bastaben pa orientanos.

Na internet un grupu falaba d'haber confundio el picu Fuentes colos Menuos y ye que menua pinta tienen los menuos.

25-08-2010 Gustalapiedra (picu murcia)

2010-08-25T18:46:00.001+02:00

BARNIEDO DE LA REINA-ALTU HOYA MARTIN VAQUERO-GUSTALAPIEDRA-PEÑAS CABURDAS-BARNIEDO DE LA REINA

Dempués dunos pequenos despistes cola hora de salir, facémoslo a les 7:40, Yo y Angel vamos hasta Xixón a recoyer a Riestra y llegar a Rusecu onde fai ratu qu'esperen Bernardo y Juan Carlos.

Magar del café, el pan ya lo mercó Juan Carlos, emprendemos el llargu ascensu al puertu Tarna.

En pasando el pantanu de Riaño xiramos a la manzorga pa dar en Barniedo de la Reina.

En dexando los coches a la vera la fuente comencipíamos a caleyar, nin una ñube nel horizonte.

La pista ye yana y condergámente llarga, en 6 km. apenes subimos 200 metros, topamos con un caminante que baxa de retratiar el paisaxe.
Vamos remontando el ríu Valponguero.

Nun momentu encrúciase la pista, nosotros coyemos la de la drecha, agora ya pica p'arriba, vamos siguiendo l'arroyu Gustalapiedra.

Dunes vegaes pindio y d'otres entovía más, parando guapamenta a coyer aire, fai munchu calor, agostu y Castiella que va facer entós, de vez en cuando paeznos sentir una brisina, lixerinaaa...

Algamamos el cordal a l'altor de L'Altu de Martin Vaquero (2142) pente arandaneres, les ablucantes güeyaes pa tolos frentes, los banzáos; de Riaño y Camporredondo.

Los cumales; montes de Casu, el Yordas... l'Espigüete al lláu, dende equina paez imposible baxar pela canal que recorrimos apenes fai un añu.

Agora l'aire sopla bien fuerte, suxeto bien el sombreru que esti añu ya colarón dos volando.

Andamos pel cordal que llímita Lleón de Palencia, algamamos l'Altu la Cerezuela (2204) solo nos quéa subir a plomu hasta'l picu Murcia.

Raru mui raru nome, nel pueblu dixéronnos desconocer l'orixen, ellos siempre lu nomarón Gustalapiedra, asina que sin más, por coyones, empericotámonos nel perbién nomáu Picu Gustalapiedra (2349).

Un buen ratu coles impresionantes vistes a los tres macizos de Picos, abelugaos del vientu, ensín falta poner la chaqueta, enantes de buscar el modu de baxar per otra fastera.

Facemoslo siguiendo'l cordal.
A media fastera sentámonos a xintar, danos llorienzu na testa, pero l'aire que corre fai que les mosques anden lexos.

Siguimos pela drecha, rodiando un picachu p'algamar la pista que siguiendo'l ríu Valponguero, nun descensu llargu y ensin ná de solombra, dexanos sudorosos y muertos de sed na encrucixá de pistes desta mañana.

Aprovechamos la muria duna cabana pa tar un buen ratu a la fresca.
Cruciamonos con un pastor que xube a ver el so ganáu, vamos cola llíngua como un estropaxu... y la inacabable pista que pa más coyones va casi enllano.

Arrivamos al pueblu y tras metenos a remueyu na fonte'l llugar, casi queá inservible, metémonos na solombra del chigre cola sana intención de dexalu ensin esistencies.

Al final recorrimos 25 km. 1300 m. de desnivel y emplegamos casi 8 hores... y media... e inda nos queden otres dos de coche.

06-08-2010 Valdepinu

2010-08-06T09:13:00.000+02:00

AMIEVA-COLLAU PARRIELLU-VALDEPINU-SAUBU-AMIEVA

Vuelvo p'Amieva con Juan Carlos, esta vegada camudo a los meniskos por Bernardo y Riestra.

Tras almorzar en Villaviciosa dexamos los coches a la entrá d'Amieva (585), el cielu despexáu, a estes hores y ya sobren un par de grados.

Poco más de les diez cuando entamamos a caleyar, una pista formigoná va dexanos nel Colláu Angón (815).

Les dúdies que nos metio un paisanín, ta muy malo rapaces,
faennos dir pela Senda L'Arcedianu, la intención yera coyer la pista de la drecha, pero ya teníemos la medrana nel cuerpu.

Hai bones nueves nel mundu, tan empedrando la Senda, colo fácil que ye char una cuba de formigón, ¿verdá ruteros del alba?, y escaecese de la memoria.

Les cumes vas apaeciendo poco a poco, el macizu ocidental a la manzorga, más alantre la presa de la Jocica, y el Cantu Cabroneru arribona vixilándolo too.

Güeyar el Valdepinu y abandonar la Senda, que ya tá dando-y el sol, esguilamos a la drecha pente la solombra del monte Tribustiellu.

Salimos al colláu Parriellu (1332), al sol que taba esperándonos y danos perbien na testa, xúntase el rascar de les árgomes nes patuques.

Les vistes ampliense pa tolos frentes, Amieva, Picos, Ponga, el Cantábricu lo más cercano.

Llegamos a Gustalmiendi (1400), siguimos darreu hasta'l Llanu los Acebos (1500) y d'aqui al colláu la Jastia (1700).

Encarámaos nel picu Valdepinu (1745), son les 14:00, el cielu azul, unes semeyes mentanto se reponen llíquidos...y sólidos.

Les vistes fáennos recordiar d'algunes aventures... la Foz de los Andamios, peña Salón, el Carria, el Tiatordos, el Sueve, el Cuera... y otres munches por venir.

Baxamos casique pel mismu sitiu, en Gustalmiendi colamos pala drecha, a la vera la fuente sentámonos na campera, camuflaos ente les vaques, rumiando, nosotros el chorizu y el pan, elles faciendose bonos chuletones.

Siguimos la mesma direición, baxamos coles cabanes de Saubu (1150) ente ceya y ceya. Paramos un ratu ablucaos col paisaxe.
Aquina garramos la Senda L'Arcedianu, y salvo dalgunos claros baxanos a la solombra'l monte.

Llegamos al coche a les 17:40, hai priesa asina que camudase y colar pa casina, ya llevamos 20 km. y 1200 m. de desnivel en 7 hores y media.

Por mor de la priesa llevennos hasta Uvieu, tien fácil arreglu, coyer el tren pa poder entrar en casa dignamente.

25-07-2010 Cantu Cabroneru

2010-07-25T10:35:00.000+02:00

SOTO SAJAMBRE-PEÑA BEZA-CANTU CABRONERU-SOTO SAJAMBRE

Tras varios aplazamientos por mor de la metereoloxía güei tamos convencios, vamos a pol Cantu Cabroneru.
Toi con Juan Carlos almorzando en Cangues d'Onis cuando apaecen Josito, Jordi, Pilar, Ana V y Mª Jose.

Arrimámonos a Soto Sajambre (936) dexamos los coches onde bonamente podemos, ya tamos dixebraos, perdios y ensin cobertura, dempués de restolar to'l pueblu alcontríamonos pa facer la semeya de salía.

Son les 10:45 cuando empobinámonos Senda l'Arcedianu alantre, la solombra la biesca nun ye abondu pa torganos el sudu.

Pasamos per Valdelosciegos (1100) y ente vuelta y revuelta de la pista damos nos Collaos (1400), la calor queonos atrás, mentanto va llegando la xente vamos retratíando un mundu ensin fin de cumes y dalguna amenazante ñube que desentona col azul del cielu.

Siguimos el senderu que dexa la Conia a la manzorga y Peña Beza a la drecha, na fuente'l Porrón (1450) a los pies del Jurcuetu tamos una ratada, charrando y reponiendo agua, tres les semeyes de rigor siguimos campera riba hasta abrir la Portillera'l Tarabicu (1495).

Equi teníamos axustáu un sacristán pa indicanos la canal de la Misa, fallónos la ilesia asi que siguimos el muriu qu'un día dixébronos de los sarracenos, vamos dexando bien embaxo'l camín de L'Arcedianu.

Topamos un furaquín na peñona, chando les manes, y d'alguna vegada les uñes, a les piedres, salimos na Güesal (1650) pa ver alla arribona tres bultinos caliares pequeñines del too.

Una entrugina de ná, ¿onde vamos? ¡a Peña Beza! p'allá nos empobinamos, campera arriba casi en llínea recta, non ensin esfuerzu llegamos al Collúa Llanu (1859) alegóricu nome ensin dudía nenguna.

Jordi tirose'l primeru al pedreru, igual creyía atopar pulpos, los demás colamos pel senderu, más piedres que tierra, gastando un poco más les uñes pa empericotanos na Peña Beza (1963).

Pa güeyar Vegabaños, el Jario, Peña Santa, montes de Ponga y unos cientos de cumales más que dexo como dexé la botella d'agua pol camín, menos mal que nun aprieta'l calor.

Toca tirase abaxo, ya queénnos poques uñes, pero en llegando al Colláu Llanu vamos a esguilar otro poco, ayudaos de pies y manes llegamos a les Peñes de Cebolleda (1878).
Vuelta a baxar y a buscar la meyor manera d'algamar el Cantu Cabroneru.

El camín atísbase bien abaxo, asina qu'en güeyando la primera canal, ya paez too senciello, p'arriba, a dalguna va escaeciendose-y que los humanos caminen erguíos, pero bueno ye por pocu tiempu.

Salimos a la cumbrera, unos pasinos más y tamos a la vera'l buzón.

Cantu Cabroneru (1998), el día casi despexáu, la borrina que lleva to'l día xugando con nós non nos la xuega. Sacamos les viandes y damos bona cuenta delles.

Al baxar, sorpresa, topamos un senderu pergüapu, sobremanera si se compara cola canal pela qu'esguilamos, más tiempu a cuatro pates de lo bonamente aconseyable.

Damos-y la vuelta al Cantu y pasamonos de la Cuenya Bermeya p'abaxo unos metros, tamos ente rebaños de vaques que lleven to'l día mirandonos con recelu.

Finamos pasando per otra canaluca, pa da-y l'últimu retoque a la manicura, ya tamos na Portillera'l Tarabicu y nel reinu... de Lleón.
Otru buen tragu na fonte'l Porrón, un montón de xente empericotaos na Conia y llegamos a Soto.

Metíos casi qu'enteros nel ríu, l'agua taba que muy muy fría, camudámonos y tomamos daque pa refrescar el gargüelu mentanto tirábemos unes boles na cuatreada.

Asina recordiando hestories finamos esta xornada de 14 km. y 1200 m. de desnivel en casi 8 hores, incluyendo les munches y entreteníes parades.

21-07-2010 Brañes Ayeranes

2010-07-21T09:24:00.000+02:00

FELECHOSA-COLLAU VALENCIA-LA TABIERNA-CUEVES-FELECHOSA

El día gris y murniu, n'almorzando en Mieres colamos pa Felechosa, a la vera la capiya de la Virxen de les Angusties (657) entamamos la marcha.

Son les 9:25 y el día ta angustiosu, colos paragües abiertos vamos pel valle Fresneu arriba.

Pasando pela Brazuela (926) hasta 'l mayeu Mayadín onde Alberto, Riestra y esti escribidor chamos una bona parolada col paisanín que prefier tar nel monte enantes qu'aguantar a la muyer.

Nel collau Felguera axuntámonos con Juan Carlos, Bernardo, Emilio, Paco y Angel.

Nel collau Valencia (1300) apenes nos güeyamos pero oyer oyemonos, y decidimos dexar el Retriñón pa otru día con meyor visibilidá.

Colamos brañes alantre, la primera parada na Braña Oteru (1260), siguimos casi a tientes hasta les Ordaliegues (1234) y la Tabierna (1382).

Chamos un buen ratu faciendo semeyes -ye un viciu- escondios pente la borrina. Vese poco, asina y too damos col camín, ta perbien camufláu poles ortiges y les árgomes.

A la drecha dexamos el picu La Mola, a la vera'l regueru Taio va'l senderu, bien señalizáu, d'algún qu'otru repechu p'algamar la col.lá Navalloz (1083).

Siguimos separtando cotoyes pa poer posar los pies nel camín, la borrina ya lo tapez too.

Adientrámonos na biesca, un poco más alantre, bien apegaos a la paré duna cabana pa moyanos lo menos, y xintar lo más comodamente posible.

Siguimos baxando darreu hasta'l collau Cel.lero (909) y coyer l'empedráu camín, pindiu y resbalosu que crucia'l valle Cuadrazos.

Hasta dar na fuente Les Moyaes (754) de Cueves, tras coyer agua na fonte non na embotelladora, siguimos el camín.

El Camín Real que casique enllano dexanos en Felechosa (658) a les 16:30.

Bona hora pa tomar un café y dar por finada esta xornada qu'el orbayu y la borrina intentarón boicotiar.

17 km. pa subir 860 m. llegando a los 1382 de máxima.

10-07-2010 Chomba los Chagos

2010-07-10T12:06:00.000+02:00

YANANZANES-PUERTU PIEDRAFITA-CHOMBA LOS CHAGOS-BRAÑA YANANZANES-YANANZANES

Dempués d'una selmana bastante entamanada anulando escursiones por falta d'efectivos, cueyo'l relevu organizativu, y si yeremos pocos agora semos menos entovía.

En Xixón a les 8 solo tamos tres.
N'embaraxando delles opciones, como fai sol vamos dir pala solombra.
Desayunamos en Morea d'Ayer y remontamos el ríu Ayer hasta dexar los coches...

Meyor dicir el coche, na entrá de Yananzanes (750). El cielu azul y la temperatura entovía agradable, son les 9:50 cuando entamamos la caminata.

Naide cuntó colos tabanes, los bien condergaos tamién elixierón el frescor de la biesca.
Los claros dexennos güeyar a la drecha l'ablucante Estorbín, a la manzorga la maxestuosa Panda más conocía como Pena Reonda.

Na Braña Campanal (1300) ponemos los culos en contactu cola verde campera, en frente la cabana ente los peñones y la fonte seca.

La solombra del monte va escosandose, cásique vien bien, mugor enforma y los tabanes que tan de lo más melguero.

Del Collau Rocin al Mayéu Sanpedro cola idega de baxar pel Mayéu Bustemprunu, pero estes condergaes traen metio na sesera el retratiase n'algún cumal.

Informaes, perbien informaes de lo alto que tan esti branu los cumales nun desisten de la llabor, asina que como siempre detrás d'elles... lo del paseín va ser otru día, van finar conmigo.

Poco enantes d'algamar el Puertu do-yos a escoyer cumal, drecha o manzorga, elixen la mano tonta, retorcíes son.

Asina colos pies percima les cotoyes más pequenines, naide dixo que nun fueramos abusar, algamamos una l.lomba, el Cuetu Pandu (1738), sentamonos a discurrir y a güeyar el valle Torio na vertiente de Castiella.

Un ratiquín secando'l sudu al sol deidificaos pola corona mosques que rodia nueses testes, eleximos el cumal más cercanu. En media hora tamos nel cumal, María Jose quería facelu en menos.

Chomba los Chagos (1879) pergüapu buzón, pergüapes vistes, pergüapa compaña... puñeteres mosques.

Llega la hora de colar desti afayaizu cumal, al mayeu Pastores (1835) con llaguna y too. Güeyamos unos claros y p'allá vamos, cotoyes, cotoyes y más cotoyes abusando de nos, como pinchen les fi de...

Na metá la biesca, bona solombra, buen sitiu pa xintar, son les 3 y les tripes va tiempu que ruxen.
Una fuente, una campera y el camín al otru lláu, ya paso lo peor... y 5 ¿o yerén 6? mastines qu'apaecen de súpitu.

Tornamos a les cotoyes, siguimos al pie les indicaciones de los perros, y damos na máxica Braña Yananzanes, braeramente de les más guapes enxamás vistes polos mios güeyos.

El senderu fina en camín, anque destrozáu pel últimu temporal... ya lo dicen los vieyos "nun bebas agua, estropía los caminos", piedres y regodones, regatos y tabayones.
Pente'l fayeu algamamos el camín de la mañana, tamos nel Cantu Posaoriu (900) siguimos p'abaxo.

Invitoles a xirar a la manzorga, perriba la canal de l'agua, el cansanciu convida a dexalo pa otra vegada.
En Yananzanes visitamos la capiella y el llavaderu públicu, nun lu escosamos por poco.

Finarón siendo 17 km, en escases 7 hores 1000 metros d'ascensu. Ya llimpinos detenemonos en Cabañaquinta a tomar daqué con certificáu sanitariu.

08-07-2010 Corteguerón

2010-07-08T17:23:00.001+02:00

SAN ISIDRO-VALMARTIN-CASCAYON-CORTEGUERON-SAN ISIDRO

Queamos en Mieres, xuntos y col café nel banduyu y el pan na mochila subimos pal Puertu San Isidro, n'apenes entrar en tierres lleoneses tirámonos de los coches.

Dexámoslos na urbanización (1500), unos edificios tan integraos nel paisaxe que son casi tan altos como los picos que los arrodien.

El día casi que despexáu, apenes les 10 cuando comencipíamos a caleyar dexando l'arroyu les Piedres a la manzorga unes vegaes, les menos, les más a la drecha.

Asina reblincando pel arroyu y esquivando les vaques damos cola testa nun inmensu paredón calizu.

Con tal de nun arrodialu atopamos una afayaiza canal pa esguilar per ella y dar n'otru mundu.

Pasamos de soslayu el collau la Forcadina'l Llagu y tiramos de frente al picu Valmartin (1932), nun atopamos rastru de la nuesa presencia, Juan Carlos, Emilio, Riestra, Paco y Yo tuvimos aqui arribona fai 8 díes.

Camudo poco nuna selmana, esta vegada dexamos una tarxetina de recuerdu, Alberto y Bernardo nun taben la vez anterior.

Darreu siguimos dexando tarxetes cumbrera alantré, nel Porru Blancu (1867), L'Arenal (1885), Entepicos (1881)... caleyamos percima la raya, un pie en Castiella otru n'Asturies... siempre cola testa nel paraisu.

Finamos nel Cascayón, tamién nomau Picu Fornos (1951), el Llagu Ubales a tiru excupitaxu unos cientos de metros debaxo, la Peña'l Vientu, la Rapaina... el día ta ñublandose.

Dempués de facer unes semeyes, la vista'l frente, entovía va agrandase la fueya ruta... paez que nel Corteguerón hai armes químiques.

Baxamos a la Collá Acebal (1711) y senderín arriba algamamos la crestería, primero el Cantón Muqués (1865), güeyando'l Visu la Grande, l'Atambos, la Felguerina y poco más, la borrina ya tá faciendo de les suyes.

El Corteguerón (1884), acomodaos lo meyor posible entamamos la xintadera, al poco tamién entamen a cayer gotes, ca vez más gordes y más apriesa.

Col bandullu a mediu llenar y col chubasqueru puestu baxamos sortiando'l granizu, el sombreru por so cuenta baxa volando pa tierres casines.

De nuevu na Collá Acebal, paez que quier dexar de llover, baxamos pala drecha hasta dar na pergüapa y afayaiza braña los Moyones (1570). El sol torna a rellucir.

Un ratiquín sentaos na solombra una cabana, remoyar la cara nel riachuelu y... na bueno, hai que subir hasta...
Arrastrandome pela pindia fastera, solo falten les mosques, llegamos a la Raya Bueya (1745) llímite con Lleón.

Resopliando d'allegría, el mayor esfuerzu ya ta fechu, agora too pa baxo, falta dalgún repechu y la bona ración d'argomes.

Paco y Riestra por nun furar pente les cotoyes tornen a subir.
Ya na urbanización acicalamonos nun vaya ser que nun nos dexen entrar en cualesquier chigre.

Fuerón casi 8 hores, casi 16 km. casi 1250 m. d'ascensu y casi que una caxa de cerveza.

Baxar el puertu y pa casina a duchase y descansar, fue asina ¿verdá?

30-06-2010 Valmartin

2010-06-30T21:44:00.001+02:00

LA RAYA-COLLAU VENTANONA-TORRES-FUEYU-VENTANONA-VALMARTIN-LA RAYA

Salimos de casa con niebles matinales, ya en Mieres la cosa non meyora, facemos tiempu tomando el café, esperando a los de Xixón.

Ya nel Puertu San Isidro, dempués de pasar con exitu les obres del corredor del Ayer que se cai a cachos, como fadríen los romanos pa morrer ensin ver les sos obres nel suelu...

Aparcamos xusto na Raya (1500) frente al chigre, apenes les 10:00, el día nidiu y frescu, entamamos la marcha, van apaeciendo vaques al tiempu que separtamos piornos.

Enseguía damos cuna bona fonte, tamos a la vera'l Mayéu Torres, al pie de los picus Capiella, Valverde y del que paez dende aqui imposible d'algamar, el primer oxetivu del día, el Torres.

Colamos pa la drecha pa llegar al Collau Ventanona (1876), los güeyos vanse pa milenta cumales, como si los pocos que vamos a pisar güei nun sobraran pa fartucanos.

Agora vamos pa la manzorga, pasin a pasin vamos ganando altor, detiennos el buzón, Picu Torres 2104, pon.
Un ratiquín recobrando'l resuellu, más que ná pa que les semeyes nun salgan movíes, trepidaes nel llinguaxe técnicu.

Y tenemos mediu conceyu d'Ayer debaxo nuesos pies, y tamién un poco de Lleón, si ye verdá, voi facevos casu, de Casu tamién.

Entovía son les 12:00, damos-y a la parpayuela cunos montañeros y siguimos un ratu al sol, dexamos la tarxeta de cumales y baxamos per otra banda.
Enfilamos el Collau L'Almagrera (1845).

Les arandaneres, pequeñines pero resbalioses tórguennos el dir mirando pa los escaparates, desta manera escrutando perbien el suelu empericotamonos nel Fueyos (1891). Entovía nun ye la hora de xintar.

Güeyamos muy arribona el cumal del Torres, pal otru llau la Sierra del Corteguerón, dabaxo les Llagunes Caballuna y del Piornal.

Tras de consultar col mapa colamos pente les piedres y les cotoyes direción al Collau la Ventanona, dempués dunes semeyes col peculiar marcu algamamos el picu del mismu none, la Ventanona (1913).

Y al pol últimu finxu, ya lu güeyamos eso ye lo malo, ta entovía en ca dios.

Crestíamos tola cresta que coño vamos crestiar, p'arriba y p'abaxo y p'abaxo y p'arriba y vuelta a empezar... Finamos sentaos nel Collau la Forcadina'l Llagu (1785).

Equi Alberto niegase a subir, el resto empericotamonos nel Valmartin (1932) pa darreu baxar en busca d'Alberto y d'un afayaizu llugar onde ponese a xintar.

Coles fuerces repuestes seguimos p'abaxo ya ensin quitar el güeyu del coche, entramos nel chigre como si fuera la cocina de nuesa má... pa dar bona cuenta del refrixerante de gargüelos.

Ficimos 11 km. y 930 metros de desnivel en 6 hores y media.

27-06-2010 Peña Orniz

2010-06-27T09:55:00.001+02:00

TORRESTIO-PEÑA ORNIZ-TORRESTIO

Tras camudar de paecer varies vegaes finamos colando pa Pena Orniz, con esa idega queamos en Xixón, dempués de desayunar en Teberga pasamos el Puertu Ventana pa llegar a Torrestio (1360).

Aparcaos los coches y ataviaos como hai qu'ataviase, la mañana ta fresca y les ñubes nun anden muy lexos, comencipíamos a pisar flores, güei somos un puñaín; Victor, Jordi, Cundi, Conchi, Mª Jose, Ana V, Pilar, Juan y Ana B.

Entamamos a subir pel valle Valverde, caleyamos a la vera'l ríu pa finar cruciándolu y siguir pel arroyu Meruquil arriba. A cambiu de bonos goterones de sudu ganamos altor.

El cielu nun tien el color apropiáu lo que ye enforma esmolecedor.
Topamos con un solitariu montañeru que nos entruga pol camín.

Nosotros tamos pel valle Congostu y tá tentándonos el picu Congostu, p'allá nos empobinamos, acomodaos nel colláu (1968) la xente d'alantre tuerce pa la drecha.

Enfilen pal oxetivu primigeniu, siguimoslos ensin conocer muy bien el motivu desti cambiu radical.
El cielu nun presaxia na bono.

Llegaos a los pies del picu (2068) y mentanto dalgunos dan-y perbien a la parpayuela, propóngome atayar a los que ya tan allá arribona, ni de coña lo consigo. Ya pente la borrina dexamos la tarxeta nel buzón de Peña Orniz (2191).

Son les 14:00, les ablucantes vistes col Llagu'l Valle allá abaxo y el bocadillu allá arribona na mano, faciendo de visera, la borrina esmórese coles gufies que dan algunos según van llegando.

La troná oyese ca vez más ceo, tiramonos p'abaxo dexando la Torre Orniz ente la borrina y los rayos pa meyor ocasión.

Baxamos hasta la Llaguna Congostu (1955) con ñeve na oriella, ensin parar siguimos darreu baxando hasta dar nel arroyu Meruquil y pel ya conociu camín de la mañana dar en Torrestio.

La ñube nun nos pillo esta vegada, equi el sol calez perbien, camudámonos y refrescamos el gargüelu nel chigre del llugar.

Fuerón 17 km. en 7 hores y 858 m. d'ascensu pa llegar a los 2191 del cumal.

Entovía son les 17:00 lo que conduz a cabilaciones varies, la más recurrente ye onde merendar.

Que meyor sitiu qu'el pueblín, a los merenderos de Xixón nos diriximos, un poco puercos -ee solo un poco- y goliendo a sudu dexáronnos presto una mesa pa fartucanos de tortiella (ye mentira, ye perdificil) y de sidra, esto ya ye imposible del too.

25-06-2010 Cornón de Busmore

2010-06-25T12:43:00.000+02:00

COLLAU SAN ANTON-LLAGUNES DE FASGUEU-CORNON DE BUSMORE-PUERTU VALDEPRAU

Güei que dan tormentes vespertines colamos Juan Carlos, Riestra y Yo pa tierres de Degaña, en Villablino mentanto tomamos el café entama a llover con ganes, inda nun empecipíamos y ya anda equivocáu l'home del tiempu.

Llegamos al Puertu Valdepráu y princípien los problemes, vamos p'Asturies, baxamos un trozu per una pista que nun yera, hai que remontala, media hora dempués volvemos a tar nel Colláu San Antón (1345).

Agora colamos pa tierres Lleoneses, enseguía xiramos a la mandrecha per un camín qu'enseguía s'engafa, estrechu y pindiu ponse'l condenau.

El malditu camín xunto a la chorna que presaía la nube fai qu'a los Praizales (1400) lleguemos sudando abondo. Siguimos sudando pa ganar altor.

Agora topamos unos finxos xigantes, paez mal nun face-yos casu anque nos lleven p'abaxo, ya güeyamos Degaña, asina que media vuelta, el recuestu coxonudu, nun se fai más llevaderu chando pestes y maldiciendo, digo-voslo yo.

Agora, ya tocaba, coyemos el bon senderu, nun dexá de ser pindiu y retorciu pero da con nuesos güesos nes Llagunes de Fasgueu (1780), un descansín y ná siguiente un descansu.

Algamamos el cordal col pensamientu puestu nel acidentáu coche y que col aire de la cumbrera les mosques cuelen de paseo, ná, les puñeteres mosques deben ser trasgéniques y aguanten meyor que nosotros el nun poco molestu aire.

Encumámonos nel Cornón o Alcornón de Busmore (1934) ablucantes vistes tapecíes poles xigantes mosques, facer apriesa unes semeyes y tiranos p'abaxo tras güeyar un montón de cumales y al cielu, que ta dexando de ser azul.

De nuevu nes Llagunes y oyendo de lluende tronar siguimos baxando, paramonos a xintar nuna campera, el sol ya tenía pesllao.

Los truenos ca vez más siguios y más ceo, casi que nos diben marcando'l camín.

Casi qu'a la carrera llegamos al coche a la par que la tormenta, mentando reparábemos la rueda entamen a cayer rayos y truenos y agua, muncha agua, oscureciose del too y nun yeren más de les tres.

Llogramos baxar a Zarréu, entrugamos por un taller y el más cercanu en Caboalles, en casa dios...y yo con esta rueda.

Esperamos pacientemente, que remediu, pela grúa, dexonos en Villablino, tras camudar de rueda colamos pa casa.

Vienres y xugando España podía tar ensin coche 15 díes, nun fue asina, asina y too ficimos 10 km. en 4 hores y media y un desnivel de 775 metros.

13-06-2010 Cabeza Redondu

2010-06-13T20:22:00.002+02:00

TIELVE-VALFRIU-TORDIN-CABEZA REDONDU-TIELVE

Tres dellos intentos d'anular esta salida p'alendar aire sanu, los coxones sanu nun resultó na, al calor y el mugor xuntose la borrina qu'amollecía los güesos.

En fin apaecimos unos pocos, Josito, Pilar, Ana V, Conchi, Juan, Mª Jose y Yo... anque'n Montevil llovía en Viesques nun yera pa tanto.

Colamos pa Cangues, dificil d'aparcar como casi siempre... y los chigres entovía trancaos, ye'l patrón de la llocalidad y si Dios nun madruga nun va llevantase la plebe.

Topamos un sitiu pa tomar un café, ensin pinchu nel estómadu tiramos pa Tielve, un poco más ceo que Sotu Sajambre destinu primigeniu.

En Tielve (700) tamién cayía agua, pero poca, asina qu'entamamos a caleyar pela pindia y esnidiosa pista, aína la primer parada, apenes 500 m. y estes muyeres ya entamen a quitase ropa, aprovechamos pa facer unes semeyes y guardar el paragües.

Siguimos pel camín refugando'l formigón, pembaxo de nós la carretera a Sotres percima un llurdiu ablancazáu que llega hasta l'infinitu, anque nun veamos más alla de la punta les ñaples.

De nuevu nel formigón, agora cubiertu por una llámina d'agua, chapotiando llegamos al Mayau Valfríu, tamos de parola con Kili, cayímos-y perbien, indiconos el camín, paecímos-y espertos, si supiera bien...

Entamamos a esguilar, casi a tientes hasta algamar el Mayau Entrejanu (1180), una paradina pa picar daqué, falar un poco y sobremanera entruganos si merez la pena siguir.

Coles fuerces repuestes coyemos la empedrá Senda del Caoru, tenía que ser la senda, un ríu nun pue dir tan arribona.
Llegamos al Collau Posadoriu (1225) y como nun atisbamos a ver ná siguimos subiendo hasta dar col precipiciu.

En casa calentín y sobremanera secu, el gps y los mapas dicen que tuvimos empericotaos nel Cabeza Redondu (1328). Unes semeyes al grupín de collacios, solo primeros planos, ye tontá apuntar más lexos. Ya decidíos a tornar a ver si atopamos el camín a la primera.

¡Güei xintamos nel chigre! agora si que pasamos a tientes pel Mayáu Tordin, óyense les botes chapotiar nel agua, xuraría que vamos pela campera.
Atisbando'l meyor llugar pa tirase abaxo llegamos a la carrera a Valfríu.

Tamos otro poco de parola con Kili, entereme díes dempués un poco de sos andances, convidábenos a unes sidres pero nun teníemos tiempu.
Otra vegada pel inundáu formigón hasta dar col camín que nos dexá na pista que nos conduz al pueblu que...

En llavándonos perbien, camudaos y delles arumaes, entramos nel chigre, yera un poco tardi pero atendieronnos perbién y fartucaronnos guapamente, lo de costume tres destos esfuercios: fabes, tortos, cabritu y llambionaes, munches llambionaes.

Traca final a una xornada na qu'escontra toles previsiones nun nos moyamos, caleyamos 5 hores y ficimos 9 km. y 666 metros de desnivel.

De camín a casa los mios pasaxeros xurarón y perxurarón güeyar un osu, col frenazu y los glayíos de la copiloto el osu nun espero a que lu viera y muncho menos a que lu retratara.

08-06-2010 La Xistra

2010-06-08T17:47:00.000+02:00

MANANTIAL DE CODE-CUETU VIRTUDES-PICU LA XISTRA-MINES DE TEXEU-L.LAMO

A les 8 llega'l tren, de nuevu colamos pa Riosa, el coche aparcau na vera'l Manantial de Code (630), el día murniu y amenazaor.

A les 9:15 adientrámonos na espesura del monte, ta tan escuro que paez de nueche, hai senderos pa tolos llaos, casi a gates andamos y desandamos hasta dar col senderu bonu.

Salimos per una portiella a una pista, vamos a la manzorga pa enseguía siguir per una pindia campera p'arriba, el mugor fainos char goterones de sudu, tamos na L.lampa Cimera (750) unos burros dannos la bienvenía.

Hai una bona fuente, enfocamos el Cuetu Virtudes, namás pasar otra fuente el senderu entama a retorcese, nun güeyamos p'atrás pola medrana a cayer de la paré y sobre too porque la borrina nun dexa ver ná.

Paez qu'el día quier abrir, unes poques de semeyes enantes de metenos na biesca La Muena (1300), ¡Dios! fizose la nueche, cuando salimos ta lloviendo y una sabanona blanca tapezlo too.

Algamamos la portiella que pieslla esti camín, ye un dicir, la probe portiella anda estrociá pel suelu.
Tira l'airucu fríu, vamos peles camperes llenes de vaques aguantando'l frío hasta dicir basta... col forru y el gorru en su sitiu ya ye otru cantar. Agora toca facer lo mesmo col paragües.

Poco enantes d'empericotanos na Xistra, cuando ya se güeya y ya nun cabe posibilidá de perdese, dalgún desasnau pintó una llínea casi que continua de verde fosforitu.

Meyor nun sacara la testa del calderu, asina reconoceriemos-y toos el méritu que tien el ser marcianu o el ser él tontu del bote.

A les 12:15 col paragües na mano nel cumal La Xistra (1766), apenes s'atisben les antenes del cercanu Gamoniteiru. Una tarxetina pal buzón y vuelta pel mismu sitiu, agora abrazando'l L.lagu L.lazaradin pela manzorga.

Siguimos baxando contra la drecha y xusto cuando más necesitabemos un poco de visibilidá damonos de bruces cola borrina que subía a toa hostia.

D'equi nun baxais equina vos quedais, que si que non, que sacamos l'aparatu... a ver saca-ylu... y fizonos sacalu la bien condergada.

Media hora dempués y cola ayuda del gps damos col senderu ya desaparecíu na mayoría los tramos. Siempre perriba la biesca y a la drecha... que fácil ye dende casa.

A ciegues campera abaxo, resbaliando pente les piedres y topetando nel barro.

Como paxarinos, empapaos y acariciaos abondo polos artos y d'alguna ortiga damos coles tapiaes bocamines de Texeu (1100), asina que darreu p'abaxo hasta les mines de Rioseco (730).

Les obres paraes, va 5 díes que tuvimos equí, en 5 díes tapiarón toles cases menos una, entramos nella pa xintar y sotechanos un ratu.

De nuevu a l'agua, coyemos la pista de formigón que nos dexa nel cercanu L.lamo (555), sotechaos nel llavaderu quitando la folla de les botes... y de les pates mentanto esperamos pel taxi.

Y falando con un paisanu, antigüu mineru nestes mines de cobre, 4000 pesetes cobraba nel 56 cuando pesllarón y charonlos a andar.

En percorriendo 14 km. subimos 1250 m. en 7 hores y media, quitamos les botes y tiramos pa casa, non ensin antes tomar daqué caliente na Foz de Morcín.

03-06-2010 Ruta L'Agua

2010-06-03T10:20:00.001+02:00

LA VEGA-SAN ADRIANO-MINES RIOSECO-FUEYOS-POLA L.LENA

Nel tren hasta Uvieu pa coyer la llínea a Riosa, pocos viaxeros nesti autobus, hasta La Vega (340) llegamos Riestra y Yo, al lláu l'ayuntamientu nos posamos.

Apenes son les 8:30, col día cubiertu colamos carretera arriba, a Muriel.los podeis llegar siguiendo los goterones de sudor qu'abondo dexamos nel asfaltu. Poner los pantalones curtíos y ¡a pata descubierta! entamar a intimar coles prestoses ortigues.

El mugor del suelu y l'agua qu'hai nes cañes de los árboles amás del sudu, tal paez que temos dientro un fornu. Vamos adulces, dende l'estrenu de xuru que naide repasó la ruta, ye costume xeneralizada, igual va escontra'l drechu consuetudinariu.

Saltando portielles pesllaes, cualesquier día damos cuna portiella blindá, y tornando llamuergues vamos siguiento les tapes de les arquetes, el día ta abriendo, llorienzu regalanos los primeros rellugos del día.

Ensin querelo tamos na carretera, un enigmáticu llavaderu perbaxo y una capiella perriba, decidimos visitalo too, abandonamos la inseñalizá ruta p'algamar San Adriano (600) l'únicu habitante diznos que meyor pela carretera o per otru camín, a esto si que-y ponemos meyor cara.

Siguimos el camín indicáu, finamos igual d'embarraos. Nes Tixeres (580) vuelven a dicinos "meyor pela carretera" siguimos la Ruta L'Agua pa dar nes mines de Rioseco, tan en fase de rehabilitación, despilfarru de dineru públicu, auguro al añu tantos visitantes como convidaos el día la inauguración.

Tal desbrozaura en metá tantu verde la verdá qu'acorvia, na de impautu embiental qu'entovía ta n'0bres. Damos una vueltuca peles instalaciones, el sol calienta perbien. Siguimos col nuesu plan.

Pista arriba hasta alcontriar l'asfaltu, na Mesta (860) damos cola carretera, hai que subir más, casi hasta L'Alto la Segá.
Mentanto Riestra va estudiar la carretera yo túmbome un ratu al sol.

Ente baxar pela carretera o buscar un camín escoyemos la opción de l'aventura, baxamos per una pista hasta entruga-y a un paisanu, que nos echa pala drecha.
Xintanos debaxo una castañal y siguimos les indicaciones del paisanu.

Tamos en metá la biesca, no nos casca'l sol, ye lo bono, barro abondo y la salía dificil d'atopar, vueltes y más vueltes... y más maera, rodíaos y vencios polos árboles.
Algamamos unos praos... ¡y un camín! tamos nel Venceyal y nel Trechuriu (458) topamos la carretera.

Alcontríamos un coche que baxaba, entrugamos si dibemos bien, respuenden: "xubir al coche" ensin pensalo diximos-yos que non, que siguiemos col caleyar, que meteura de pata.

El sol aprieta y l'asfaltu ayuda poco, subimos hasta Los Fueyos (510) pa baxar unos kilometros, mal medios, coño que llargos los ficierón, hasta Muñon Fondiru (320).

Na Barraca (300) xiramos a la drecha en busca del primer chigre abiertu, tamos na Pola, d'un tragu un vasu de sidra atarraquitau de cerveza y llimón, d'otru tragu la mesma cantidá d'agua.
Pola L.lena alantré, la estación de tren na otra esquina...

Na estación taba'l tren como d'encargu, llegar nosotros y arrincar. Coles pates enllenes de barro y la camiseta sudá pasamos pela capital de camín a casa.
Suponíase una ruta enllano, pues subimos 720 metros y caleyamos 20 km. en 8 hores y media.

16-05-2010 Rasu

2010-05-16T21:38:00.000+02:00

LES BEDULES-RASU-RECUENCU-LES BEDULES

Quedamos en Xixón a les 8 y son les 8, apaez dalgún más de los que s'esperaben. Victor torna pa casa, güei nun nos va facer compaña.

La xente ponse un poco nerviosa, nun se fia, nin muncho nin poco, nun se fia y eso que xuro y perxuro que nun van ser más de 600 metros de desnivel.

Colamos, la primera parada bien ye afayaiza, una cafetería en Cangues, buen café, meyores pinchos...

Darreu seguimos, pillamos un buen atascu, un rebañu ciclistes tiennos un ratiquín entreteníos, nun ye ná, enantes de San Xuan de Beleño atopamos una curia de vaques imposible d'atalantar.

Dexennos pasar cuando dan cola cuadra, un cachu p'arriba de San Xuan coxemos una pista que nos dexa nes Bedules (1084). Tras unes semeyes, dicen que de salía, entamamos a emporcar les botes y ya puestos los pantalones tamién.

Nes Biforcaderes (1200) xiramos a la drecha per una empina pista que nos dexa nel Colláu La Mota (1350).

Ya tamos emporcando la ñeve, llevamos to'l camín mirando de soslayu al gayasperu Tiatordos, tien puesta una ñube a modu de boina, asima de presumios son estos cumales.

Más nidios muestrense'l Carriá y el Pierzu, imponentes, pero lo que más acoxona ye mirar pal Recuencu, allá arribona pretendemos llegar güei.

La fueya ruta pon que tenemos que pasalu de toes toes, Gelu y dalgún que otru respiren al enterase que nun fai falta, va ser que non, ye ocional.

Tras reagrupase, chucheries varies y tragos de llíquidos de colores inverosimiles.
Casi que to'l cielu ya ta azul, tiramos a la manzorga pente la solombra y la resbaliosa ñeve del suelu y los sabanones que nos cayen de les rames.

Les vistes ampliense agora, los Picos d'Uropa paecen fantasmes na borrina.

Con no poco esfuerzu, les vistes xustifiquenlu de sobra, empericotamonos nel Picu Rasu (1613).

Tras un descansín na cume y la consabía ración de semeyes seguimos crestería alantre enterrandonos na fría ñeve, esquivando, y tirando si nun nos ven, boles de ñeve a cual más grande... peor que los rapacinos, igual de contentos.

Apaeznos de frente'l Colláu Zorru, la muncha ñeve y el pocu tiempu aconseya dexalu pa otra vegada. Tiramonos monte abaxo esnidiando penta la ñeve, enantes d'algamar el Colláu Caldes (1400) desenterramos, miagaba como un gatín resultó ser una rana, ninguna quiso besala nun fuera ser verdá lo del principe.

Nel colláu plántase la meta del grupu, ye hora de xintar y el Recuencu más que convidar ta amenaciando, vemos como arrenuncia un montañeru, empobinamosnos p'allá.

Convencemos a unos pocos pa que tornen, nun diben muy convencios. Ye perdíficil siguir, un pasu p'allantre y unos metros p'abaxo, asina tamos cuando Josito entama a baxar, diz que ta muy mal, ya asusta cuando diz que ta bien... asina qu'eso y l'ádene que güeyamos nel Colláu Zorru ye motivu más que suficiente pa tornar y sentase a xintar.

Jordi entovía sigue peles altures y Victor I. empericotose nel Recuencu, xintamos mentanto los más madrugaores nesti arte de llenar la panza deleitennos cuna sinfonía, un poco desafina, nun será por falta entrenamientu, nesti arte de la roncaera.

Colamos p'abaxo, seguimos pente la ñeve, pasamos pel Escalín hasta dar nes Llampes, nel cruce suigimos pela pista limpía de ñeve y puerca de barro, ya tamos cerca d'algamar el braeru oxetivu del día... el coche.

Y ya nel coche queanos elexir el chigre, baxamos per Viegu pa dar bona cuenta de la cerveza nel Puente Bidosa.

Remenbrando los 12 km, les 6 hores, los 1400 metros de desnivel y esta segunda vegada qu'el Recuencu nos dexa ensin retratiar el so buzón, un poco de vagancia y un muncho de ñeve nun lo ficieron posible.

01-05-2010 Xenra

2010-05-01T09:14:00.000+02:00

VEGA TEON-VEGA TRAVIESES-VEGA ORANDI-PICU XENRA-CUADONGA

Güei pasen Ana y Hugo a buscame, quedamos na desviación a Corao colos de Xixón, Milin tamién va en coche. Tomamos un café mentanto llega l'autobus.

Va repletu, baxa Jordi a recibinos y tiramos pa Cuadonga, la carretera a los Llagos cortá, menudu control, l'exercitu acoxona menos, menos mal que llevamos el permisu pa subir.

El día ta murniu, amenaza agua, posasé del autobus y la solicitá semeya de salía, agora ya podemos entamar a caleyar, que guapo, ta too cuesta abaxo, de momentu.

De pronto tamos per mediu la Braña Fana (924), hay que tornar, pasamonos de frenada, unos metros p'atás y atopamos el senderu, ye seguir a la contra la renombrá ruta de la Reconquista, camín que dicin siguieron los moros fuxendo de les pedraes de los civilizaos cristianos, que lleciones da la hestoria, agora son los palestinos los que anden tolos díes coles piedres na mano.

Subimos la cuesta les Porqueres p'algamar la Vega Fondos (894) y L'Aspra de Fana (998), reagrupaos pasamos el Colláu Sellón (936), na Vega Travieses facemos un altu pa xintar daqué...

Los meniskinos, y dalgún grande, paez qu'anden de competición, los repechinos faen entrar en calor y el mugor fai dir con tientu nun arrastrar la cara pol suelu.

Otru reagrupamientu, el motivu esta vegada ye esi, reagrupase, ...y nun te tes quietu qu'enfries.

Agora unos animalinos con cuernos faen que los meniskinos paren la so carrera por llegar enantes que naide, que bona llabor faen les vaques, el mundu al revés, les vaques faen de pastores.

Atopamonos con ríu Mestes, un filín d'agua, dexamos el puente atrías y dudíamos si dir pela drecha o pela manzorga, un poco más alantre cruciamoslu.

Tras saltar una sebe damos na Vega Orandi (520)una pergüapa campera pero poco afayaiza, nun hai piedres y la yerba ta humeda pa posar la culera.

Alcontríamos posaeres onde xintar seliquinamente, asomomonos a la cueva, vemos desapaecer el ríu, que apaez maxicamente na Cueva de Cuadonga, atractivu turísticu bien asentáu, na meyor que meter a los curas por medio.

Tras un buen ratu dividimonos, pa un lláu l'esclusivu grupu que va en busca duna sidra bien fresca y pal otru los sufriores, a sudar, a empericotase nalgún cumal.

Adientrámonos na biesca, los goterones de sudu ayuden a amugar el resbalosu suelu, les argomes faen que los pasos sean más áxiles. Coxemonos a la cruz que remata esti cumal, Peña Xenra (756), buenes güeyaes anque'l día nun tenga la visibilidad que merez l'esfuerzu fechu.

Tras d'una bona ración de semeyes otra vegada saltando pente los gorbizos, vuelta a la Vega d'Orandi, a la cueva, y llargu ratu asemeyandose.

Dexámoslos dientro la cueva, bien pensamos que garrarén el camín más curtiu y apaecieran na Cueva asustando a los turistes, glayando al cayer col remexón.

Ponemonos no peor al oyer les atronaores campanes, o tan cellebrando la apaición o afogaronse na charca. Na de na, apaecen detrías de nos. Pasamos el Colláu Orandi (533) y pel Monte Auseva... cuidadín nun escorniase.

Desembocamos en Cuadonga (260) queanos la afanosa escalera al cielo, perdón, a lo alto la cueva sortiando turistes. Y buscar l'autobus que casualidad, ta no cimero'l llugar.

Son les 18:20, bona hora pa pone-y fin a esta caminata de 11 km. y 385 d'ascensu, p'abaxo fue bastante más. Camudamonos, dalgunes perfumense y too, y recoyemos al gruesu la espedición... nel chigre.

Coyemos el coche y sobre la marcha decidimos dir tras l'autobus, taba cargau de tortielles y llambionaes, tras probar casi que de too colamos pa casa, una ducha y a la espicha despedida de Cristina ...esta ye una aventura de verdá, déxalo too y cola pal Africa negra.

27-04-2010 Caniel.las

2010-04-27T11:31:00.000+02:00

XICHON-BRAÑES ALTES-CANIEL.LAS-COSTAPIEDRA-BRAÑES DE LA FILTROSA-XICHON

Güei a les 8:00 salimos Angel, Juan Carlos, Bernardo y Yo, nel pantanu de Pilituertu col cafetín y el periódicu esperamos por Alberto, Riestra, Emilio y Eduardo.

El pan mercámoslu un poco más alantre. En Xichón (1060) relluma'l sol, dexamos los coches na solombra la ilesia.

Mal asuntu, tenemos l'oxetivu a güeyu, apetez más baxar a Cangas, algo de ñeve tien y pindio tien de sobra.

Son casi les 11 cuando entamamos a caleyar, llegamos a les Brañes Altes, cuadres agora feches bones cases, dalguna asemeyase a un almacén nuclear diseñau pol mismísimu Gaudi.

Los del gps cueyen la pista de la drecha, tapecía pola ñeve, agora tienen que baxar un buen cachu p'algamar el colláu d'enfrente.

Tamos a la vera'l Caniel.las, ta creciendo'l condenáu, recobramos l'alientu y comencipíamos l'ascensión, el senderu pierdese pente les escobes y les escobes entamen a tapecer les testes.

L'alientu perdíu pel camín, resoplíando algamamos el cumal, Caniel.las (1921), debaxo de nos Monesteriu D'Ermu y el fayéu que sube lladera arriba hasta los cumales del L.lagunachu, Rubio, Grachos... tamién hay mines y rastros de mines.

¡Noticia! un guardia que nin llevantaba la vista nin falaba, solo emitía gruñios, entrugó por nosotros, habíemos pisao una zona restringía.

Cuatro arbolucos a la vera una pista que nun abandonamos, al lláu, les Brañes Altes onde taben arreglando una casa, con formigonera y tou... nun parque singularizáu poles mines, les más a cielu abiertu, que dexen basoria abondo y amás nun paguen a los trabayaores.

Tres paisaninos meten más ruidu que les pales y la dinamita de les mines, pa colmu, entrugau pol meyor sitiu pa tornar, diznos el illustrau que lu metemos nun compromisu que nun sabe si esa lladera ta acotá. Osos nel monte y mastuerzos nes conseyeríes.

Na señalizao nel mapa, hora de xintar y tentar la bota vino, agradecios a l'autoridá baxamos dando un buen rodeu, algamamos los Altos de Morteiro y Costapiedra (1820) pa baxar a les Brañes de la Filtrosa (1624).

De vuelta en Entrerregueros (1520) y a Brañes Altes, reponemos llíquidos na afayaiza fonte y seguimos pela pista hastar dar colos coches a les 17:30.

Damos bona cuenta de la fonte'l pueblu, beber, llavase y volver a beber, agora toca meter los pies, demonios, nun quieren, l'agua casi xelu.

Falando colos paisanos, nun saben ná de zones prohibíes, si fueramos paisanos teniemoslu ostiao.

Recobraes fuercíes nel chigre de Ventanueva tiramos pa casa, queden 140 km. dempués de caleyar 15, en 6 hores y 4o minutos subimos un desnivel de 1070 metros.

14-04-2010 L.lagunachu

2010-04-14T21:25:00.000+02:00

FONDUVEIGAS-GRACHAS-L.LAGUNACHU-FONDUVEIGAS

Recueyo a Riestra na estación de Llugo y tiramos pa la Capital en busca de los otros dos espedicionarios, Juan Carlos y Bernardo, en Zarréu paramos a tomar un café.

Tamos en Fonduveigas (750) sudando pa dexar el coche, entamamos a caleyar, son casi les 11, el cielu ñidiu y el termómetru empecináu en nun pasar de los 3º.

Baxamos unos metros pela carretera pa enseguía coyer una pista a la drecha, va a la solombra penta la biesca, asina y too queanos poca ropa por quitar.

Ya tamos pisando ñeve, manchuques pequenes. Na Braña Fonduveigas (1517) fina la pista, tras casi 2 hores bien mérecios taben 10 minutos pa reponer fuercíes. Sentase na mesa, tal había, ñublase y char el termómetru a furrular, !p'abaxo!.
Poner la chaqueta y p'arriba dando-y ensin parar a les patuques.

Pala manzorga y chaqueta a la mochila, les cotoyes tan separtaes un metro, ficierón una especie de camín, nun vamos nin fozando nin rascandonos con elles.
Llegamos a los 1650 m. ñeve abondo, árgomes y monte baxu.

El meyor camín... !ya tá! una llínea reuta. Más duna cotoya y dalgún rebollu nun lo ficierón del too posible.
Son les 14:15, tamos nel Picu Grachas (1862) tira l'airucu fríu y el cielu aborrinase entovía más.

Dexá la tarxeta de los Meniskos nel buzón, que trabayu cuesta escribir, a mi siempre, pero agora coles manes casi que conxelaes nun vos digo ná. Y agora que casi naide les devuelve...

Apenes se güeya Xedré, Monesterio d'Ermu, el Caniel.las, casi ni los que tenemos al lláu, p'atrás aldovinense el Tesu Mular, el Puertu'l Traxeitu, el pueblu del Rebol.lar...
Hai ñeve abondo, baxamos pel filu la crestería cuna pata na ñeve y otra nes árgomes.

Baxamos 100 metros, recuperaos desmenu pa
algamar el cumal del L.lagunachu (1868), güarecios del vientu sacamos les viandes y la bota vino, bon vinu que nos dexó Angel la última vegada que vieno con nos.

Col bandullu enllenu de xamón y chorizu camudamos de plan, tirámonos monte abaxo en busca de la L.laguna Brañolina (1701) atopámosla xelá y tapecía pola ñeve y la borrina, nun se fundio y eso que tabemos enriba, unes semeyes dempués seguimos col caleyar.

Tuvierón el sanu xuiciu de cortar les escobes, anque sea solo pal pasu d'un paisano, nun faen falta cartelos, ye imposible salise del trazau. Damos nel Regueru del Torbosu, casi en llínea reuta baxamos un desnivel de 400 m.

Siguimos col trazau, qu'intenta siguir l'antiguu camín. Cruciando'l regueru ya enllana un poco, finamos en Fonduveigas a l'altor la Ermita de San Salvador.

Apenes son les 18:00, lo que faen 7 hores caleyando, 1200 m. d'ascensu y 14 km. recorrios. Paramos como ye costume nel crigre'l pueblu, esta vegada el paisanu insiste en que vayamos a ver los osos. Facemos-y casu, ensin dexar de tocar la tiesta, nun fuera que nos tuviera tomando'l pelo, había osos, pero taben a lo suyo asina que colamos pa casa.

10-04-2010 Canillín

2010-04-10T19:15:00.001+02:00

BARCANOS-COLLAU ORDES-VASU-CANILLIN-PUENTE BIDOSA

En Xixón a les 8:15, entama la temporada de los pantalones curtios, ta despexáo y fai un friu de coyones, vamos en dos coches, nun Carlos, Queco, Ana P. y Victor.

Nel otru Yo, nun ye qu'el burru vaya delantre, anque nesta ocasión coincida, ye la costume de nomar primero al que lleva'l coche, Josito, Mercedes y Pilar. En Cangues desayunamos y xúntasenos otra Ana, ya vamos pela V.

Dexamos un coche en Puente Bidosa y subimos los otros dos carretera d'Amieva, en pasando la curvona, nos Barcanes (447) al lláu'l ríu del mismu nome, allí los dexamos.

Hai xente presta pa facer barranquismu, nosotros vamos caleyando pela pista p'arriba, un toutarren ponnos de polvo perdios, pudo ser peor, taben cuchando con aspersores. Vamos a la solombra un buen fayeu.

El día ta calurosu y el sudor entama la so función d'empapalo too. Les güeyaes a Amieva y a so sierra recompensenlo bien, llegamos al Colláu Ordés (1142), agora si qu'amoriamos.

Sentámonos nel suelu, los Picos nevaos y el Tiatordos, que se pue dicir desti cumal... Vansenos los güeyos, de los picos al muestrariu de chocolates, bebides, ¿na d'alcohol? y la llección sobre les bondaes de les barrites enerxétiques.

Atalayamonos un poco más arriba pa ver meyor el paraisu entovía ñatural, ensin torretes llétriques nin molinos de sanchu pances... tamos nel Picu'l Vasu (1196).

Baxamos pela Valleya'l Aceu y pente la biesca empicotámonos na Llampa (1152), tamos bien, danos el sol y tamos comodos, topamos un bote pa dexar la tarxeta cumes.

Dabemos de bona gana por finada la xornada... si llegara l'helicópteru.

Pero na, Victor y el dichosu gps ya tan no fondero'l valle, en metá la biesca, nun se güeya na, tapalo too'l monte, finamos toos detrás del aparatu. La fueya y la folla faen que s'esnidie en forma.

Ya vemos a Victor empericotau na cume, p'allá vamos, llegamos resopliando, hai que da-y la razón, l'esfurzu merecía la pena.

Les tripes reclamen, ye hora de xintar, xunto a la cruz del buzón; Picu Canillin, 1106, el llugar, tranquilu y vistosu, los buenos alimentos y la meyor compañía y les ñubes que colarón enrabietaes pa Dios sabe onde.

Colamos fastera abaxo, subimos pel Monte los Joos hasta'l Cuetu Jo (971) vamos averaos al abilsu, na Cruz del Picu atopamos el meyor pasu.

Vamos siguiendo el senderu, tiznau con manches azules, cruciamos pedregales pa finar en metá la biesca, pel Seu Los Cabidos algamamos el Ríu Redonda, bucolicu llegar con tabayón y too.

Pente la biesca seguimos hasta algamar la carretera , tamos nel Puente Rilluengu (270), dende arriba vemos que quieren dir p'Amieva a polos coches, convencémosles qu'anque cuesta arriba ta más cerca Puente Bidosa.

Un kilometru carretera arriba, agora calienta perbien, Carlos y Josito tienennos prepara la cerveza bien fría, ellos ya van cola segunda, tampoco nesto somos p'atayalos.

Tras camudanos colamos a polos coches, resultarón ser 940 m. de desnivel, 11 km. y 6 hores y media baxo un relluciente llorienzu.

Y corriendo pa casa, duchase, camudar de mochila y a trabayar, puntual eso si, anque sea polos mios pelos.

09-04-2010 Tresvisu

2010-04-09T23:03:00.000+02:00

SAN ESTEBAN-PICAYOS-TRESVISU-CANAL REÑINUEVU-URDON

Na Corredoria tan Felix y Adolfo, son les 7:45 y nun apaez naide más, en Colunga, de la comitiva de Xixón solo apaez Pedro. Enantes de cruciar la frontera paramos a tomar un cafetín.

Dexamos un coche en Udrón y subimos a San Esteban de Cuñaba (280), tras coyer agua asgaya plantámonos delantre los cartelos orientativos, nún, ta escrito 3 hores y media, nel otru 4. Son les 10:30 y ya tamos paraos nel mirador.

Baxamos unos metros pa cruciar pela pequeñina y encantá area recreativa, el muxu, les fayes, l'agua corretiando pente les piedres... la poesía da pasu al sudor. Tamos pol monte Robicores y el senderu anque paezca imposible empínase vez más.

Tras esguilar pela Canal de Les Texuques llegamos a la Canal del Infiernu, hay cable p'agarrase pero pa mi gustu quearón un poco escasos, vamos con cuidadín que un pasu mal dau son unos cientos de metros a lo fondero'l infiernu. Una güeya p'atrás y nun s'atisba'l fondu, asina que siguimos direición al azul cielu.

Algamamos el Colláu Cabreros (800), lo primero recobriar el resuellu, diez minutos dempués esfrutar del paisaxe, xintar daqué y facer abondo semeyes... el Desfilaeru la Ermida, un montón de picos, nin una ñube, estirando el pescuezu llogramos ver el Ríu Deva debaxo les chiruques.

Seguimos col caleyar, subiendo y baxando, entamen a apaecer cables fincaos na paré, unes vegaes muy necesarios, el ríu discurre 700 metros per debaxo y pues dar na oriella d'enfrente ensin coyer impulsu ningún, les más delles hay más pelligru con cualquier baldosa suelta na cai Corrida, pero yá que estan voi dexando la buelga en ca metru cable.

De frente nun se pue seguir, pa baxo como nun sea rodando... p'arriba unos tablones paecen los toriles de los sanfermines, ¿el serviciu de mantenimientu será bonu? ¿o finará daquién finando con tablón y too no fondero'l ríu?.

Nosotros a lo nueso, pal Cantu Morón, una vuelta otra revuelta y algamamos el mayor altor de güei, la H.orcadura'l Cantu (950) y empobinamos pal chigre ensin perder de vista'l caseríu de Tresvisu.

Son les 14:00, unes semeyes y pala solombra'l chigre, dexar les mochiles, retorcer el pañuelu, un llitru d'agua sal desi trapin... unes botellines de sidra y a la mesa, cabritu a preciu d'oro y el paisanu que tras entruganos sobre nuesos planes fainos empapizar cola so respuesta: nun vais llegar de día y de nueche nun llegais.

Danos abondes esplicaciones, ofreznos el teléfonu, llamá-yme si nun veis claru'l camín, muestranos abondo semeyes, incluso col dichosu google, eso si retrasíonos un cachu al insistir en cobranos la comida.

Baxamos fasta'l Riu Urdón a 430 m. pasando peles invernales de Llosa Cima, tardamos casi una hora en dar coles ñaples nun montón de cartelos; prohibiu'l pasu, zona pelligrosa, nun pasar... el mismu mensaxe con paecíes pallabres.

Crucíamos el Ríu pel Puente Bardina y pel muru de contención allantre vamos guardando'l equilibriu, cola manzorga bien preparada pa coyese del allambre que nos separtía del abilsu, y con más tientu ainda cuando nun s'afaya tal allambre.

Abandonamos la canal unes cuantes vegaes, la primera pela parte baxo, averaos a l'abandoná casa del guardia pa cruciar pel puente del Ríu Chicu.

La canal bien arribona, p'allá s'empobina'l camin, otra vegada a la canal, nun se cuantes veces la crucíamos, pero más de mil seguro, unes veces p'arriba y supongo qu'otres tantes p'abaxo.

Agora paecemos moninos, nun vamos peles rames pero si de troncu en troncu pa nun rodar llámbria abaxo, tamos en Piedres Negres, gracies a que hay poca agua pasamosla relativamente fácil. Y otra vez p'arriba.

Agora el cable paez que lu puso un xigante, voy col brazu llevantáu pa poer garrame, n'algunos llaos ta sueltu y quier chate fuera, pal derribaderu o pal canal, qu'entovía nun lo dixe, baxa llena y con bastante fuercía.

Tengo un especial recuerdu destos cien metros que vienen agora, como la idega de tornar al chigre nun val ya, hay qu'elexir; averase a la paré rascandola perbién col cuernu drechu mentanto un buen chorru d'agua va cayendote pel costazu o dir 10 cm. más p'afuera con un pie nel resbaliosu camín y l'otru nel aire col ríu 500 m. más abaxo.

Nun s'acaben les sensaciones, el corredor de Matallana, meyor güeyar les semeyes, unes lloses de formigón suxetaes al murallón pétreu por unes alambrines, que respigos solo de pensalo.
El senderu sal monte p'arriba hasta que-y da por baxar hasta la canal, metemonos pel Tunel Cantilucu, unes chapes faen de suelu, y de techu... d'algún coscorrón.

Ya voy cansaú y hasta los... de la... canal, nun m'alcuerdo si vamos perbaxo, perriba o nadando, unos atronaores berrios rompen el silenciu y nun dan ninguna tranquilidá.
La tradicional senda a Tresvisu, que ganes tenía de retratíala, pues nun hay manera, el contraluz, la borrina, mecagüen...

Un senderu tira p'arriba y otru p'abaxo, decidímonos pol que tira p'arriba, bien, salionos bien. Llegamos a la caseta, d'aqui vienen los bramios, nun nos tranquiliza muncho, paez una cafetera a puntu reventar.

Pese a lo afayaizo del llugar y ensin contar el chigre, ser l'únicu trozu llanu del día, fuximos escaleres abaxo nun vaya reventar esta vieya cafetera, y pela Canal d'Aileres algamamos la Central de Urdón (100).

Adolfo baxo corriendo pel pedregal, nosotros vamos más despacin mirando bien donde posar los recalquiaos pies, unes semeyes al ríu, agora ya tamos al mismu altor, y a recoyer el coche a San Esteban de Cuñaba. Menos mal que llevamos dos coches, son les 20:30.

Caleyamos 9 hores, una más paraos xintando nel chigre, ficimos 23 km. y 1325 m. d'ascensu... y dos conseyos, el primeru dir con un guante pa coyese al cable, onde lu haiga, y el segundu, llevar unos calzonciellos de repuestu... por si les mosques... que siempre van a la mierda.

Ye broma, dacuando hai que mitificar les coses, crear lleendes, como qu'el Madrid ye campeón d'Uropa.

01-04-2010 Camín de la Reina

2010-04-01T20:05:00.000+02:00

ARGOLIBIU-PERVIS-PUENTE DOBRAQuedamos en Xixón a les 11:00, faiseme tarde, asina que colo pa Cangues. Cuesta trabayu aparcar, mentanto la xente va dexando los coches tomo un cafetín.

El día ta frescu, anueche ñevo bastante, vense los picos bien blanquinos.

Vamos a cual más despistáu, unos esperen en Cangues, otros pasense'l cruce y tienen que tornar, pocos aparcamientos pa tantos coches.

Y venga querer traer turistes a estos paraxes protexios y ensin infraestrutures, meyor que ni les discurran... Alá nos pille confesaos.

Finamos n'Argolibiu (360), tras dexar los carruaxes, char proteición solar, el sol aprieta perbien, coyer agua y dalguna manía más, son les 12:45 cuando entamamos a correr carretera abaxo persiguiendo a los meniskinos.

Nel Puente'l Molín (220), dexamos la carretera, ponse pindía la muy condená, asina qu'abrimos la portiella y seguimos pol embarráu camín Valle Carmeneru abaxo.

Ca vegada más estrechu, eso si con menos barro tamién, subiendo y baxando, cuna breve paradina pa repostiar fuercies llegamos al Colláu Gües (215) y d'aquí p'abaxo fasta dar col ríu.
Vamos averaos a la Xerra'l Trexerru per un lláu y pela drecha tenemos el Ríu Sella y la N-625. Caleyamos a la solombra dunos castañales enllenos de muxu que dan-y un aire máxicu al llugar.

Pasamos de soslayu los pueblos de Sames primero y Precendi (140) dempués, el camín ta invadiu por unos arbolones que valtio'l temporal, ye más fácil bordialos que saltalos, ya puestos bordiamos tamién dalgun qu'otru barrizal.

Incluso aquina topamonos con dalgún coche, pasamos del puente colgante de Precendi y seguimos darreu hasta una pergrande area recreativa, bien pertrechaos pa pasar el día tamos lo xusto pa xintar unes bones viandes.

Ya hay fame, son más de les tres, la solombra del area, el agua, los columpios y el xintar apriesa de los meniskinos pa poer ver la película nel más xigantescu cine imaxinariu enxamás imáxinau.

Crucíamos el ríu y dudíes, l'agua nun lleva el mismu camín que nosotros. Aclariao, agora vamos a la vera'l Ríu Ponga, un trocín pel asfaltu y de nuevu al senderu.

Y al Ríu Sella, subiendo y baxando pasamos pega-ynos al puente Los Brazos. Hay bonos repechos, sobre too col soprepesu del bocadillu nel bandullu.

El condenáu senderu nun dexa de ganar altor, fina cediendo a nueses plegaries y ya baxamos a Pervis (120), acabamos crucíando el Sella pel puente colgante nes meceures del Dobra (100).

Tras recoyer los coches n'Argolibiu ya nos sentimos capacitaos pa tomar una cerveza y otres caxigalines nel chigre del llugar. Fuerón 5 hores y unos 12 km. y 200 m. desnivel, 11 meniskos y 7 meniskinos.

27-03-2010 Peña Brava

2010-03-27T17:37:00.001+01:00

PORCILES-SOPIEDRA-CERRU ÑAÑU-PEÑA BRAVA-ESPINAREU

Tras dudialo non munchu ratu que entovía ye muy ceo, voy hasta Xixón, ya tan casi toos esperando al sol, da-yós la bienvenía a Mercedes que s'estrena güei con nosotros, repiten Ana V. y Pilar amás de Mª Paz, Marta, Josito, Milin, Jordi, Victor, Raquel, Toño y el mismísimu Yo.

N'Infiestu paramos a almorzar, col banduyu templáu allegamonos a Espinareu, tras un estudiu concienzudu sobre l'usu les polaines dexamos un coche y colos otros subimos fasta Porciles (500).

Tras dexar los coches, trabayu costó, y la semeya de rigor, entamamos a caleyar pela pindia pista pa ver el coche ca vez más abaxo y más abaxo ainda l'otru coche quietin N'Espinareu.

Xiramos a la drecha pa rápidamente tar nel Colláu Espina (830), mentanto unes queden asoleyándose, los otros empericotamonos nel Picu Sopiedra (933).
Entamen a apaecer picos ñevaos delantre les nueses ñaples.

Volvemos al Colláu pa sacar de la modorra a estes muyeres, agora vamos un poco contra-baxo, pasamos peles cabanes del Pendedor (730), p'allegría de Raquel topamos algo de barro pero nun da nin pa emporcar les polaines.

Darreu seguimos pel senderu, avistamos unos corzos que intentamos atayar, nin de lexos lo conseguimos, la xente va llegando cola llingua fuera a un colláu (871) que nun yera necesario visitar, baxamos un trechu pa'asitianos nel Colláu Llaranes (914).

Seguimos esguilando, agora p'algamar el cumal del Cerru Ñañu (1074), les vistes maravielloses pa tolos alredores, el calorín y la xente que nun saca'l bocadillu, paecen querer más.

Baxamos evitando les cotolles, una manía más, pa llegar al Colláu Ñañu (874), sentadinos un ratu na campera observando a una manada de caballos que pastaben, hasta agora, tranquilamente nel llugar.

La xente quier seguir esguilando, el día ta pa ello, colamos pa Pena Brava (971), una llarga crestería que va faciendose ca vez más llarga. Cuando al final llego ya ta la xente desparramá pel suelu y con bocadillu ente les manes.

El llugar que nin pintimparau pa sentase y xintar, y hasta pa char un pigazín, a que si, bueno nun voy dar nomes.

Volvemos a revolotiar ente les árgomes pa llegar al Colláu Andolléu (900) y coyer la pista. Pasamos peles Galleres pa llegar al Pedrosu (480) onde unos paisanos tan afumando chorizos, somos munchos pa que nos inviten.

Tras coyer agua, y bebela, que calor facía, seguimos, agora pol asfaltu fasta enllazar na Cruz (280) cola carretera que baxa de Rifabar, colamos seliquinamente a la vera'l Ríu Espinareu fasta entrar na Villa (237), barriu d'Espinareu a les 17.20 desti soleáu día.

Resultó más urxente enfrescar los gargüelos que dir a polos coches, enfrescamoslos y dimos-y a la llingua lo que fizo que se volvieran a resecar, tras volver a enfrescalos subimos a polos coches.

Baxamos y seguíen enfrescando los gargüelos, yá nun se-yos oyía nada, taben roncos perdios, y menos mal que güei nun conducíen.
Fuerón 881 m. d'ascensu durante 15 km. y 7 hores.

26-03-2010 Llosa Viangu

2010-03-26T07:07:00.003+01:00

PEREDA-CUESTA CABALLU-VALLE MIXARES-LLOSA VIANGU-RUMORU-PEREDA

Güei como otres munches vegaes dibemos dir pa un sitiu y finamos n'otru, l'home del tiempu paez tener daque encontra Degaña, asina que colamos pal extremu contrariu.

En Villaviciosa espérennos Emilio, Eduardo, Alberto y Riestra, dende Uvieu venimos Bernardo, Juan Carlos y Yo.

Tiramos pa Llanes, tras pasar con éxitu'l radar de la Guardia Incivil llegamos a La Pereda (46), a la solombra la ilesia dexamos los coches, nosotros ponemonos a caleyar baxo'l sol.

Anque entovía nun caliente enforma vamos a buscar la solombra de los ocalitos, crucíamos l'arroyu de Les Pises y tardamos un ratín n'atopar el senderu buenu, bueno, el que meyor nos parecio.

Tras empericotanos nel Ribazu vamos subiendo pela Cuesta'l Caballu hasta dar cola portiella (400) que nos dexa na Paré del Texéu, seguimos hasta lo cimero del cordal (650), les ablucantes güeyaes al Cuera y a la Costa recompensen l'afanosa caminata.

Los piornos y lo cársticu del terrenu nun faciliten na l'ascensión, anque ya nun quea na que subir, baxamos peles Picoretes (570) y Les Berodies.Tiramos pala manzorga, ente braña y braña algamamos La Cutera (620), tras güeyar el valle Mixares damos la vuelta y baxamos al Valle la Raiz (450). Caleyamos ente asturcones peles camperes verdes y llanes.

A un llau'l Monte Traviesu que nos tapa'l Cantábricu, al otru la fastera norte del Cuera col Turvina arribona del too que dexanos ensin ver los Picos, asina ye la Llosa.

No más estrecho, en pasando La Llaguna atopamos un llugar afayaizu, eso y el ruxir de les tripes faen que casi ensin danos tiempu a sentanos ya temos xintando.

Pegaos a la muria duna cuadra, dando-y un mordiscu al bocadillu y tentando la bota vino, les manes entamen a ponese igual que les oreyes, ¡tieses!. El día tornose fríu y gris.

Finamos de xintar, en comprobando que nun queá rastru de nuesa estancia seguimos p'alantre, salimos de la Llosa pelos Bardales (641) y Les Cuestes.

Volvemos a güeyar la mar, xusto al mismu tiempu qu'entama a moyasenos la cabezona, chamos un ratín debaxo d'un árbol, nun acaba de venir la ñube. Arrancar y entamar a cayer agua como si fuera un cataclismu.

Pasamos per Les Camperes (450), una pergüapa atalaya, seguimos fastera abaxo hasta dar en Rumuru (209) unes cases en ruines y un rabañu de vaques faméliques que dexamos atrás al igual que la ñube nos dexa a nosotros.

Tamos na carretera que sube al Mazucu, nos 3 km. que nos queén carretera abaxo danos tiempu atopanos con un xabali y un par de corzos.

Pasamos xunto a la ermita de Sta. María p'algamar La Pereda onde enantes de camudanos damos bona cuenta de la fuente. Buscamos un chigre onde no nos tomen por turistes, tomennos por pites pintes y desplumennos perbien.

Ye díficil d'esplicar pero güei p'algamar la cota de 677 m. subimos 1048, y durante 8 hores recorrimos 18 km.

22-03-2010 Gamonal

2010-03-22T13:55:00.001+01:00

LOS CUERVOS-ANGLIRU-GAMONAL-CALZA-PAN DE LA FORCA-LOS CUERVOS

La primera na frente, el chigre escoyíu p'almorzar zarráu por obres, non muy lexos alcontríamos otru, menos mal.
Escaecíaseme, güei somos Victor, Josito y el que inventa estes hestories.

Pasamos de Viapara enriba solo un poquiñín, nos Cuervos (780) al llau d'un vertideru pirata dexamos el coche y entamamos a caleyar, son les 10:30 y por mor de la borrina nun vemos ni la punta les chiruques.

Carreterina arriba enseguía nos ponemos percima de les ñubes, el cielu d'azul intensu, a lo lexos destaquen el Picu Torres y los Picos d'Uropa, más cerca aldovinamos La Mostayal y El Monsacru.

Vamos pasando cartelos y gracies a los ciclistas famoses cuestes como la Cuenya les Cabres ná que nos atascamos un poco, non pol desnivel, el 23% nun ye ná pa nosotros, pero la ñeve cubríala entera y les vistes o ¿yera'l dir col fígadu na boca? merecíen que nos parásemos a cada pasu.

Na siguiente curva atayamos monte arriba, ñeve abondo y demasiao blanda fizó malu'l remediu.

Vuelta a l'asfaltu, algamamos el famosu Angliru (1560) un ratu asoleyándonos baxo'l ñidiu cielu, recobrando'l resuellu, refrescando'l gargüelu y xintando caxigalines enantes de colar al frente, La Gamonal ta esperandonos.

Semeyes varies, vistes p'atrás y de golpe al llau del buzón, del vertice geodesicu y del tenderete de proteición civil desvenceyaú pol airón. Más semeyes y más güeyaes alredor, Uvieu y Xixón baxo l'inmensu mar de ñubes.

Siguimos pela ficticia Ruta de los Ñeveros, en dalgún sitiu espublicitá y ensin marcar en ningún tramu, güei nomala bien Victor, "ente'l cielu y la tierra", dir vamos percima les ñubes.

Crestería alantré atopamos el Monrasiellu (1660) y la Calzá (1675), trabayu cuesta baxar, tase perbién aquí arribona, la ñeve y el terrenu cársticu faen que los pies tarden n'atopar el suelu.

Llegamos al picu Garma (1622) Victor tien una ocurrencia, suxier parase a xintar.

Resultó tar de broma, una hora dempués entovía tabemos buscando un llugar afayaizu.
Acomodámonos nel Mayau Fonfría (1560), facía ratu que teníemos los güeyos puestos nél.

Algamamos a Fontazán (1350) una bona fuente, la infraestrutura, porque l'agua nun se vía per nengún sitiu. Xintamos seliquinamente, el sol calecía lo xusto pa nun fadiar.

Nun vemos la forma de baxar por nengún sitiu, recorremos el precipiciu
hasta dar col Tambarón del Fontazán, nun me faigas munchu casu y menos en cuanto a nomes, bueno tampoco ye asina, muy equivocau tampoco taré, un senderín casi como una escaleruca dexanos nel Mosquil (1200).

Una bona fonte onde recargar, el non muy calusoru día traíamonos coles reserves escases, dexamos lo xusto pa que les cucharapes fixeranse ranes.

Seguimos darreu col camín, rodíamos pa nun metenos nel barro, finamos nel mismu sitiu embarraos y con bones alcordances de les cotolles. Pasando el Cantu Videu (1138) parámonos en Pan de la Forca (1040) a los pies de la Mostayal, vamos dexala pa otra vegada.

La borrina va chandosenos encima, baxamos escontra d'ella, casi hasta l'aparcamientu d'Ories (920), seguimos darreu adientrandonos na biesca.

De senderu en senderu ensin atopar nengunu buenu, coyemos una bona sudada, unos bonos repechos ente la biesca son los culpables.

Pasamos pol Abeduriu y L'Ortigal y cuando la borrina y la distancia nos dexa ver el coche tiramonos monte abaxo, algamando l'asfaltu a l'altor de Covachos (1100).

Ya pela carretera coles botes bien puerques llegamos al coche, camudamonos y ensin tiempu pa refrescar el gargüelu colamos pa casa.
Son casi les 7, ya caleyamos unes poques de hores, y 15,3 km. y 1266 m. de desnivel.

10-03-2010 Cabezu Ubena

2010-03-10T21:56:00.001+01:00

TOYU-COLLAU TREBANDI-PICU VIRZOS-PEÑA BLANCA-PICU TIEDU-CABEZU UBENA-COLLAU BERRUGA-TOYU

Vamos finar cola Sierra del Cuera, pa güei dan sol y poques ñubes, va veninos bien pa güeyar los Picos y la costa oriental, finalmente somos 8 los qu'entamamos esta aventura, 8 y l'home del tiempu que nos engañifo miserablemente.

Tras mercar el pan en Villaviciosa allegámonos a Toyu (300), na As-115 cerca de L'Altu Ortigueru, sobre les 10 comencipíamos a caleyar mentando la ñeve va cayendo nes nueses tiestes.

Ganamos altor a medía que los perros nos dexen de lladrar, tras crucíar el Ríu Zobilu llegamos a los Argaos de la Merana pa xirar a la mandrecha.

Algamamos la pista que vien de L'Altu Ortigueru y llegamos a Cerraos (538), seguimos pel senderu de la manzorga camín del Cuetu Ricáu (658). Pela Muesca Salavenizu con guapes güeyaes a los Picos algamamos el Colláu Trebandi (721).

Dempúes d'un ratín pol formigón llegamos al Mayáu Trebandi (795) onde nos guarecemos al par de la paré d'una cuadra. comemos unes caxigalines y damos-y tamién a un mastin.

Seguimos camín, el cielu sigue gris, apenes dos güeyaes de sol p'alcordanos de l'home del tiempu, la ñeve va y bien el fríu nun acaba de colar, guantes y gorros tan presentes na decoración, los paragües non.

Va un ratín que tamos sobre los pasos de fai 15 díes, nel Colláu Virzu (979), tras pechar la portiella ya vamos a esplorar nuevos territorios desta empredraxosa Sierra.

Na Braña d'Asiegu hay una cuarta o dos de ñeve, seguimos darréu pel cada vez más empináu camín, ye un dicir pues ta too tapecío pola ñídia ñeve, como presta pisalá, si fueramos enllano...

Seguimos a Juan Carlos aún a sabiendes de que va mal, ya ta empericotáu nel Picu Virzos (1188) a milenta kilometros del finxu de güei, faltaba-y esti cumal y sin nun tira pa él nun lu facíemos, igual fasta tien razón.

Dende equí vese mal la traza fasta Peña Blanca, l'oxetivu güei, colamos peronde meyor vemos les piedres p'agarrase, tras baxar un bon trechu toca volver p'arriba fasta garranos a la cruz que fincarón na Peña Blanca (1182).

La visibilidá ye escasa, unos rayinos de sol allúmbrennos Llanes apenes un minutu, pa los Picos paez que se fizó de nueche.

Jorge, el mio collaciu del golf, esi si que ye un bon deporte, ta diciendo que va 17 años que nun vien con Riestra y van pasar 27 más pa que lu pille n'otra.

Baxamos pola metá la fastera ensin ni siquier intentar atopar el senderu. Tras unes dudíes de por onde empicotase nel Tiedu, seguimos baxando pasando de nuevu pela xelá Llaguna de Salgar (1007), non la recuerdo de la subida y eso que según el gps casi meto la patuca dientro.

Esguilando pente la ñeve empicotámonos nel Picu Tiedu (1187), tras unes poques de semeyes seguimos fasta'l cercanu Cabezu Ubena (1188). P'aliviu de Jorge coyemos postura ente les piedres y la ñeve pa, resguardaos de l'aire xintar lo más placidamente posible, son les 15:30 y les tripes va tiempu que tan ruxendo.

Agora si que se nota'l fríu, volvemos pel Tiedu pa baxar a la Braña Asiegu, paez que quier salir el sol, a bones hores.
Xiramos a la drecha Nel Mayáu Trebandi pa bordiar el Picu Trebandi pela drecha, caleyamos pela crestería chando de menos les mosques, l'airón danos de tolos llaos, llegamos al Colláu La Berruga (600).

Pa desesperación de Jorge entovía nos queá dalgún repechu. Crucíamos el Ríu Zobilu pa na Merana dar col camín de la mañana, ya volvemos a sentir los lladrios, 7 u 8 perros desos que meten munchu ruidu y un mastin que pasa dellos y de nosotros, tienenlu aburriu.

Llegamos a los coches, menos mal que los díes van siendo llargos, 9 hores pa facer 17 km. y 1532 m. de desnivel p'arriba, y suponse que tamién p'abaxo.

En Casa Morán, bar tienda de los de tola vida, refrescamos el gargüelu y falamos un poco del Madrid, lo que ye lo mesmo que dicir, discutimos un poco de fútbol. Ya ye de nueche y nun vamos llegar a l'entamu del partido.

Coles baxes médiques d'ultima hora de Josito y de L'Andarigu Paco que llegó al llímite d'escondese nun hospital pa nun dir con nosotros... Ya se que tas casi recuperáu, espero nun recaigas al lleer esto y sobremanera qu'esfrutes coles semeyes.

28-02-2010 Porcabeces

2010-02-28T15:11:00.003+01:00

ALTU SAN LORENZU-PORCABECES-SAMARTIN D'ONDESGüei hay personal nuevu, conseguimos llenar un autocarín. En Teverga la cafetería ta enllena de montañeros, en consiguiendo tomar el café vamos fasta L'Altu San Lorenzu (1348).

Fai un fríu que pulga, malapenes coyer la mochila y yá tener el gorru puestu, el suelu ta xeláu y el sol anda a mediu gas.

Coyemos el Camín Real de la Mesa, según los estudiosos ye la segunda etapa. El camín atópase tapáu pola ñeve, casi xelu.

Va tiempu que voy pensando en llegar a la fonte, pa coyer agua y pa entamar a quitar ropa, fai ratu qu'entre en calor.

Nel horizonte tenemos la Sierra de Paramu y de la Serrrantina tapecíes pola ñeve, enseguía llegamos a la Collá Tartulla (1404) onde, non ensin antes enllenase bien de barro, ampliamos les vistes a Peña Rueda, L'Aramu...

Trás un breve reagrupamientu, la xente vien bien despacio, seguimos fasta la Collá Santa Marina (1384) que da pasu a la maxestuosa Veiga Cueiru.

Pasamos de soslayu, tamién de soslayu pasamos averaos al Picu la Berza pa baxar per ún de los pocos trechos qu'enta queden empedraos. Algunos tan formigonandolos, como apocayá comprobélo en Pedraxueves.

Apenes ye la una y media y sentámonos a xintar, frente a nós tenemos tola Peña Mantega, l'azul del cielu yá esta escastáu y el forru polar ya nun se quita nin nes cuestes p'arriba.

Darréu siguimos el camín, pasa perriba la Braña Fuexos, esfarraplá nel suelu, baxamos a la Collá Peñes Negres (1150) p'arrepegar a la manzorga, fastera arriba fasta la picorota del Porcabeces (1210).

Baxamos de frente a la Venta de Porcabeces, va tiempu que cambio de clientela, agora trata más col ganao de cuatro pates. Vamos toos dixebraos.

Esperamos a los últimos na Collá Valbona intentando descifrar los paneles esplicativos de tumulos, necropolis y demás coses anteriores a los romanos que paez ser ye lo que quieren esplicar nestos cartelos.

Nun camín, que nun dexa en negún momentu de ser camín hay monolitos de formigón, piedres rusticamente tallaes que quien imitar a los miliardos romanos, pintaes nel suelu, chapones que ni dios entiende con semeyes de necropolis, tres tipos de señalización vertical...

Solo falta una rotonda o un par de turboglorietes... Y Xovellanos ensin gps nun se perdio per estos andurriales, de xuru que yera un fenómenu el tal Gaspar Melchor...

El Camín acábasenos na Corredoria (889), l'asfaltu ente vueltes y revueltes dexanos en Samartín D'Ondes (690).

Onde a les 16:30 ponemos-y fin a esta caminata de 18,8 km. qu'entamamos a les 10:20; el desnivel güei fue de solo 350 m. d'ascensu.

La xornada vamos finiquitala en Cornellana viendo como el Sporting nos facía sufrir más que l'esfuerzu de tol día.

25-02-2010 Peña Llacia

2010-02-25T22:11:00.001+01:00

ARANGUES-PEÑA LLACIA-BRAÑA RIANA-BRAÑA ASIEGU-ASIEGU

En Villaviciosa quedamos Emilio, Eduardo, Riestra, Bernardo, Juan Carlos, Paco y Yo, pese a les previsiones metereo-ilóxiques decidimos averanos seliquinamente al Cuera. Paco diz que va llover de 12:01 a 12:03 y de 16:06 a 16:17 pero nun acierta a dicir onde.

Ca vez nos fiamos menos del home del tiempu y nun ye porque agora sean casi too muyeres, por cierto que sigue nomándose "home del tiempu"... Sra. Ministra indague, encargue sesudos estudios, gaste en caxigalines les perres que dicen que nun hay.
Pese a toles prediciones acabamos nes Arangues (360).

A les 10:20 entamamos a caleyar, los coches aparcaos no cimero del pueblu, averaos al antiguu cargaderu de les mines agora area recreativa.

La temperatura más bien fresca y el día gris, pasamos pela fonte Devaniegu (725) situá na metá la Canal del Gobiu. En poco más d'una hora crucíamos la portiella na Concha del Gobiu (1003).

Ya tamos coles pates ente la ñeve, na solombra fai frío, enfilamos el cumal de Peña Llacia (1236), averá'l Turvina, xusto nel puntu onde termináramos la última revolada per esta Sierra.

Baxamos pente la ñeve con procuru nun meter los pies en nengún furacu, atalayamonos nuna chincheta y seguimos darréu col descensu.
El sol anque quiera nun calez en forma.

Vamos dir de braña en braña intentando nun salir del camín, díficil en brañu imposible cola ñeve tapeciéndolu.

Llegamos a la Braña Riana guapa, guapa y afayaiza braña, apenes paramos, unes poques de semeyes y seguimos sacando los pies de la ñeve y les rodíes más duna vegada.

Metemonos na biesca, a la ñeve y les piedres sumense los árboles y les rames cayíes. Finamos na Braña La Faba, un par de cabanes esfarraplaes nel suelu... y el cielu que va tornándose negru.

Nun da tiempu a poner los guantes, el chubasqueru, el paragües llevalu l'aire, en menos de 10 minutos tamos empapaos, sal el sol pero sigue diluviando.

Na Braña Tornallás atopamos una cabana onde abelluganos, tras recurrir l'agua sentámonos a xintar.

Nestes condiciones paecía el meyor de los palacios, en roblando nel llibru de visites, ye dafechu verdaderu, barremos la estancia y siguimos el nuesu camín, na fonte de Tornallás (970) coxemos agua, nun ye precisamente una fonte termal.

Les siguientes brañes son Lampudia y Joulespina, les cabanes en buen estau tan cerraes con cuerries. Ganamos altura hasta la Cruz de Virzu, dexando a la drecha la Braña Manzaneda (940).

Col sube-baxa de tol día güeyamos la Braña Asiegu y Peñablanca, tamos cerca pero vamos dexala pal próximu día.

Riestra y Yo llegamos a la Braña La Mata (940), nin rastru del restu la xente, tras esperar un ratin salimos escontra dellos y eso que ye cuesta riba, enseguía asomen pel Colláu Virzu.

Seguimos baxando, agora algamamos la Braña Trebandi (780) y el formigón que nos acompaña hasta Asiegu (420), onde paramos na fonte pa llavase bien per dientro y per fora.

El chigre taba abiertu pero fora de serviciu, entrugamos pol serviciu de taxis, queden en recoyenos en 10 minutos, n'otros 10 dexanos n'Arangues onde tomamos una cerveza nel chigre de la llocalidá... y pa casa.

En total fuerón 14,7 km. en 7 hores y media y un desnivel acumuláu de 1622 m.

08-02-2010 Molinos de Bimenes

2010-02-08T10:46:00.001+01:00

PUENTE LLERA-MOLINOS-SANTA GADIA-BAUA-MELENDREROS-PUENTE LLERA

El tiempu nun nos dexa dir pal Cuera, güei cueyennos Bernardo y Juan Carlos a Angel y a mi.
Nel Berrón tan Alberto, Emilio, Ana y Riestra, son les 9 y llueve guapamente.

Tiramos pa Bimenes, vamos facer la Ruta de los Molinos, y lo qu'el tiempu nos dexe.

A les 10;30 tamos crucíando el Ríu Prá pol Puente La Llera (366), vamos pela oriella del Ríu Rozaes p'arriba... anque'l día te gris y casi baxe más agua pelos nuesos paragües que pol turbiu ríu.

Nuna mano el paragües y na otra la máquina retratiar van saliendo les semeyes a los molinos que paecen salir a nuesu pasu, finamos nel Molín d'Onoriu (500).

Baxamos un puquitín pa char un bocau nel Molín de Fermina, posamos les mochiles y ponse a granizar... como si daquién nostuviera oxeriza.

Nun nos amedrentamos, seguimos p'arriba per un barrizal como va tiempu nun vía, unes vegaes pel camín otres saltando muries pa cruciar pelos praos. Algamamos Santa Gadía (500).

Tamos a un pasu per carretera de onde comencipíamos esta xornada, pero nun vamos a rendinos, coyemos la pindia pista, algo debio pasar que salen toos escopetaos.

N'apenes diez minutos tamos a más de 700 m. d'altitud, nun cruce de caminos optamos por seguir subiendo, ya tamos pisando tierres de Llaviana.

Apenes se güeya na, atopamos un afayaizu llugar na Baúa (828), resguardaos del granizu, algunos sentaos nun escanu, sacamos les viandes y entamanos a dar cuenta delles.
El vino ta frío y les manes paecen querer conxelase.

Finamos apriesa de xintar pa ponese los guantes y seguimos camín alantre pa entrar en calor, la borrina atapez tolos cumales asina que dexamoslos pa meyor ocasión.

Subimos a la Campa Gües (900), nun que otra pa coxer la pista que pasando per Fayacaba (790) dexanos en Melendreros (600).

Agora vamos pol asfaltu hasta rebasar La Envesná (550) onde xiramos a la manzorga pa emporcar les botes, xunto al barro tamién vuelven el granizu y l'agua.

Pasando por casi tolos molinos de la mañana algamamos Rozaes, son les 16;30, bona hora pa pone-y puntu final a esta fría y humedá xornada.

Nel mismu Ríu Prá llavamos les botes y les polaines nun dexando rastru del barro ni... bueno del sudor un poco que l'agua taba muy fría, puru xelu.

En Nava tomamos un cafetín bien caliente, rematando estí día murniu, fríu y lluviosu, fuerón 6 hores pa caminar 16,2 km y 828 m. de desnivel.

03-02-2010 Picu Mua

2010-02-03T16:30:00.000+01:00

MONTECOYA-PICU MAYOR-PICU MUA-FOCES DEL PENDON-FUENTESANTA

Desta vegada colamos Riestra y Yo col enfotu de preparar una ruta pal grupu de montaña.
A les 9 tamos en Nava, ellí quedemos con Toño que va facenos de taxista.

Tras dexar el coche en Fuentesanta, famosa pol so agua, averanos Toño a Montecoya, son les 9:40, fai 1º de temperatura, tamos a 163 m. d'altitú nel kilometru 360 de la N-634. ¿quereis más númberos?.
El formigón ta xeláu y pa ser los primeros pasos del día esnídiase enforma.

El cielu ta nidiu, vamos pel medio una biesca de nueva xeneración, pente los pinos güeyamos el conceyu de Nava, tamién el de Sieru, Llanera, Piloña...el Sueve...

Intentamos atayar, enseguía renunciamos, hai demasiaes árgomes polo que tornamos a la pista.
Dexámosla un poco más palantre pa empericotianos nel Picu Mayor (784) coronáu por una pergrande bandera d'España.

La última vegada que tuvimos equí la borrina tapecialo too y metimonos nun bon cotoyal, daprendía la lleción güei baxamos pel mismu sitiu que nos traxo y seguimos pela pista.

Baxamos a la Collá Maza (556) y por un más que pindiu senderu damos colos güesos notra afayaiza pista, tan afayaiza que tenemos que desandar un trechu en busca del meyor sitiu p'algamar la crestería.

Crestíando llegamos al cumal de La Trapa (795) y ensin mirar p'atrás llegamos al Picu La Mua (987) bona temperatura, bones vistes anque haya algo de ñublina, algo de ñeve...

Tras les semeyes de rigor seguimos cola mesma direición pasando pelos picos Los Verdes, tan na solombra, la ñeve entovía tá xelá, seliquinamente nun resbaliar algamamos La Muezca Les Fuentes (877).

A Carbayal llegamos cola folla percima les rodíes, un paisanu y los sos perros dannos la bienvenida, entrugamos-y pel camín y aconseyanos que demos la vuelta y coxamos otru senderu.

Facemos-y casu, pero el ruxir de les tripes ta acoseyandonos otra cosa, sentámonos a cabilar, y eleximos da-y prioridá al ruxir...
Nel Colláu Les Fuentes (860) al sol y cola mochila debaxo'l culu sacamos los bocadiellos, nun dexamos ni les migayes.

Toca baxar pela biesca, les más de les vegaes adivinando'l camín, finamos dando col Puente Pendón (450), pa un lláu el Mayáu Pastor, nosotros vamos pala drecha, camín de los Fornos, tamos en metá les Foces del Ríu Pendón.

Llegó la hora d'intentar saca-y provechu al tripode, fasta agora acurrucáu na mochila, que por cierto ye nueva, estrenase güei. Asina, cola cámara monta nel tripode vamos faciendo equilibrios peles Foces, retratiando tolos regatos.

Salimos del desfiladeru y nun tris plantámonos en Fuentesanta (230), quitamos el barro de les chiruques col bon agua del n'otra hora afamáu balneariu.

Camudaos y llimpinos vamos axustar un llocal onde xintar el próximu sabadu, vamos rematar l'añu 2009 como se merez, visitando dalgún museu y xintando nun bon restorán, tán convocaos tolos que pasiamos pel monte dalguna xornada l'añu pasáu.

Güei fuerón 22,6 km. y 1098 m. de desnivel, dende les fries 9:40 hasta les templaes 17:40.

31-01-2010 Foces de Ruayer

2010-01-31T23:13:00.000+01:00

CASOMERA-RUAYER-MAYEU FONFRIA-RUAYER-CASOMERA

Güei teníemos previsto facer una ruta pergüapa y perfácil, entamando nes Foces del Pino pa finar nes Foces de Ruayer, cola remota posibilidá d'acabar xintando nalgún bar, había que facer un grupín guapu. Pero siempre apaez daquién con ganes de xingalo too, esta vegada foi l'home del tiempu dandolo de malu pa peor.

N'esti pais tamos avezaos a nun facer munchu casu a estos mindunguis, asina qu'a les 9 Josito, Gelu, Ana P, Toño, Ana B, Juan, Carlos, Mª Luz, Emilio, María, Eduardo, Marta, Mª Paz y Cundi taben coyendo fuercíes nuna churrería de Morea, fora llovía a calderaos.

Un poco d'agua nun diba chanos p'atrás, un nimíu cambiu de planes y colamos pa Casomera (640),el día fríu y gris, había dexao de llover... ñevaba bonamente.

Pertrechaos coles botes, polaines, guantes, gorru, paragües... baxo les güeyaes d'asombru, una manera suave d'expresalo, de los llugareños comencipíamos a caleyar carretera alantre.
Nestes llatitudes l'asfaltu ca vez ta más blancu. Na Paraya (700) colen de frente pela carretera, dexando'l barru nel camín que va pela otra oriella del ríu.

Peles Foces pasamos col paragües nuna mano y la cámara retratiar na otra.
A la entrá de Ruayer (820) axuntámonos toos, ya vamos pensando nes culaes que nos esperen al baxar per esta pindia carretera que ta faciendonos entrar en calor.

Finase l'asfaltu y comencipía la pista, de ñevar nun para, nel Areneru (1000) un touterrén tiense que parar, nosotros a pesar de los recuestos ca vez mas guapos y el caminar más afanosu seguimos p'alantré, bueno dalgunos dan la vuelta buscando'l calor del chigre y el xelu del vermut.

10 minutinos hasta la cabana, otros 10 que resulten 20 hasta'l Mayéu Talabarda (1250) que malapenes se ve tapáu pola ñeve. Venga va, otros 1o minutinos, hasta'l Mayéu Carbayalín, media hora dempués cola ñeve pembaxo hasta les rodíes, penriba hasta los costazos abellugamonos nel Mayéu Fonfría (1300).
Paraos y reponiendo les fuerces damonos cuenta del fríu que fai.

La nula visibilidá nun aconseyaba otra cosa que tornar pol mesmu sitiu, a la insinuación de siguir otro poco fuerón contundentes; fuxén como centelles, saquenme 200 m. de ventaya camín del chigre.

Al llegar al formigón tiense ya más cuidáu, l'asfaltu entovía ponlo peor, paecía una pista patinaxe.
A les 15.40 tabemos entrando en Casomera, anque Gelu subía escontra nos, debíen ser les ganes de xintar.

Baxabamos seliquinamente na idega que teníemos reservada mesa nalgún afayaizu llugar, al calor de la chimenea ensin cobertura, tubo que llegar nuesa secretaria pa escurrir qu'inda queden telefonos d'esos qu'estan conectaos col cable a la paré, asina algamamos un alcuerdu cola Casona de Nembra.

Camudaos, secos y con fame, muncha fame sentamonos na mesa, yeren poco menos de les cinco cuando entamarón a salir peroles con sopa mariscu y pote, pa seguir coles bandexes de xabali, nun pudimos con too, pero hubo sitiu pa llambionaes varies, cafes y llicores.

Ya de nueche cerrá, salimos del llocal, un final de los que creen afición, anque enantes haya que char 5 hores caleyando 16,3 km y subir 600 m pente la ñeve blanco y relluciente, pisandolo casi enantes de que pose nel suelu.