31-10-2009 Retriñón

CALIAO-XULIO-COLLAU L'ARCU-COLLAU LA MUESCA-RETRIÑON-PANDU LA MOROMA-CALIAO

Les ganes que-y tengo a esti picu puen más que la falta fuercíes, ye la tercera vegada que voy pal monte en cuatro díes. Voy dexar de pagar la hipoteca.

En Rusecu, onde fai una selmana tuvierón los principes faciendo'l canelo, dicen que defendiendo'l mediu ambiente y les costumes d'angüañu.

Nun se coñoz como, si poniendo la primera piedra al pantanu de Caliao, si chando una mano a formigonar les Foces del Llaímo o traspasiando torretes d'alta tensión al Conceyu d'Ayer. Agora diz l'alcalde que no les quier, prefier molinos de vientu.Como diba dicir, en Rusecu queamos pa desayunar.

Súbome al coche de Victor I. y llegamos a Caliao (800), baxo un reluciente sol entamamos a caleyar camín del valle Xulió.

Ente semeyes a la biesca, a los meniskos y al perru que se nos xunto va discurriendo prestosa la xornada.
Dividimos la ruta en varies etapes, pero non me queó muy claro.

Vamos siguiendo l'arroyu Porqueras, pasamos pol mayáu del mismu nome (934) seguimos darréu hasta'l mayáu Xulió (1050) onde los güeyos ya non tropicen nes estrecheces del desfiladeru.

Solo se güeyen cumales, y muy altos, asina que coxemos fuercíes, abunden los chocolates de toes les clases, meyor dicir de tolos sabores, colamos camín de la Collá del Arcu (1345).

Vamos llegando, secandonos el sudor, col oxetivu entovía lexos pero ya a la vista.
Tos xuntinos vamos ya camín del colláu Ranéu (1385) onde hay un buen grifu que surte a una bañera-jacuzzi.

Seguimos el senderu tapecíu poles escobes, próxima estación: Colláu la Muesca (1659) ya nos da l'aire d'Ayer, con calima y to güeyamos de frente hasta'l puertu Vegará.

Un breve descansu deleitando los güeyos, güeyando media Asturies y tiro p'arriba en busca de Josito que seguro ya tara na cume.

El Retriñon (1862), va llegando la xente, Montse y Ana P. Victor, Mª Paz, Marta, Victor I. les cares un poco desencaxaes pero cola sonrisa puesta, ya tamos tos.

Char la chaqueta penriba los hombros pa que la brisa non se xunte cola sudá de la camiseta y ponese a xintar seliquinamente, bocáu, semeya, semeya, tragu, bocáu...

Y ensín dase cuenta llevantase y colar pola crestería alantre. Pasamos pol picu Moroma (1658) y tiramonos monte abaxo ente felechos e intentando non tener munchu contautu coles cotolles.

Pol monte de les Andies llegamos al colláu del Home Muertu (1222)
y siguiendo'l cable una llindiadora, taba conectáu, algamamos el colláu Pandefresnu (1195).

D'aquí pol práu al mayáu la Cabritera, agora por un camín aptu pa vehículos a motor baxamos como cohetes col pensamientu puestu nel chigre del pueblu.
Na Campa del Ríu (800) cerramos el círculu, ya ye'l mismu camín de la mañana.

Danos tiempu a beber una cerveza entanto llega'l restu la expedición.
Güei fuerón 1179 m. y 16,9 km en 8 hores y 15 minutos, tras camudase de ropa trasegamos otra cerveza mientres la nueche se chaba sobre nososotros.

Ya poemos contar que tuvimos na cima del Retriñon, con dos... no, con un... vaya mierda rima.

30-10-2009 Peña Arpin

LINDES-FOZ PEQUENA-PEÑA ARPIN-FOZ GRANDE-LINDES

A les 9 Eduardo, Riestra, Juan Carlos y Yo tamos desayunando en Trubia, en Proaza paramos a mercar el pan, la siguiente parada ta en Lindes (850) onde dexamos el coche a la vera la ilesia.

Nun atopamos a naide, el día ta soleáu y la temperatura bonible, son les 10 cuando nos metemos na biesca de Lindes.

El camín embarráu, saltando dun lláu a otru pa finar empozandose onde más barro hay.
Baxamos hasta'l ríu Lindes pa crucíalu pol Pontón (900), un afayaizu puente de maera, y entamar a subir pola pindía fastera del Monte de les Pascues.

Atalayamonos no cimero (1100) intentando gueyar dalgún camín que nos lleve a la Foz Pequena, damos un par de vueltes hasta dar col senderu.

Baxamos pol Gorbizal y crucíamos l'arroyu de la Pesquera, ya tamos no fondero de la Foz Pequena (1080), agora toca salir pola parte d'arriba, ponemonos a ello seliquinamente, pasu a pasu, de piedra en piedra, crucíando pa un lláu y otru del arroyu.

Ente los paredones de Peña Arpín dun lláu y L'Abedulón del otru llegamos a lo cimero la Foz, tamos na Vega la Cosa (1570) a la vera'l Chegu, no tien gota d'agua.

Mentes Juan Carlos sube al Abedulón, nosotros seguimos darréu a la drecha, pola Cua Palacios (1550), poco más aliantre dexamos les mochiles, non podíen más, diben reventaes, ensin fuexu.

Sin el estorbu de les mochiles apaecemos ensin danos cuenta na picorota de Peña Arpín (1678), casi tocamos Penarueda cola mano, debaxo los Puertos d'Agüeria, en frente los Güertos del Diablu, el Ranchón, El Panchón, El Fariñentu... y munchos más.

Necesitamos les mochiles, va siendo hora de xintar y elles tienen la comida, asina que baxamos a por elles, un poco más p'abaxo, nel Valle d'Arriba (1430) topamos una buena piedra pa sentase a xintar.

Xintamos na solombra, el sol coló, no nos dixo pa onde, la temperatura ye bona, vamos que non pusimos la chaqueta.

Tras recoxer los trastos y non dexar ni les migues colamos entemediu una biesca de carrascos en busca del meyor pasu p'adentrase na Foz Grande.

Baxamos siguiendo el discurrir del agua, a un lláu Penarueda, dexamosla pa otru día, al otru Peña Arpín, la biesca cunos colores espetáculares.Presta y muncho pisar la mullía alfombra de chillones colores que formen les fueyes que cayen...poesía pa otru día...

Crucíamos el ríu (1175) pa remontar hasta'l Colláu (1266), un pastor taba buscando les vaques, nosotros vimosles... ¡y diximos-y onde!

Pasamos poles Escolmenes y a les 17.00 tabemos en Lindes, tras unes semeyes a la ilesia y alredores, de frente al fontán, a refrescase por dientro y por fuera.

Dicir que fuerón 12,3 km y 995 m. de desnivel en 7 hores.

El gargüelu entovía resecu fizo que nos parasemos en Cortes a lubricalu y de pasu completar los 1000 m. de desnivel faciendo una pequeña tourné pol pueblín.

17-10-2009 Vegapociellu

L'ARMADIELLA-ABLANOSA-VEGAPOCIELLU-CERREU-L'ARMADIELLA

Tamos na Pola Llaviana xusto cuando Conchi abre la so confitería, son les 9 de la mañana, entramos enfotaos, cafes, bartolos, chocolates, bartolos y más llambionaes... cuantu trabayu cuesta salir desti llocal.

Entamamos la dura ascensión al Puertu, nun semos a ello, dexamos los coches enantes del pueblu de Tarna.
Nun fai frio, ni casi calor, el termometru marca un triste y solitariu grau.

Tamos na Armadiella (900), son les 10.30 cuando desesperaos y col fríu ente los güesos, eso si en manga curtía, metemonos na espesura dela biesca.
Baxamos hasta'l ríu Nalón con ganes de crucíar el puente y que entame a ponese pindio a ver si hay manera d'entrar en calor.

Ya entamen a quitar ropa, los que la llevaben puesta. Agradiezse'l esfuerzu delos rayinos de sol pa penetrar na biesca, non tanto la pendiente del camín, ya sudamos bastante, ya pue enllanar.

Facemos una paradina, más que na pa qu'enfríen les cámares de retratiar. Ya tamos nel mayáu la Ablanosa (1100), un montón de semeyes, un tragín d'agua y siguimos.

El senderu atraviesa la biesca del Faucau, les fayes entovía non tienen los colores deles mios plantes, ni siquiera la ñatura consigue la mio perfeición nestos menesteres.
El continu moviemientu delos pies y deles llengues escaecen el frío.

Y de repente... abrese la biesca, algamamos la esplendorosa Vega Pociellu (1290) rodía de cumales, la temperatura unos 18º, despexao, xintar, beber, falar, dalgún hasta char un pigacin... una hora, dos, cuanto tuvimos, quién conto'l tiempu.

Hora de colar, buscar el camín, pola drecha, pola parte cimera dela biesca, el maxestuosu Faucau, bosque Fabucado palos finos de Madriii, y d'Uvieu tamién.
Caleyamos baxo l'atenta mira delos utres, penriba'l Cantu'l Osu, perbaxo la inmensidá de la biesca.

Salimos de la biesca, una bona fonte y una mullía praera ye ensín ninguna dudía un bon llugar pa ponese a xintar; ponemonos a ello.

Poco a poco vamos llevantandonos y esguilando al mayáu Cerreu (1380) abondo cabanes abandonaes nun inmensu balcón, güeyamos dende'l picu la Sienda pasando pola Carasca, el Campigüeños, el Tiatordos, el Maciodome, Peña Ten y Pileñes hasta l'Abedular...

To tapecío pola biesca, la carretera'l Puertu, el pueblu de Tarna fechu de nuevu tras la contienda -ye más politicamente correuto- civil, notense les llínies reutes deles caleyes, y por allí escondios los nuesos coches.

Baxamos a poles mochiles y a despertar a los siesteros, baxamos de frente nunca mexor dicho, per una especie de cortafueos fechu por dalguna extraña máquina, una llínea que dexamos de respetar unicamente polos brincos producios pol contauto coles cotoyes.

Ente los brincos y la ausencia de solombra apaecen de nuevu los goterones de sudor.
De nuevu nel mayáu la Ablanosa, otru tragín d'agua, la fonte solo echa un filín, y p'abaxo. Xiramos a la drecha (1040) p'adentranos nel monte Saperu, ya non entra'l sol, ta hasta frio.

Llevamos un día mitolóxicu, perdón micolóxicu, semeyes a munches y variaes setes, coxer ninguna nun vaya ser...

Crucíamos l'arroyu nel Rebolláu, non nos remoyamos por poco, más aliantre crucíamoss el regueru de l'Ablanosa y ente setes y rises llegamos al ríu Nalón, aquina tuvierón la sensatez de facer un buen puente.

Tras un llixeru repechín, a estes hores ya non hay repechinos y muncho menos llixeros... tamos na carretera, a la vera los coches.
Camudamonos y decidimos parar en Riosecu a refrescar los gargüelos.

Güei non ficimos ninguna cume, fue un paseín de 15 km. pa dir faciendo afición, tardamos 7 hores y media incluía la siesta, la cota máxima de 1350 m. y un desnivel acumuláu de 700 m.
Asina lo cuento, si non fue asina fue paecío, si non fue paecío...